সংসদৰ অধিৱেশন চলি থকা সময়ত বিশৃংখলা সৃষ্টি কৰাৰ অভিযোগত সাতজন কংগ্ৰেছ সাংসদক বৃহস্পতিবাৰে অধ্যক্ষই নিলম্বিত কৰে।
সোমবাৰৰ পৰা আৰম্ভ হোৱা বাজেট অধিৱেশনৰ দ্বিতীয় পৰ্ব অহা ৩ এপ্ৰিললৈকে চলিব। যোৱা তিনিদিন ধৰি বিৰোধী সাংসদকেইজনে বিশৃংখলা সৃষ্টি কৰা বুলি অভিযোগ তোলে।
অসমৰ কলিয়াবৰৰ সাংসদ গৌৰব গগৈ, কেৰালাৰ ত্ৰিশূৰৰ সাংসদ টি এন প্ৰথাপন, কেৰালা যুৱ কংগ্ৰেছৰ সভাপতি তথা ইড্ডুকিৰ সাংসদ দেনা কুৰিয়োকোছে, কৰ্ণাটকৰ বিৰুধনগৰৰ সাংসদ মানিকাম টেগোৰ, কেৰালাৰ কাছাৰগড়ৰ সাংসদ ৰাজমোহন উন্নিথন আৰু অমৃতসৰৰ সাংসদ গুৰমিত সিং আউজলাক নিলম্বিত কৰা হয়।
বাজেট অধিৱেশনৰ দ্বিতীয় পৰ্বৰ আৰম্ভণিৰ দিনাৰে পৰা বিৰোধীসকলে দিল্লীৰ হিংসাৰ ঘটনাক লৈআলোচনাৰ দাবী তোলে।
কিন্তু অধ্যক্ষই এই আলোচনা এতিয়া সম্ভৱ নহয় বুলি জনাই দিয়ে। হোলীৰ পাছত তেওঁ এই আলোচনা হ’ব পাৰে বুলি কয়।
ইপিনে বিৰোধী পক্ষই সেয়া মানিবলৈ সাজু নহয়। অধৱেশন চলি থকাৰ মাজতে কংগ্ৰেছ সংসদসকলে একেৰাহে প্ৰতিবাদ চলাই থকাৰ ফলত বাজেট অধিৱেশনৰ কাম স্থবিৰ হৈ পৰে।
বিৰোধীৰ আবেদনৰ পাছত অধ্যক্ষ ওম বিড়লাই হোলিৰ পাছৰ দিন অৰ্থাৎ ১১ মাৰ্চত আলোচনা হোৱাৰ কথা জনায়। কিন্তু ইয়াৰ বিপৰীতে বিৰোধীসকলে আলোচনাৰ দাবীত অলৰ-অচৰ হৈ থাকে।
সোমবাৰে অধিৱেশনসমাপ্ত হোৱাৰ পাছত অধ্যক্ষ ওম বিড়লাই এখন সৰ্বদলীয় বৈঠক আহ্বান কৰে। ইয়াত অধিৱেশনখন সুচাৰুৰূপে চলাই নিয়াৰ বাবে কিছু প্ৰস্তাৱ আগবঢ়োৱা হৈছিল।
মঙলবাৰে অধিৱেশন চলি থকা সময়ত বিৰোধী আৰু ট্ৰেজাৰি বেঞ্চত থকা সদস্যসকলৰ মাজত কথা কটাকটিৰ সৃষ্টি হয়। তেতিয়াই অধ্যক্ষই সকীয়াই দি কয় যে এইবাৰ অধিৱেশনৰ কামকাজত যিয়েই বাধা দিব তেওঁক নিলম্বিত কৰা হ’ব।
কিন্তু ইয়াৰ পাছতো বিৰোধী সদস্যসকলে বাৰে বাৰে বাধাৰ সৃষ্টি কৰাৰ বাবে অৱশেষত কংগ্ৰেছৰ সাতজন সাংসদক নিলম্বিত কৰা হয়।
ইপিনে, সদনত কংগ্ৰেছৰ নেতা অধীৰ চৌধুৰীয়ে অধ্যক্ষৰ এই সিদ্ধান্তক গৰিহনা দিয়ে। এই সিদ্ধান্তক সমালোচনা কৰি এয়া স্বৈৰতন্ত্ৰ বুলি কয়। তদুপৰি, তেওঁ এই সিদ্ধান্ত অধ্যক্ষৰ নহয়, চৰকাৰৰহে বুলিও কটাক্ষ কৰে।