ভাৰতৰ ৰাজধানী নতুন দিল্লীত বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই সম্বোধন কৰা এখন ভাৰ্চুৱেল সংবাদমেলক লৈ তীব্ৰ ক্ষোভ প্ৰকাশ কৰিছে বাংলাদেশ চৰকাৰে। বুধবাৰে বাংলাদেশৰ বৈদেশিক পৰিক্ৰমা মন্ত্ৰালয়ে এক বিবৃতি যোগে ভাৰত চৰকাৰৰ এই কাৰ্যত গভীৰ আক্ষেপ প্ৰকাশ কৰাৰ লগতে ই দুয়োখন দেশৰ দ্বিপাক্ষিক সম্পৰ্কত বিৰূপ প্ৰভাৱ পেলাব পাৰে বুলি সকীয়াই দিছে। বাংলাদেশে বাৰে বাৰে শ্বেখ হাছিনাক প্ৰত্যৰ্পণ কৰিবলৈ অনুৰোধ জনোৱাৰ পিছতো ভাৰতৰ পৰা কোনো সঁহাৰি লাভ নকৰা বুলিও ক্ষোভ প্ৰকাশ কৰিছে।
২০২৪ চনৰ ৫ আগষ্টত ছাত্ৰ-জনতাৰ বৃহৎ আন্দোলনৰ ফলত দেশ এৰি ভাৰতত আশ্ৰয় লোৱাৰ পাছত এইখনেই আছিল নতুন দিল্লীৰ পৰা শ্বেখ হাছিনাই আয়োজন কৰা তেওঁৰ প্ৰথমখন ভাৰ্চুৱেল সংবাদ মেল, য’ত তেওঁ সংবাদ মাধ্যমৰ সৈতে পোনপটীয়াকৈ বৰ্তালাপ কৰে। এই ভাৰ্চুৱেল অনুষ্ঠানটো কেৱল শ্ৰাব্য আছিল আৰু উপস্থিত লোকসকলে প্ৰাক্তন প্ৰধানমন্ত্ৰীগৰাকীক দেখাৰ পৰিৱৰ্তে কেৱল তেওঁৰ মাতহে শুনিবলৈ পাইছিল। সংবাদমেলতেই তেওঁ দেশখনক পুনৰ সঠিক দিশলৈ ঘূৰাই আনিবলৈ চলিত বৰ্ষৰ ডিচেম্বৰ মাহত বাংলাদেশলৈ উভতি যোৱাৰ সংকল্প ব্যক্ত কৰি কয় যে যিকোনো পৰিণতি, গ্ৰেপ্তাৰ বা জীৱনৰ প্ৰতি ভাবুকি আহিলেও তেওঁ তাক সন্মুখীন হ’বলৈ সাজু। ইপিনে, ভাৰতৰ বৈদেশিক পৰিক্ৰমা মন্ত্ৰালয়ে এই অনুষ্ঠানটো এক ব্যক্তিগত সংবাদ মাধ্যমে আয়োজন কৰা বুলি স্পষ্ট কৰি দি ইয়াত ভাৰত চৰকাৰৰ কোনো ভূমিকা নাই বুলি প্ৰকাশ কৰিছে।
বাংলাদেশৰ বৈদেশিক মন্ত্ৰালয়ে জানিবলৈ দিয়া মতে, এই সংবাদমেলৰ ফলত উদ্ভৱ হ’ব পৰা পৰিস্থিতি আৰু দ্বিপাক্ষিক সম্পৰ্কৰ ওপৰত পৰিব পৰা প্ৰভাৱৰ বিষয়ে ভাৰত চৰকাৰক পূৰ্বেই অৱগত কৰা হৈছিল। ইয়াৰ পিছতো অনুষ্ঠানটো অনুষ্ঠিত হ’বলৈ দিয়া কাৰ্যই বাংলাদেশৰ জনসাধাৰণৰ আৱেগত আঘাত সনাৰ লগতে চুবুৰীয়া দেশখনৰ সৈতে গঢ়ি উঠা সুসম্পৰ্কৰ প্ৰতি ভাবুকি কঢ়িয়াই আনিছে বুলি মন্ত্ৰালয়ে অভিযোগ কৰিছে। জুলাই বিপ্লৱৰ দ্বিতীয় বাৰ্ষিকী পালন কৰা দিনটোৰেই এই ঘটনা ঘটাত ইয়াক বাংলাদেশৰ সাৰ্বভৌমত্বৰ প্ৰতি আঘাত আৰু বিপ্লৱৰ ছহিদসকলৰ প্ৰতি চৰম অপমান বুলি মন্ত্ৰালয়ে অভিহিত কৰিছে। লগতে বিবৃতিটোত কোৱা হৈছে যে বাংলাদেশে সাৰ্বভৌম সমতা, পাৰস্পৰিক সন্মান আৰু ইখনে সিখনৰ আভ্যন্তৰীণ বিষয়ত হস্তক্ষেপ নকৰাৰ নীতিৰ ভিত্তিত ভাৰতৰ সৈতে এক গঠনমূলক আৰু পাৰস্পৰিক লাভালাভৰ সম্পৰ্ক বজাই ৰাখিব বিচাৰে।
২০১৩ চনত স্বাক্ষৰিত ভাৰত-বাংলাদেশ প্ৰত্যৰ্পণ চুক্তিৰ অধীনত শ্বেখ হাছিনাক বাংলাদেশলৈ ঘূৰাই পঠিওৱাৰ বাবে ঢাকাই জনোৱা অনুৰোধৰ ভাৰতে এতিয়ালৈকে কোনো সঁহাৰি নিদিয়াত বৈদেশিক মন্ত্ৰালয়ে গভীৰ নিৰাশা ব্যক্ত কৰিছে। উল্লেখযোগ্য যে, ২০২৪ চনৰ আন্দোলনৰ সময়ত চৰকাৰৰ বৰ্বৰ নিৰ্যাতন আৰু মানৱতাৰ বিৰুদ্ধে অপৰাধৰ অভিযোগত যোৱা নৱেম্বৰ মাহত ঢাকাৰ এখন বিশেষ ন্যায়াধীকৰণে হাছিনাক অনুপস্থিতিতে মৃত্যুদণ্ডৰ নিৰ্দেশ দিছিল। তাৰ পিছৰে পৰা প্ৰাক্তন প্ৰধানমন্ত্ৰীগৰাকীক আইনী প্ৰক্ৰিয়াৰ সন্মুখীন কৰোৱাৰ বাবে বাংলাদেশে ভাৰতক অহৰহ দাবী জনাই আহিছে।
ভাৰতৰ পৰা শ্বেখ হাছিনাই কৰা এনে মন্তব্যক বাংলাদেশৰ সাৰ্বভৌমত্বৰ প্ৰতি অপমান আৰু জুলাই বিপ্লৱত প্ৰাণ আহুতি দিয়া ছহিদসকলৰ প্ৰতি চৰম তাচ্ছিল্য বুলি অভিহিত কৰি ঢাকা বৰ্তমানো হাছিনাৰ প্ৰত্যৰ্পণৰ দাবীত অটল আছে, যাৰ ফলত বৰ্তমান দুয়োখন দেশৰ কূটনৈতিক স্থিতি যথেষ্ট স্পৰ্শকাতৰ হৈ পৰিছে।
