ভাৰতীয় ক্ৰিকেট দলৰ প্ৰাক্তন তাৰকা বেটাৰ শিখৰ ধাৱানে পুনৰবাৰ জীৱনৰ নতুন ইনিংছ আৰম্ভ কৰিছে। দীৰ্ঘদিনীয়া প্ৰেমিকা ছফী শ্বাইনৰ সৈতে এক ব্যক্তিগত অনুষ্ঠানৰ জৰিয়তে তেওঁ বিবাহপাশত আবদ্ধ হয়। এই শুভ বিবাহৰ খবৰ আৰু ফটোসমূহ ধাৱানৰ সতীৰ্থ ক্ৰিকেটাৰ যুজবেন্দ্ৰ চাহালে ছ’চিয়েল মিডিয়াত শ্বেয়াৰ কৰিছে। চাহালে ইনষ্টাগ্ৰামত বন্ধুৰ বিয়াৰ ফটো দি অতি আৱেগিকভাৱে শুভকামনা জনাইছে। প্ৰায় এবছৰতকৈও অধিক সময় ধৰি প্ৰেমৰ সম্পৰ্কত থকা এই দম্পতীহালে যোৱা ২০২৫ চনৰ মে’ মাহত নিজৰ সম্পৰ্কৰ কথা ৰাজহুৱা কৰিছিল। ইয়াৰ পূৰ্বে ১২ জানুৱাৰীত তেওঁলোকে আঙুঠি পিন্ধোৱা পৰ্ব সম্পন্ন কৰিছিল আৰু তেতিয়াৰে পৰা অনুৰাগীসকলে তেওঁলোকৰ বিয়ালৈ অপেক্ষা কৰি আছিল।
২০২৫ চনৰ চেম্পিয়নছ ট্ৰফীৰ সময়ত ডুবাইত শিখৰ আৰু ছফীক একেলগে প্ৰথমবাৰৰ বাবে দেখা গৈছিল। সংবাদ মাধ্যমৰ সৈতে হোৱা কথা-বতৰাত ধাৱানে তেতিয়াই পুনৰবাৰ প্ৰেম বিচাৰি পোৱাৰ ইংগিত দিছিল। বিয়াৰ মূল অনুষ্ঠানৰ এদিন পূৰ্বে অৰ্থাৎ ২০ ফেব্ৰুৱাৰীত তেওঁলোকৰ হালদী অনুষ্ঠান অতি ধুমধামেৰে উদযাপন কৰা হয় আৰু ছফীয়ে নিজেই এই আনন্দৰ মুহূৰ্তবোৰ ছ’চিয়েল মিডিয়াত শ্বেয়াৰ কৰে। ছফী শ্বাইন পেচাত এগৰাকী আইৰিছ প্ৰডাক্ট কনচালটেণ্ট। বৰ্তমান তেওঁ আমেৰিকাৰ এক আগশাৰীৰ বিত্তীয় প্ৰতিষ্ঠানত উচ্চ পদত কৰ্মৰত হৈ আছে। জানিব পৰা মতে ডুবাইত থকাৰ সময়তে ধাৱানৰ সৈতে তেওঁৰ পৰিচয় হৈছিল।
শিক্ষাগত দিশৰ পৰা ছফী এগৰাকী অতি মেধাৱী মহিলা। তেওঁ আয়াৰলেণ্ডৰ লিমেৰিক ইনষ্টিটিউট অৱ টেকন’লজিৰ পৰা মাৰ্কেটিং এণ্ড মেনেজমেণ্টৰ ডিগ্ৰী লাভ কৰিছে। শিখৰ ধাৱানৰ এয়া দ্বিতীয়খন বিবাহ। ইয়াৰ পূৰ্বে ২০১১ চনত তেওঁ ঈশা মুখাৰ্জীক বিয়া কৰাইছিল যদিও ২০২৩ চনত তেওঁলোকৰ ১১ বছৰীয়া দাম্পত্য জীৱনৰ অন্ত পৰে। প্ৰথম বিবাহ বিচ্ছেদৰ সময়ত ধাৱানে মানসিকভাৱে যথেষ্ট কঠিন সময় পাৰ কৰিবলগীয়া হৈছিল বুলি আদালতে উল্লেখ কৰিছিল। বিশেষকৈ তেওঁৰ পুত্ৰ জোৰাভাৰৰ পৰা আঁতৰত থাকিবলগীয়া হোৱা কথাই তেওঁক মৰ্মাহত কৰিছিল। এতিয়া সকলো পুৰণি দুখ পাহৰি ধাৱানে ছফীৰ সৈতে এক নতুন সুখৰ জীৱন আৰম্ভ কৰিছে।
