হাইস্কুল শিক্ষান্ত পৰীক্ষাৰ প্ৰশ্ন কাকত ফাদিলক কেন্দ্ৰ কৰি সৃষ্টি হোৱা অনাস্থা তথা দীৰ্ঘদিন ধৰি ক্ৰমাগতভাৱে জাতীয় অনুষ্ঠান ছেবাক ধ্বংসৰ চক্ৰান্ত কৰাৰ অভিযোগ তুলি এই চক্ৰান্তৰ বিৰুদ্ধে ছাত্ৰ সংগঠন এছ এফ আইয়ে যোৱা ২০ মাৰ্চত আৰম্ভ কৰা অনশন কাৰ্যসূচীয়ে আজি তিনিদিন সম্পূৰ্ণ কৰিলে।
এগৰাকী অৱসৰ প্ৰাপ্ত ন্যায়াধীশৰ নেতৃত্বত এক উচ্চ পৰ্যায়ৰ তদন্ত কমিটি গঠন কৰি সমগ্ৰ ঘটনাৰ তদন্ত ঘোষণা কৰা, ছেবাৰ অধ্যক্ষ, সচিব আৰু শিক্ষামন্ত্ৰীৰ পদত্যাগ লগতে প্ৰতিবাদৰত ছাত্ৰ-ছাত্ৰীৰ ওপৰত অত্যাচাৰ চলোৱা ধলপুৰ থানাৰ আৰক্ষী বিষয়াক নিলম্বন কৰাৰ দাবীত এই অনশন কাৰ্যসূচী অব্যাহত ৰাখিছে এছ এফ আই- এ।
আজি এক বিবৃতি যোগে এছ এফ আই- ৰ অসম শাখাই কয়, “চৰকাৰ তথা প্ৰশাসনে এই বিষয়ত আজিপৰ্যন্ত নিৰ্বাক কিন্তু আমিও দাবীত অটল। আমাৰ দাবীৰ যুক্তিযুক্ততা ইতিমধ্যে আজিৰ বাতৰি কাকতসমূহত প্ৰকাশ পাইছে। CID তদন্ততেই ছেবাৰ এক বিশেষ চক্ৰ প্ৰশ্ন কাকত ফাদিলত যে জড়িত সেয়া প্ৰকাশ পাইছে।”
ছাত্ৰ সংগঠনটোৱে লগতে ৰাজ্যৰ শিক্ষামন্ত্ৰী ৰণোজ পেগুৱে বাৰে বাৰে ছেবাৰ ভুল নাই বুলি কৈ দায় সাৰিব বিচাৰিছে বুলিও অভিযোগ কৰে। প্ৰকাশিত বিবৃতিটোত এছ এফ আই- এ লগতে কয়, “এই তদন্ত আৰু গভীৰভাৱে হ’ব লাগিব আৰু সেয়ে আমি এজন অৱসৰ প্ৰাপ্ত ন্যায়াধীশৰ নেতৃত্বত এক উচ্চ পৰ্যায়ৰ তদন্ত কমিটি গঠন কৰি সমগ্ৰ ঘটনাৰ তদন্ত বিচাৰিছো।”
তদন্ত প্ৰক্ৰিয়া যাতে সুকলমে হয়, তাৰ বাবে ছেবাৰ অধ্যক্ষ আৰু সচিবে পদত্যাগ কৰা উচিত বুলিও উল্লেখ কৰে ছাত্ৰ সংগঠনটোৱে। এছ এফ আই- এ কয়, “এই দুই বিষয়াক কিয় শিক্ষামন্ত্ৰীয়ে ৰক্ষণাবেক্ষণ দিব বিচাৰিছে? বৰঞ্চ শিক্ষামন্ত্ৰীয়ে নিজৰ বিফলতা স্বীকাৰ কৰি পদত্যাগ কৰিলেহে সমগ্ৰ ঘটনা পোহৰলৈ আহিব।”
“আমাৰ অনশনৰ আজি তৃতীয় দিন। অসমৰ জাতীয় অনুষ্ঠান ছেবা ৰক্ষাৰ দাবীত আমাৰ এই অনশন চলি থাকিব যেতিয়ালৈকে অসম চৰকাৰে এক উচ্চ পৰ্যায়ৰ তদন্ত ঘোষণা নকৰে আৰু ছেবাৰ সংস্কাৰৰ কৰিব বুলি আশস্ত নকৰে।”— বিবৃতিটোত লগতে এইদৰে উল্লেখ কৰা হৈছে।
তৃতীয় দিনা কাৰ্যসূচীত SFI ৰ অনশৰ প্ৰতি সমৰ্থন আৰু সহযোগিতা জনাই অনশনস্থলীত উপস্থিত হয় ডিব্ৰুগড় বিশ্ববিদ্যালয়ৰ প্ৰাক্তন অধ্যাপক তথা উত্তৰ পূৰ্বাঞ্চলৰ পাৰ্বত্য বিশ্ববিদ্যালয় (NEHU) ৰ প্ৰাক্তন DEAN ড° অপূৰ্ব বৰুৱা। কন্ঠ অটুট থকালৈকে তেওঁ চৰকাৰৰ হঠকাৰিতা আৰু ছেবা ধ্বংসৰ ষড়যন্ত্ৰৰ বিৰুদ্ধে দৃঢ় প্ৰতিবাদ কৰি যাব বুলি মন্তব্য কৰে ড° অপূৰ্ব বৰুৱাই।
তেওঁৰ লগতে আজি অনশনস্থলীত CITU ৰ অসম ৰাজ্যিক কমিটিৰ সদস্য তথা সদৌ অসম নিৰ্মাণ শ্ৰমিক ইউনিয়নৰ কাৰ্যকৰী সভাপতি বদন ভূঞা, অসম ৰাজ্যিক কৰ্মচাৰী ফেডাৰেচনৰ সভাপতি কমৰেড নৱ পাটগিৰি, সদৌ অসম নিৰ্মাণ শ্ৰমিকৰ কোষাধ্যক্ষ ভোলা শৰ্মা, প্ৰাক্তন এছ এফ আইৰ সতীৰ্থ হিতেশ দাস, CITU কামৰূপ মহানগৰ জিলা সম্পাদক আলি আকবৰো উপস্থিত থাকে।
এছ এফ আইৰ সংগ্ৰামক পূৰ্ণ সমৰ্থন আগবঢ়াই অনাগত দিনত সংগঠনটোৰ লগত সহযোগিতা আগবঢ়োৱাৰ প্ৰতিশ্ৰুতি দিয়ে উপস্থিত লোকসকলে। তেওঁলোকৰ লগতে অসম ৰাজ্যিক অংগণবাদি কৰ্মী সহায়িকা সন্থাৰ সম্পাদক ইন্দিৰা নেৱাৰ আৰু অসম ৰাজ্যিক কৃষক সভাৰ সভাপতি টিকেন দাস আৰু সম্পাদক গজেন বৰ্মন, AISA ৰ ৰাজ্যিক সভাপতি সুব্ৰত তালুকদাৰ, ছাত্ৰ মুক্তি সংগ্ৰাম সমিতিৰ কাৰ্যকৰী সভাপতি, গুৱাহাটী বিশ্ববিদ্যালয়ৰ ছাত্ৰ একতা সভাৰ প্ৰাক্তন সাধাৰণ সম্পাদক মতিউৰ ৰহমান, প্ৰাক্তন উপ সভাপতি নৱদ্বীপ বৰগোহাঁয়ো আজি এছ এফ আইৰ অনশন কাৰ্যসূচীত অংশগ্ৰহণ কৰে।
এছ এফ আইয়ে নিৰ্ধাৰণ কৰা দাবীসমূহ পূৰণ নকৰালৈকে এই অনশন কাৰ্যসূচী অব্যাহত ৰখাৰ সিদ্ধান্ত গ্ৰহণ কৰিছে। লগতে কাইলৈৰ শ্বহীদ দিৱসৰ লগত সঙ্গতি ৰাখি অনশনস্থলীতে এক কাৰ্যসূচী গ্ৰহণ কৰাৰ বিষয়ে সদৰী কৰিছে ছাত্ৰ সংগঠনটোৱে।
এই সন্দৰ্ভত সংগঠনটোৱে কয়, “উল্লেখযোগ্য যে কাইলৈৰ দিনটো ভাৰতবৰ্ষৰ ইতিহাসত এক গুৰুত্বপূৰ্ণ দিন। ২৩ মাৰ্চ- শ্বহীদ দিৱস। ১৯৩১ চনৰ এই দিনটোতে ভগৎ সিং, সুখদেৱ আৰু ৰাজগুৰুক বৃটিছ চৰকাৰে ফাঁচী কাঠত ওলমাইছিল। এই দিনটোত মহান স্বাধীনতা আন্দোলনৰ বিপ্লৱীসকলক আমি অনশন থলীৰ পৰাই স্মৰণ কৰিম। বীৰ শ্বহীদ ভগৎ সিং, সুখদেৱ আৰু ৰাজগুৰুক স্মৰণ কৰি বিয়লি ২ বজাৰ পৰা এক কাৰ্য্যসূচী গ্ৰহণ কৰা হৈছে।”
“বীৰ শ্বহীদসকলৰ প্ৰেৰণাৰে আগবাঢ়ি যোৱাৰ আমি সংকল্প গ্ৰহণ কৰিম। শ্বহীদ দিৱসৰ এই ক্ষণত আমি সকলো অংশৰ ৰাইজৰ অংশগ্ৰহণ আৰু সহায়- সহযোগিতা আন্তৰিকতাৰে কামনা কৰিছোঁ। আহক, আমি সকলোৱে একেলগে আৰু একেমুখে ৰাজহুৱা শিক্ষা ৰক্ষাৰ দাবীত সমস্বৰে প্ৰতিবাদমুখৰ হওঁ।”— বিবৃতিটোত এছ এফ আই- এ লগতে কয়।
