এগৰাকী বিবাহিতা মহিলাক যৌন নিৰ্যাতনৰ গোচৰত অভিযুক্ত কেন্দ্ৰীয় ৰে’ল ৰাজ্যিক মন্ত্ৰী তথা নগাওঁ সমষ্টিৰ বিজেপি সাংসদ ৰাজেন গোহাঁইক ৮ জানুৱাৰিত সোঁশৰীৰে হাজিৰ হ’বলৈ নগাঁও আদালতে চমন জাৰি কৰিছিল যদিও অজুহাত দেখুৱাই হাজিল নহ’ল মন্ত্ৰীজন। জানিব পৰামতে, সংসদৰ অধিৱেশনৰ বাবে দিল্লীত থকা বাবে মন্ত্ৰীজন উপস্থিত হ’ব পৰা নাই বুলি তেওঁৰ অধিবক্তাই জনায় আদালতক।
আদালতে মন্ত্ৰীজনক অহা ১৪ ফেব্ৰুৱাৰিত সোঁশৰীৰে উপস্থিত থকাৰ নিৰ্দেশ দিয়ে।
উল্লেখযোগ্য যে বিজেপিৰ সাংসদ তথা মন্ত্ৰীজনে নগাঁও জিলাৰ দেউৰী গাঁৱৰ বিজেপিৰ যুৱ মৰ্চাৰ এজন সদস্যৰ পত্নীক দীৰ্ঘদিন ধৰি যৌন নিৰ্য্যাতন চলাই আহিছিল বুলি যোৱা ২ আগষ্টত যুৱ মৰ্চাৰ সদস্যজনৰ পত্নয়ে নগাওঁ সদৰ থানাত এজাহাৰ দিছিল।
উক্ত এজাহাৰৰ ভিত্তিত আৰক্ষীয়ে প্ৰথমে গোচৰ ৰুজু কৰা নাছিল যদিও পিছত সেয়া কৰিবলৈ বাধ্য হয়।
আনহাতে গোচৰটোত মন্ত্ৰী ৰাজেন গোহাঁইক নগাঁৱৰ আৰক্ষীয়ে ৰক্ষণাবেক্ষণ দিয়াৰ চেষ্টা চলোৱা বুলিও অভিযোগ উঠিছিল। কিন্তু এই লৈ সংবাদ মাধ্যম সজাগ হোৱাত আৰক্ষীয়ে গোচৰটো আদালতলৈ পঠাবলৈ বাধ্য হয়।
আনহাতে ৰাজেন গোহাঁয়ে গোচৰটোত বুজাবুজি কৰিবলৈ ভুক্তভোগী মহিলাগৰাকী আৰু তেওঁৰ স্বামী তথা বিজেপিৰ যুৱ মৰ্চাৰ সদস্যজনক টকাৰে মেনেজ কৰিব খুজিছিল বুলি সংবাদ মাধ্যমৰ আগত প্ৰকাশ কৰিছিল ভুক্তভোগী মহিলাগৰাকী আৰু তেওঁৰ স্বামীজনে।
ইয়াৰ দ্বাৰা প্ৰভাৱিত হৈ ভুক্তভোগী মহিলাগৰাকীৰ স্বামীজনে প্ৰথম অৱস্থাত গোচৰটো উঠাই লোৱাৰ কথা ভাবিছিল যদিও পিছত সেই সিদ্ধান্ত বাদ দি গোচৰটো চলাই নিয়াৰ সংকল্প লোৱা বুলি আদালতক জনায়। তাৰ পিছতে নগাঁও আদালতে গোহাঁইৰ বিৰুদ্ধে নগাঁও সদৰ আৰক্ষীয়ে আদালতত দাখিল কৰা চূড়ান্ত প্ৰতিবেদনখন অগ্ৰাহ্য কৰি গোচৰটো চলোৱাৰ সিদ্ধান্ত লৈছিল।
নগাঁও আদালতৰ মুখ্য ন্যায়িক দণ্ডাধীশ সংগীতা গগৈৰ আদালতে ৰাজেন গোহাঁইৰ গোচৰটো সন্দৰ্ভত যোৱা ২০ নৱেম্বৰত এটা নিৰ্দেশনা জাৰি কৰিছিল, য’ত ৰাজেন গোহাঁইক ৮ জানুৱাৰিত সোঁশৰীৰে আদালতত উপস্থিত থাকিবলৈ নিৰ্দেশ দিছিল।
মন কৰিব লগীয়া যে ৰাজেন গোহাঁয়ে উক্ত মহিলাগৰাকীৰ উপৰি তেওঁৰ এগৰাকী ননদকো চাকৰিৰ প্ৰলোভনেৰে যৌন শোষণ কৰি আহিছিল বুলি অভিযোগ আনিছিল বিজেপি যুৱ মৰ্চাৰ সদস্যজনে।
