অসম-মিজোৰামৰ সংঘাতত গুলীবিদ্ধ হৈ গুৰুতৰভাৱে আহত হোৱা তদানীত্বন কৰ্তব্যৰত কাছাৰৰ আৰক্ষী অধীক্ষক বৈভৱ চন্দ্রকান্ত নিম্বলকাৰ ক্ৰমাৎ সুস্থ হৈ উঠিছে।
উল্লেখ্য যে যোৱা ২৬ জুলাইৰ দিনা সকলোৰে বুকু কঁপাই যোৱা এক ঘটনাত অসম-মিজো সীমান্তত মিজো আৰক্ষী আৰু দুৰ্বৃত্তৰ গুলিত প্ৰাণ হেৰুৱাইছিল অসম আৰক্ষীৰ ৬ গৰাকীকৈ জোৱানৰ।
গুলীবিদ্ধ হৈ আহত হৈছিল অৰ্ধ শতাধিক অসম আৰক্ষীৰ জোৱানৰ লগতে স্থানীয় লোক।
গুলিবিদ্ধসকলৰ মাজত আছিল প্ৰাক্তন কাছাৰৰ আৰক্ষী অধীক্ষক বৈভৱ চন্দ্রকান্ত নিম্বলকাৰো।
নিম্বলকাৰে আনকি গুলিয়া-গুলি চলি থকাৰ সময়ত দেহত গুলি লগাৰ পাছতো মিজো আৰক্ষীক ‘ফায়াৰিং’ বন্ধ কৰিবলৈ বাৰম্বাৰ অনুৰোধ জনোৱাৰ লগতে অসম আৰক্ষীয়ে গুলি চলোৱা নাই বুলি বাৰেপতি কৈ আছিল।
বিতৰ্কিত আন্তঃৰাজ্যিক সীমান্তত মিজোৰামৰ আৰক্ষী বাহিনীৰ গুলিত বিষয়াজন গুৰুতৰভাৱে আহত হোৱাৰ পাছত তেওঁক বিমানেৰে মুম্বাইলৈ নিয়া হয় আৰু আন্ধেৰীৰ কোকিলাবেন আম্বানী চিকিৎসালয়ত অস্ত্ৰোপচাৰ কৰা হয়।
তেওঁৰ কঁকাল আৰু শৰীৰৰ তলৰ অংশত গুলিয়ে বেছি আঘাত কৰিছিল যদিও কোনো গুৰুত্বপূৰ্ণ অঙ্গ গুৰুতৰভাৱে ক্ষতিগ্ৰস্ত হোৱা নাছিল।
তিনিঘন্টা ধৰা অস্ত্ৰোপচাৰৰ পাছত চিকিৎসকে তেওঁৰ দেহৰ পৰা পাঁচটাকৈ গুলি বাহিৰ কৰিবলৈ সক্ষম হৈছিল।
এতিয়া ক্ৰমান্বয়ে সুস্থিৰ হৈ উঠিছে বৈভৱ নিম্বলকাৰ। চিকিৎসালয়ত সুস্থ হৈ খোজকঢ়া এখন ফটো ছ’চিয়েল মিডিয়াত প্ৰকাশ পাইছে। অৱশ্যে সম্পূর্ণ সুস্থ হৈ উঠিবলৈ হয়তো আৰু কিছু সময়ৰ প্ৰয়োজন হ’ব।
সমগ্ৰ অসমে এইগৰাকী সাহসী তথা কৰ্তব্যনিষ্ঠ আৰক্ষী বিষয়াৰ দ্ৰুত আৰোগ্যৰ বাবে প্ৰাৰ্থনা কৰি থকাৰ লগতে সোনকালে সুস্থ হৈ উভতি অহাৰ আশা কৰিছে।
নিম্বালকাৰ ২০০৯ বৰ্ষৰ আইপিএছ আৰু অসমৰ কাছাৰৰ প্ৰাক্তন আৰক্ষী অধীক্ষক। তেওঁ বিবাহিত আৰু তেওঁৰ এগৰাকী তিনি বছৰীয়া কন্যাসন্তান আছে।
