মাজ আকাশত এক ভয়ংকৰ বিপৰ্যয়ৰ পৰা কথমপি ৰক্ষা পালে পৱন হংস হেলিকপ্টাৰৰ সাতগৰাকী আৰোহী। মঙলবাৰে পুৱা আন্দামান সাগৰৰ বুকুত হেলিকপ্টাৰখন জৰুৰী অৱতৰণ কৰিবলগীয়া হয়। যান্ত্ৰিক বিজুতিৰ বাবে হেলিকপ্টাৰখন সাগৰত পৰি যায় যদিও পাইলটৰ তৎপৰতাৰ বাবে কোনো ডাঙৰ দুৰ্ঘটনা সংঘটিত নহ’ল। হেলিকপ্টাৰখনত পাঁচজন যাত্ৰী আৰু দুজন ক্ৰু সদস্য আছিল আৰু তেওঁলোক আটাইকেইজনকে সুৰক্ষিতভাৱে উদ্ধাৰ কৰা হৈছে।
জানিব পৰা মতে মঙলবাৰে পুৱা প্ৰায় চাৰে ন বজাত প’ৰ্ট ব্লেয়াৰৰ পৰা মায়াবন্দৰ অভিমুখে উৰা মাৰিছিল পৱন হংসৰ এই হেলিকপ্টাৰখন। গন্তব্যস্থানৰ ওচৰ পাওঁতেই হঠাতে কপ্টাৰখনত গুৰুতৰ কাৰিকৰী বিসংগতি দেখা দিয়ে। কোনো উপায় বিচাৰি নাপাই পাইলটে সাগৰৰ মাজতে হেলিকপ্টাৰখন জৰুৰী অৱতৰণ কৰোৱাৰ সিদ্ধান্ত লয়। উপকূলৰ পৰা দূৰত হেলিকপ্টাৰখন ক্ৰমান্বয়ে পানীৰ ফালে নামি অহা দেখি স্থানীয় ৰাইজৰ মাজত ব্যাপক চাঞ্চল্যৰ সৃষ্টি হয়। হেলিকপ্টাৰখনত এটি শিশুও আছিল যদিও উদ্ধাৰকাৰীৰ ক্ষিপ্ৰতাৰ বাবে কোনো লোকেই আঘাত পোৱা নাই।
আন্দামানৰ এই উদ্বেগজনক ঘটনাৰ মাজতে দিল্লীৰ আকাশতো আন এক আতঙ্কৰ সৃষ্টি হয়। দিল্লীৰ পৰা লেহ অভিমুখে উৰা মৰা স্পাইচ জেটৰ এখন বিমানত মাজ আকাশত যান্ত্ৰিক বিজুতি ধৰা পৰে। বিমানখনত প্ৰায় ১৫০ গৰাকী যাত্ৰী আছিল। উৰণৰ কিছু সময়ৰ পিছতে পাইলটে ইঞ্জিনত সমস্যা থকাৰ কথা জানিব পাৰে আৰু যাত্ৰীসকলৰ নিৰাপত্তাৰ স্বাৰ্থত কোনো ধৰণৰ বিপত্তি নলৈ বিমানখন পুনৰ দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰলৈ ঘূৰাই আনে।
দিল্লী বিমানবন্দৰত বিমানখন সুৰক্ষিতভাৱে অৱতৰণ কৰাৰ পিছত সকলো যাত্ৰীয়ে স্বস্তিৰ নিশাহ পেলায়। বিমানখনৰ যাত্ৰীসকলক নিৰাপদে নমাই অনাৰ ব্যৱস্থা কৰা হয়। বৰ্তমান বিশেষজ্ঞৰ এটি দলে বিমানখনৰ ইঞ্জিনত কি কাৰণত বিজুতি ঘটিছিল সেই বিষয়ে অনুসন্ধান চলাই আছে। একেদিনাই দুখনকৈ আকাশী যানত হোৱা এনে কাৰিকৰী বিসংগতিয়ে যাত্ৰীসকলৰ মাজত তীব্ৰ শংকাৰ সৃষ্টি কৰিছে।
