অসমত কেতিয়াৰ পৰা আৰু কেনেকৈ ব্ৰেড বা পাওৰুটিৰ প্ৰচলন ঘটিল? এই কথা নিশ্চয়কৈ সকলোৱে জানিবলৈ বিচাৰে।
আজি আমাৰ এই প্ৰতিবেদনত আমি ক’ম ব্ৰিটিছৰ যুগৰে পৰা গুৱাহাটীৰ ইতিহাস বিজড়িত এখন বেকাৰীৰ কথা।
ব্ৰিটিছ শাসনৰ কালৰে পৰা বিখ্যাত গুৱাহাটীৰ এইখন বেকাৰীৰ নাম শ্বেখ ব্ৰাদাৰ্ছ।
অসমৰ ভিতৰতে প্ৰথমখন বেকাৰী হিচাপে নাম আছে এইখন বিপনীৰ। এই বেকাৰীখন গুৱাহাটীৰ পাণবজাৰত অৱস্থিত।
জানিব পৰা মতে এই বেকাৰীৰ সৈতে জড়িত আছে ভাৰতৰ প্ৰথমগৰাকী প্ৰধানমন্ত্ৰী জৱাহৰলাল নেহৰুৰ নাম। গুৱাহাটীলৈ অহা সময়ত প্ৰধানমন্ত্ৰীগৰাকীক এই বেকাৰীৰ পৰা পুৱাৰ জলপানৰ বাবে সু-স্বাদ্যু আহাৰৰ যোগান ধৰা হৈছিল। যি খাদ্য খায় পৰম তৃপ্তি লাভ কৰিছিল প্ৰধানমন্ত্ৰীগৰাকীয়ে আৰু প্ৰশংসাৰে উপচাই পেলাইছিল বেকাৰীখনক।
১৮৮০ চনত সেই সময়ৰ বংগৰ এগৰাকী বিখ্যাত ব্যৱসায়ী শ্বেখ গোলাম ইব্ৰাহিম আৰু তেওঁৰ দুগৰাকী ভাতৃ ব্ৰিটিছ গভৰ্ণৰৰ সৈতে গুৱাহাটীৰ উজানবজাৰ ঘাটলৈ আহিছিল। সেই তিনিগৰাকী ভাতৃয়ে ব্ৰিটিছ শাসকৰ নিৰ্দেশ অনুসৰি গুৱাহাটীৰ পাণবজাৰত ১৮৮৫ চনত আৰম্ভ কৰিছিল এইখন বেকাৰী। তেতিয়াৰে পৰা এইখন বেকাৰীৰ নাম শ্বেখ ব্ৰাডাৰ্ছ।
এই বেকাৰীৰ পৰাই ব্ৰেড গুৱাহাটীৰ জি এছ ৰোড নিৰ্মাণ কৰি থকা বিষয়া, অভিযন্তা আৰু শ্ৰমিকসকলে ৰাতিপুৱাৰ আহাৰ হিচাপে গ্ৰহণ কৰিছিল বুলি শ্বেখ ব্ৰাডাৰ্ছৰ স্বত্বাধিকাৰীয়ে আমাৰ আগত জানিবলৈ দিয়ে।
১৩৫ বছৰীয়া এক ইতিহাস বিজড়িত এইখন শ্বেখ ব্ৰাডাৰ্ছ এতিয়া চতুৰ্থ প্ৰজন্মই চলাই আছে।
প্ৰথমে অসমৰ পূৰ্বৰ ৰাজধানী শ্বিলঙলৈ ব্ৰিটিছ বিষয়াৰ আহাৰৰ বাবে এই বেকাৰীৰ পৰা ব্ৰেডৰ সৰবৰাহ হৈছিল। কিন্তু পাছলৈ অসমৰ খিলঞ্জীয়া মানুহৰো প্ৰিয় হৈ পৰিল এই বেকাৰীৰ ব্ৰেডৰ লগতে অন্যান্য খাদ্য।
গুৱাহাটীত ভিন্ন বেকাৰী গঢ় লৈ উঠিছে যদিও অন্য বেকাৰীয়ে কোনোধৰণৰ প্ৰত্যাহ্বান সৃষ্টি কৰিব পৰা নাই বুলি আমাৰ আগত দাবী কৰিছে শ্বেখ ব্ৰাডাৰ্ছ ৰ পঞ্চম প্ৰজন্মৰ স্বত্বাধিকাৰীয়ে।
অসমৰ বিভিন্ন ঠাই যেনে, গোৱালপাৰা, ৰঙিয়া, ধুবুৰীকে ধৰি বিভিন্ন জিলাৰ ভিন্ন বেকাৰীয়ে এই শ্বেখ ব্ৰাডাৰ্ছৰ পৰা ব্ৰেড, কেক ইত্যাদি পাইকাৰী হাৰত ক্ৰয় কৰি লৈ যায় বুলিও জানিবলৈ দিয়ে স্বত্বাধিকাৰীয়ে।
পূৰ্বৰ তুলনাত আধুনিকীকৰণৰ ওপৰতো বিশেষভাৱে গুৰুত্ব আৰোপ কৰা হৈছে এই বেকাৰীত।
