দেশক নেতৃত্ব দিয়াৰ দৰে ধাৰাবাহিকতা ৰাহুল গান্ধীৰ মাজত নাই। এই মন্তব্য কংগ্ৰেছৰেই পুৰণি মিত্ৰদলৰ নেতা শাৰদ পাৱাৰৰ।
পাৱাৰৰ মতে নেতা হিচাপে প্ৰয়োজনীয় ধাৰাবাহিকতা ৰাহুল গান্ধীৰ মাজত দেশবাসীয়ে বিচাৰি পোৱা নাই।
অৱশ্যে, ৰাহু গান্ধী সম্পৰ্কত বাৰাক অ’বামাই কৰা মন্তব্যকো তেওঁ সমৰ্থন কৰা শাৰদ পাৱাৰে।
এইবাৰেই প্ৰথম নহয়, ইয়াৰ পূৰ্বেও এনচিপিৰ মুৰব্বীগৰাকীয়ে কংগ্ৰেছৰ মুখ্য নেতাৰ ৰাজনৈতিক সদিচ্ছাৰ ওপৰত প্ৰশ্ন উত্থাপন কৰিছে।
বৃহস্পতিবাৰে সংবাদমাধ্যমক দিয়া এক সাক্ষাৎকাৰত পাৱাৰে কয় যে ৰাহুল গান্ধীৰ নেতৃত্বক লৈ কিছু প্ৰশ্ন আছে। তেওঁৰ মাজত হয়তো সেই ধাৰাবাহিকতা নাই।
তাৰমাজতে শাৰদ পাৱাৰে গান্ধী পৰিয়ালৰ ঐতিহ্যৰ প্ৰতি আস্থাৰ কথাও প্ৰকাশ কৰে। তেওঁ কয় যে ছোনিয়া গান্ধী, গান্ধী পৰিয়ালৰ সৈতে মতপাৰ্থক্য থাকিলেও সত্যটো হ’ল যে আজিও কংগ্ৰেছীসকলে গান্ধী-নেহৰু পৰিয়ালৰ প্ৰতি আস্থা ৰাখে।
আনহাতে, ৰাহুলৰ সম্পৰ্কত বাৰাক অ’বামাই কৰা মন্তব্যৰ বিৰোধিতা কৰি পাৱাৰে কয় যে আমাৰ নিজৰ নেতাৰ বিষয়ে আমাৰ যি মন যায় ক’ব পাৰো. কিন্তু আন দেশৰ নেতাক লৈ আমি কথা কোৱা অনুচিত। মই ভাৱো এইক্ষেত্ৰত অ’বামাই নিজৰ সীমা অতিক্ৰম কৰিছে।
পিচে, শাৰদ পাৱাৰে যিধৰণে ৰাহুলৰ নেতৃত্বৰ ধাৰাবাহিকতাক লৈ প্ৰশ্ন তুলিছে সেইটোৱে কংগ্ৰেছ নেতাৰ ওপৰত চাপ সৃষ্টি কৰাটো নিশ্চিত বুলি ক’ব পাৰি।
দৰাচলতে, প্ৰধানমন্ত্ৰী নৰেন্দ্ৰ মোদীৰ প্ৰভাৱৰ বিপৰীতে বিৰোধী নেতা হিচাপে ৰাহুল গান্ধীৰ ভূমিকা যথেষ্ট নিষ্প্ৰভ দেখা যায়। দীৰ্ঘদিন ধৰি বিৰোধী নেতাসকলে ৰাহুলক পাৰ্টটাইম ৰাজনীতিক বুলি দাবী কৰি আহিছে। কিন্তু এইবাৰ কংগ্ৰেছৰ মিত্ৰদলৰ নেতাৰ এনে মন্তব্য যথেষ্ট অস্বস্তিকৰ হ’ব বুলি ক’ব পাৰি।