কংগ্ৰেছ দলৰ জ্যেষ্ঠ নেতা তথা প্ৰাক্তন কেন্দ্ৰীয় মন্ত্ৰী মণি শংকৰ আয়াৰে দেশৰ বৰ্তমানৰ ৰাজনৈতিক আৰু সামাজিক দিশক লৈ গভীৰ চিন্তা আৰু হতাশা প্ৰকাশ কৰিছে। প্ৰ প্রাক্তন প্ৰধানমন্ত্ৰী ৰাজীৱ গান্ধীৰ পুণ্যতিথি উপলক্ষে দিল্লীৰ বীৰ ভূমিত থকা তেওঁৰ স্মাৰকস্থলীত উপস্থিত হৈ আয়াৰে সংবাদ মাধ্যমৰ আগত কয় যে ৰাজীৱ গান্ধীয়ে যি আধুনিক আৰু ধৰ্মনিৰপেক্ষ ভাৰতৰ সপোন দেখিছিল, তেনে এক ভাৰত বৰ্তমান গঢ়ি উঠা দেখা পোৱা নাই। এই অনুষ্ঠানতে তেওঁ কংগ্ৰেছ সাংসদ ৰাহুল গান্ধীৰ নেতৃত্বক লৈও এক বিশেষ প্ৰতিক্ৰিয়া ব্যক্ত কৰে।
স্মাৰকস্থলীত সংবাদ মাধ্যমৰ সৈতে হোৱা বাৰ্তালাপত জ্যেতিষ্মান নেতাগৰাকীয়ে আক্ষেপ প্ৰকাশ কৰি কয় যে বহু মানুহ কেৱল শ্লোগান দিবলৈহে ইয়ালৈ আহে, কিন্তু ৰাজীৱ গান্ধীৰ জীৱন, আদৰ্শ আৰু সাফল্যৰ কথাবোৰ বুজিবলৈ চেষ্টা নকৰে। স্মাৰকস্থলীত লিখা থকা তেওঁৰ চিন্তা আৰু সাফল্যসমূহো মানুহে পঢ়ি নোচোৱাটো অতি দুখৰ বিষয় বুলি তেওঁ উল্লেখ কৰে। তেওঁ লগতে কয় যে পণ্ডিত জৱাহৰলাল নেহৰুৰ উত্তৰাধিকাৰক আধুনিক ৰূপত আগুৱাই নিবলৈ যদি কোনোবাই সঁচা অৰ্থত চেষ্টা কৰিছিল, তেন্তে তেওঁ আছিল ৰাজীৱ গান্ধী। কিন্তু আজি তেওঁ সপোন দেখা ভাৰতখন গঢ়ি উঠা নাই।
এই কথা-বতৰাৰ মাজতে সংবাদ মাধ্যমে মণি শংকৰ আয়াৰক বৰ্তমান লোকসভাৰ বিৰোধী দলৰ নেতা ৰাহুল গান্ধীৰ নেতৃত্ব আৰু কৰ্মশৈলীক ৰাজীৱ গান্ধীৰ সৈতে তুলনা কৰি প্ৰশ্ন সোধে। ইয়াৰ উত্তৰত আয়াৰে কয় যে তেওঁ ৰাহুল গান্ধীক অতি ওচৰৰ পৰা নাজানে। অৱশ্যে তেওঁ স্পষ্ট কৰি দিয়ে যে ৰাহুল গান্ধীও সেই একেই পৰিয়াল, উত্তৰাধিকাৰ আৰু আদৰ্শৰ অংশ, যাক ৰাজীৱ গান্ধীয়ে আগুৱাই লৈ যাব বিচাৰিছিল।
প্ৰাক্তন প্ৰধানমন্ত্ৰী ৰাজীৱ গান্ধী আৰু মণি শংকৰ আয়াৰৰ মাজত অতি গভীৰ ৰাজনৈতিক আৰু ব্যক্তিগত সম্পৰ্ক আছিল। আয়াৰ পূৰ্বে ভাৰতীয় বৈদেশিক সেৱাৰ এজন বিষয়া আছিল। কিন্তু ১৯৮০ ৰ দশকত তেওঁ চাকৰি এৰি ৰাজীৱ গান্ধীৰ হাত ধৰি সক্ৰিয় ৰাজনীতিত ভৰি দিছিল আৰু তেওঁ ৰাজীৱ গান্ধীৰ এজন অতি বিশ্বাসী সতীৰ্থ হৈ পৰিছিল। ১৯৮৪ চনত ইন্দিৰা গান্ধীৰ হত্যাকাণ্ডৰ পিছত ৰাজীৱ গান্ধীয়ে কংগ্ৰেছৰ দায়িত্ব লৈছিল আৰু মাত্ৰ ৪০ বছৰ বয়সতে দেশৰ আটাইতকৈ কম বয়সীয়া প্ৰধানমন্ত্ৰী হৈছিল। পৰৱৰ্তী সময়ত ১৯৯১ চনৰ ২১ মে’ত তামিলনাডুত এটা নিৰ্বাচনী প্ৰচাৰৰ সময়ত এক আত্মঘাতী বোমা বিস্ফোৰণত তেওঁ কৰুণভাৱে প্ৰাণ হেৰুৱাইছিল।
