ৰাজহুৱা জীৱনত প্ৰধানমন্ত্ৰীৰ ২৫ বছৰ সম্পূৰ্ণ হোৱাৰ উপলক্ষে অসম চৰকাৰে হাতত লোৱা ‘সেৱা সংকল্প অভিযান’ক লৈ এখন মুকলি চিঠি প্ৰেৰণ কৰিছে অসম জাতীয় পৰিষদৰ নেত্ৰী কুংকি চৌধুৰীয়ে। পত্ৰখনৰ জৰিয়তে তেওঁ এই সুদীৰ্ঘ ৰাজনৈতিক যাত্ৰাক অভিনন্দন জ্ঞাপন কৰাৰ লগতে ৰাজ্য চৰকাৰৰ চৰকাৰী যন্ত্ৰ ব্যৱহাৰ কৰি ব্যক্তিবিশেষক মহিমান্বিত কৰাৰ প্ৰৱণতাক লৈ গুৰুতৰ প্ৰশ্ন উত্থাপন কৰিছে। গণতন্ত্ৰত ৰাজ্যৰ প্ৰতিষ্ঠানসমূহৰ নিৰপেক্ষতা আৰু ধাৰাবাহিকতাৰ ওপৰত গুৰুত্ব আৰোপ কৰি নেত্ৰীগৰাকীয়ে এই উদযাপনক এক স্থায়ী সুশাসনৰ আৰ্হিলৈ পৰিৱৰ্তন কৰাৰ আহ্বান জনাইছে।
অহা ১৭ ছেপ্টেম্বৰৰ পৰা ১৭ অক্টোবৰলৈ অসমত এমহীয়া কাৰ্যসূচীৰে এই ‘সেৱা সংকল্প অভিযান’ পালন কৰাৰ প্ৰস্তুতি চলোৱা হৈছে। চৰকাৰৰ বিভিন্ন বিভাগ, জিলা প্ৰশাসন আৰু ক্ষেত্ৰ পৰ্যায়ৰ বিষয়া-কৰ্মচাৰীসকলক এই কাৰ্যসূচীত জড়িত কৰা হৈছে। পত্ৰখনত ‘সেৱা সেতু অভিযান’ৰ দৰে পদক্ষেপৰ জৰিয়তে ব্লক পৰ্যায়ত শিবিৰ পাতি চৰকাৰী সেৱাসমূহ নাগৰিকৰ কাষলৈ লৈ যোৱাৰ প্ৰয়াসক প্ৰশংসা কৰা হৈছে। পিছে চৰকাৰী প্ৰতিষ্ঠানসমূহৰ জৰিয়তে জনসেৱা আগবঢ়োৱাৰ নামত ৰাজনৈতিক নেতৃত্বক উদযাপন কৰাৰ বিষয়টোৱে এক সুকীয়া বিতৰ্কৰ সূত্ৰপাত ঘটাইছে।
পত্ৰখনত উল্লেখ কৰা মতে, চৰকাৰী নিৰ্দেশনা অনুসৰি ‘আশীৰ্বাদ দিয়া’ কাৰ্যসূচীৰ অধীনত অৰুণোদয়, পিএমএৱাই-জি, পিএমএৱাই-ইউ আৰু ৰেচন কাৰ্ডৰ দৰে আঁচনিৰ হিতাধিকাৰীসকলক একগোট কৰি প্ৰধানমন্ত্ৰীৰ প্ৰতি কৃতজ্ঞতা স্বৰূপে তেওঁলোকৰ ঘৰত চাকি জ্বলোৱাৰ প্ৰস্তাৱ দিয়া হৈছে। ৰাজহুৱা আঁচনিৰ অধীনত এজন যোগ্য নাগৰিকৰ প্ৰাপ্য অধিকাৰক চৰকাৰী সুবিধা হিচাপে গণ্য কৰাৰ পৰিৱৰ্তে এজন ৰাজনৈতিক নেতাৰ ব্যক্তিগত উপহাৰ বুলি বিবেচনা কৰাৰ মাজত থকা পাৰ্থক্যক লৈ পত্ৰখনত প্ৰশ্ন কৰা হৈছে। নাগৰিকক চৰকাৰী সুবিধাৰ বাবে ব্যক্তিবিশেষৰ প্ৰতি কৃতজ্ঞতা প্ৰকাশ কৰিবলৈ উৎসাহিত কৰা কাৰ্যই আত্মসন্মানৰ পৰিৱৰ্তে নিৰ্ভৰশীলতাৰ মনোভাৱহে গঢ়ি তোলে বুলি চৌধুৰীয়ে উল্লেখ কৰিছে।
একেদৰে, বিদ্যালয়সমূহত ‘২৫ বছৰৰ সেৱা আৰু সমৰ্পণ’ তথা ‘বিকশিত ভাৰত @ ২০৪৭’ আদি বিষয়ৰ ওপৰত চিত্ৰাংকন, কুইজ আৰু তৰ্ক প্ৰতিযোগিতা অনুষ্ঠিত কৰাৰ চৰকাৰী প্ৰস্তাৱকো সমালোচনা কৰা হৈছে। ইয়াৰ পৰিৱৰ্তে শিক্ষাৰ্থীসকলক সাংবিধানিক মূল্যবোধ, জনসেৱা আৰু আইনৰ শাসনৰ বিষয়ে অৱগত কৰোৱাটোহে বেছি প্ৰয়োজনীয় বুলি পত্ৰখনত মত প্ৰকাশ কৰিছে। ইয়াৰ উপৰিও, চৰকাৰৰ তথ্য আৰু জনসংযোগ বিভাগ তথা মুখ্যমন্ত্ৰীৰ কাৰ্যালয়ক প্ৰচাৰৰ দায়িত্ব অৰ্পণ কৰি ৰাষ্ট্ৰৰ স্থায়ী ব্যৱস্থাক ৰাজনৈতিক প্ৰচাৰৰ আহিলালৈ ৰূপান্তৰিত কৰাৰ প্ৰয়াস চলিছে বুলি অভিযোগ কৰা হৈছে। চৰকাৰী আঁচনিয়ে নাগৰিকক উপকৃত কৰা আৰু ৰাজনৈতিক নেতাই জীৱন সলনি কৰা বুলি প্ৰচাৰ চলোৱাৰ মাজত বৃহৎ পাৰ্থক্য আছে বুলি মুকলি চিঠিখনত স্পষ্ট কৰি দিছে।
পত্ৰখনৰ সামৰণিত নেত্ৰীগৰাকীয়ে স্পষ্ট কৰি দিয়ে যে তেওঁৰ এই মুকলি চিঠিৰ উদ্দেশ্য প্ৰধানমন্ত্ৰীৰ সুদীৰ্ঘ ৰাজহুৱা জীৱন বা অৱদানক অৱমূল্যায়ন কৰা নহয়। প্ৰধানমন্ত্ৰীৰ অনুৰাগীসকলৰ এনে উদযাপনৰ পূৰ্ণ অধিকাৰ থকা বুলি স্বীকাৰ কৰি তেওঁ কয় যে এগৰাকী সাধাৰণ নাগৰিক হিচাপে তেওঁ কেৱল ব্যক্তিপূজা আৰু ৰাষ্ট্ৰৰ প্ৰাতিষ্ঠানিক ব্যৱস্থাৰ মাজত থকা পাৰ্থক্য অক্ষুণ্ণ ৰখাৰহে পোষকতা কৰিছে। প্ৰধানমন্ত্ৰীৰ কাৰ্যালয়ৰ পৰা আৰম্ভ কৰি জিলা প্ৰশাসন আৰু বিদ্যালয়লৈকে ৰাষ্ট্ৰৰ সকলো প্ৰতিষ্ঠান ব্যক্তিবিশেষতকৈ ঊৰ্ধ্বত বুলি উল্লেখ কৰি পত্ৰখনত কোৱা হৈছে যে প্ৰতিষ্ঠানসমূহৰ এই ধাৰাবাহিকতা আৰু নিৰপেক্ষতাই হৈছে গণতন্ত্ৰৰ আটাইতকৈ ডাঙৰ শক্তি।
চৰকাৰী সুবিধা লাভ কৰা নাগৰিকসকল কোনো নেতাৰ প্ৰতি ঋণী হোৱাৰ পৰিৱৰ্তে সংবিধানৰ প্ৰতি দায়বদ্ধ হোৱাটোহে ২৫ বছৰীয়া ৰাজহুৱা যাত্ৰাৰ প্ৰকৃত শ্ৰদ্ধাঞ্জলি বুলি তেওঁ মত প্ৰকাশ কৰে। এজন জনসেৱকৰ প্ৰকৃত সাফল্য কেৱল ৰাইজৰ মাজত জনপ্ৰিয় হোৱাতেই আৱদ্ধ নাথাকে, বৰঞ্চ তেওঁৰ অনুপস্থিতিতো ৰাষ্ট্ৰৰ প্ৰতিষ্ঠানসমূহে দেশবাসীক নিৰৱচ্ছিন্নভাৱে সেৱা আগবঢ়াবলৈ সক্ষম হোৱাটোহে তেওঁৰ প্ৰকৃত কৃতিত্ব। এখন গণতান্ত্ৰিক ৰাষ্ট্ৰত ব্যৱস্থাৱলীৰ এনে সৱলীকৰণেই সৰ্বোচ্চ স্তৰৰ “সেৱা” বুলি মত প্ৰকাশ কৰিছে যুৱ নেত্ৰী গৰাকীয়ে।
