নিৰ্মাণৰ কাম চলি আছে উত্তৰ প্ৰদেশৰ কনৌজ ৰে’ল ষ্টেশ্যনৰ এটা অংশৰ। শনিবাৰে বিয়লি ভাঙি পৰে নিৰ্মিয়মান অট্টালিকাটোৰ এটা অংশ। ঘটনাৰ সময়ত উক্ত স্থানত ৩৫ জন শ্ৰমিক কৰ্মৰত আছিল। গতিকে স্বাভাৱিকতে বহু লোকৰ মৃত্যুৰ আশংকা প্ৰকাশ কৰিছে।
ৰেল আৰক্ষী, জি আৰ পি আৰু স্থানীয় আৰক্ষীৰ দলে উদ্ধাৰ অভিযান আৰম্ভ কৰিছে।
শেহতীয়া খবৰ অনুসৰি এই পৰ্যন্ত ২৩ জন লোকক উদ্ধাৰ কৰা হৈছে। অৱশ্যে এতিয়াও আবদ্ধ হৈ থকাসকলক উদ্ধাৰৰ কাম চলি আছে।
উদ্ধাৰত অধিক সময় খৰচ কৰিলে তেওঁলোকক জীৱিত অৱস্থাত উদ্ধাৰ কৰা সম্ভৱ নহ’ব বুলি আশংকা কৰা হৈছে।
জিলা দণ্ডাধীশ সুব্ৰত কুমাৰ শুক্লাই জনোৱা মতে, কাম চলি থকা ষ্টেশ্যনৰ ছাদখন হঠাতে ভাঙি যায়। সকলো শ্ৰমিকক জীৱিত অৱস্থাত উদ্ধাৰৰ বাবে সকলো প্ৰচেষ্টা হাতত লোৱা হৈছে। ইতিমধ্যে আহত শ্ৰমিকৰ ক্ষতিপূৰণৰ কথা ঘোষণা কৰিছে চৰকাৰে।
উত্তৰ প্ৰদেশ চৰকাৰে এই ঘটনাত গুৰুতৰভাৱে আহত হোৱাসকলক ৫০ হাজাৰ টকা আৰু যিসকল লোকৰ আঘাত গুৰুতৰ নহয় তেওঁলোকক ৫ হাজাৰ টকা দিয়া হ’ব বুলি জানিব পৰা গৈছে।
ইতিমধ্যে উদ্ধাৰ অভিযান ক্ষিপ্ৰ কৰিবলৈ ৰাজ্যিক দুৰ্যোগ সাহায্য বাহিনী বা এছডিআৰএফক মাতি অনা হৈছে।
