ক’ৰ’না ভাইৰাছত আক্ৰান্ত হৈছে পাকিস্তান ক্ৰিকেট দলৰ প্ৰাক্তন অলৰাউণ্ডাৰ শ্বাহিদ আফ্ৰিদী। শনিবাৰে খেলুৱৈগৰাকীয়ে টুইট কৰি এই কথা ৰাজহুৱা কৰে।
যোৱা বৃহস্পতিবাৰৰ পৰা অসুস্থ অনুভৱ কৰি থকা বুলি টুইটত উল্লেখ কৰি আফ্ৰিদীয়ে সোনকালে আৰোগ্য লাভৰ বাবে তেওঁৰ অনুৰাগীসকলক প্ৰাৰ্থনা কৰিবলৈ অনুৰোধ জনায়।
উল্লেখযোগ্য যে যোৱা সময়ছোৱাত পাকিস্তানত কোভিড-১৯ সংক্ৰান্তীয় সাহায্য আগবঢ়োৱা কামত ব্যস্ত থকা শ্বাহিদ আফ্ৰিদীক প্ৰায়ে বাহিৰত ঘুৰি-ফুৰা দেখা গৈছিল।
ইপিনে পাকিস্তানৰ ক্ৰিকেটাৰ গৰাকী ক’ৰ’না ভাইৰাছত আক্ৰান্ত হোৱাৰ খবৰ পোৱাৰ পিছত ভাৰতীয় ক্ৰিকেট দলৰ প্ৰাক্তন অপেনিং বেটছমেন তথা বিজেপি সাংসদ গৌতম গম্ভীৰে তেওঁ সোনকালে আৰোগ্য লাভ কৰাটো কামনা কৰিছে।
ছালাম ক্ৰিকেট ২০২০ অনুষ্ঠানত অংশ লৈ গম্ভীৰে কয়, ‘কোনো লোকেই এই ভাইৰাছত আক্ৰান্ত হ’ব নালাগে। শ্বাহিদ আফ্ৰিদীৰ সৈতে মোৰ ৰাজনৈতিক মতভেদ আছে কিন্তু মই তেওঁ শীঘ্ৰে সুস্থ হৈ উঠাটো কামনা কৰো।‘
বিশ্বৰ আগশাৰীৰ ক্ৰিকেটাৰসকলৰ অন্যতম শ্বাহিদ আফ্ৰিদীয়ে পাকিস্তানৰ হৈ ১৯৯৬ৰ পৰা ২০১৮ চনলৈ ২৭খন টেষ্ট মেচ, ৩৯৮খন এদিনিয়া আৰু ৯৯খন টি২০ মেচ খেলিছিল।