ভাৰতত নিৰ্বাসিত হৈ থকা বাংলাদেশৰ ক্ষমতাচ্যুত প্ৰাক্তন প্ৰধানমন্ত্ৰী শ্বেখ হাছিনাই ২৩ জানুৱাৰী, শুকুৰবাৰে দিল্লীত আয়োজন কৰা সংবাদমেলক লৈ তীব্ৰ প্ৰতিক্ৰিয়া প্ৰকাশ কৰিছে বাংলাদেশে। ঢাকাই অভিযোগ কৰিছে যে ভাৰত চৰকাৰে হাছিনাক বাংলাদেশৰ অন্তৱৰ্তীকালীন চৰকাৰ অপসাৰণৰ বাবে ৰাজহুৱাভাৱে আবেদন জনোৱাৰ অনুমতি প্ৰদান কৰাত তেওঁলোকে গভীৰ অসন্তুষ্টি লাভ কৰিছে।
বাংলাদেশৰ বৈদেশিক মন্ত্ৰালয়ে ২৫ জানুৱাৰী, দেওবাৰে এক বিবৃতি যোগে জনায় যে শ্বেখ হাছিনাৰ এই কাৰ্যই কেৱল কূটনৈতিক নীতি-নিয়মেই উলংঘা কৰা নাই, বৰঞ্চ ই “বাংলাদেশৰ জনসাধাৰণ আৰু চৰকাৰৰ প্ৰতি এক মুকলি অপমান”। মন্ত্ৰালয়ৰ মতে, ভাৰতৰ মাটিত বহি দিয়া এনে ভাষণে বাংলাদেশৰ গণতান্ত্ৰিক পৰিৱৰ্তনৰ প্ৰতি ভাবুকি কঢ়িয়াই আনিছে, যাৰ প্ৰভাৱ ভৱিষ্যতে দুই দেশৰ দ্বিপাক্ষিক সম্পৰ্কৰ ওপৰত পৰিব পাৰে।
উল্লেখ্য যে ২০২৪ চনৰ আগষ্ট মাহত ছাত্ৰ আন্দোলনৰ পৰিপ্ৰেক্ষিতত ক্ষমতা হেৰুৱাই ভাৰতত আশ্ৰয় লোৱাৰ পিছত শুকুৰবাৰে শ্বেখ হাছিনাই প্ৰথমবাৰৰ বাবে ৰাজহুৱাভাৱে সংবাদমেল সম্বোধন কৰে। দিল্লীৰ ‘ফৰেইন ক’ৰেচপনডেন্টছ ক্লাব’ত (Foreign Correspondents’ Club) অনুষ্ঠিত এই সংবাদমেলত তেওঁ অন্তৱৰ্তীকালীন চৰকাৰৰ মুখ্য উপদেষ্টা ড° মহম্মদ ইউনুছক “ধন সৰবৰাহকাৰী” আৰু “লুটপাতকাৰী” বুলি তীব্ৰ সমালোচনা কৰে। লগতে তেওঁৰ দলে ১২ ফেব্ৰুৱাৰীত হ’বলগীয়া নিৰ্বাচন সম্পূৰ্ণ বৰ্জন কৰিব বুলিও ঘোষণা কৰে।
ইফালে বাংলাদেশে অভিযোগ কৰিছে যে শ্বেখ হাছিনাই নিজৰ সমৰ্থকসকলক নিৰ্বাচনৰ সময়ত হিংসাত্মক কাৰ্য সংঘটিত কৰিবলৈ উচটনি দিছে। উল্লেখ্য যে, জুলাই-আগষ্ট মাহৰ আন্দোলনৰ সময়ত সংঘটিত হত্যাকাণ্ডৰ বাবে ঢাকাস্থিত আন্তঃৰাষ্ট্ৰীয় অপৰাধ ন্যায়াধিকৰণে হাছিনাক ইতিমধ্যে (অনুপস্থিতিত) মৃত্যুদণ্ড বিহিছে। মহম্মদ ইউনুছৰ চৰকাৰে হাছিনাক ভাৰতৰ পৰা প্ৰত্যাৰ্পণ কৰিবলৈ দাবী জনাই আহিছে যদিও নতুন দিল্লীয়ে এতিয়াও এই আবেদনৰ ওপৰত কোনো চূড়ান্ত সিদ্ধান্ত গ্ৰহণ কৰা নাই।
ভাৰত আৰু বাংলাদেশৰ সম্পৰ্ক বৰ্তমান অধিক জটিল হৈ পৰিছে কাৰণ, বাংলাদেশেত হিন্দু আৰু অন্যান্য সংখ্যালঘুৰ ওপৰত চলা হিংসাৰ ঘটনাক ভাৰতে ধাৰাবাহিকভাৱে সমালোচনা কৰি আহিছে। আইপিএলৰ পৰা মুস্তাফিজুৰ ৰহমানক অপসাৰণ কৰা আৰু নিৰাপত্তাজনিত উদ্বেগৰ বাবে বাংলাদেশে ভাৰতত অনুষ্ঠিত হ’বলগীয়া পুৰুষৰ টি-২০ বিশ্বকাপৰ পৰা আঁতৰি আহিছে। তদুপৰি, ফেব্ৰুৱাৰীত হ’বলগীয়া নিৰ্বাচনত বাংলাদেশ জাতীয়তাবাদী দল (BNP) আৰু জামাত-ই-ইছলামীৰ মিত্ৰজোঁটক নিৰ্বাচনী দৌৰত আগশাৰীৰ বুলি ধাৰণা কৰা হৈছে।
বাংলাদেশ চৰকাৰে স্পষ্ট কৰি দিছে যে চুবুৰীয়া দেশ হিচাপে ভাৰতে সাৰ্বভৌমত্বৰ প্ৰতি সন্মান জনাই হাছিনাক এনে উত্তেজক মন্তব্য দিয়াৰ পৰা বিৰত ৰখা উচিত।
