অসমৰ প্ৰাণৰ শিল্পী জুবিন গাৰ্গৰ মৃত্যুত এক চাঞ্চল্যকৰ ঘটনাৰ দিশ উঠি আহিছে। কিয়নো ছিংগাপুৰত য়ট ভ্ৰমণৰ সময়ত শ্যামকানু মহন্ত আৰু সিদ্ধাৰ্থ শৰ্মাই শিল্পীগৰাকীক বিষাক্ত দ্ৰব্য খুৱাই তেওঁৰ মৃত্যুক পানীত ডুবি ঘটা দুৰ্ঘটনাজনক মৃত্যু বুলি প্ৰদৰ্শন কৰাৰ অভিযোগত সিদ্ধাৰ্থ শৰ্মাক আৰক্ষীয়ে গ্ৰেপ্তাৰ কৰিছে।
ভাৰতীয় নগৰিক সুৰক্ষা সংহিতাৰ ১৭৫ নং ধাৰাত লিপিবদ্ধ কৰা এক ভায্যত বাদ্যয়ন্ত্ৰী শেখৰ জ্যোতি গোস্বামীয়ে অভিযোগ কৰিছে যে সিদ্ধাৰ্থ শৰ্মা আৰু শ্যামকানু মহন্তই ভুক্তভোগীক বিষাক্ত দ্ৰব্য খুৱাইছিল আৰু নিজৰ ষড়যন্ত্ৰ লুকুৱাবলৈ ইচ্ছাকৃতভাৱে বিদেশৰ স্থান বাছি লৈছিল।
এই বিস্ফোৰক সাক্ষ্যই অপৰাধমূলক ষড়যন্ত্ৰ, হত্যা, আৰু অপৰাধমূলক হত্যাৰ অভিযোগত সিদ্ধাৰ্থ শৰ্মাক গ্ৰেপ্তাৰ কৰাৰ বাট মুকলি কৰে। মুখ্যমন্ত্ৰীৰ বিশেষ তদাৰকী কোষৰ জ্যেষ্ঠ আৰক্ষী অধীক্ষক ডাঃ ৰ’জী কলিতাৰ স্বাক্ষৰিত গ্ৰেপ্তাৰৰ কাৰণত সেইকথা বিতংভাৱে উল্লেখ কৰা হৈছে।
ছিংগাপুৰৰ পান পেচিফিক হোটেলৰ ৩০১০ নং কোঠাত সিদ্ধাৰ্থ শৰ্মাৰ সৈতে থকা শেখৰ গোস্বামীয়ে দাবী কৰে যে জুবিনৰ মৃত্যুৰ পূৰ্বেই তেওঁৰ মৃত্যুক দুৰ্ঘটনা বুলি দেখুৱাবলৈ এক ষড়যন্ত্ৰ ৰচনা কৰা হৈছিল। ঘটনাৰ আগৰ কেইদিনত সন্দেহজনক আচৰণ প্ৰত্যক্ষ কৰাৰো তেওঁ অভিযোগ আনিছে।
সাক্ষীৰ বক্তব্যই য়টখনত ঘটা ঘটনাৰ এক ৰহস্যজনক ছবি সন্মুখলৈ আনিছে। তথ্য অনুসৰি সিদ্ধাৰ্থ শৰ্মাই জাহাজখনৰ নাৱিকৰ পৰা বলপূৰ্বকভাৱে নিয়ন্ত্ৰণ জব্দ কৰাৰ ফলত জাহাজখনে মাজ সাগৰত বিপদজনকভাৱে দোলা দি সকলো যাত্ৰীকে বিপদৰ মাজলৈ ঠেলি দিছিল।
জুবিন গাৰ্গে উশাহ ল’বলৈ হাঁহাকাৰ কৰি প্ৰায় ডুব যোৱা আতুৰ মুহূৰ্তবোৰত সিদ্ধাৰ্থ শৰ্মাই “যাব দে, যাব দে” বুলি চিঞৰা শুনা গৈছিল বুলি অভিযোগ উঠিছে।
শেখৰ গোস্বামীৰ আটাইতকৈ প্ৰত্যয়জনক দাবীটো হৈছে জুবিন গাৰ্গৰ সাঁতোৰ ক্ষমতাক কেন্দ্ৰ কৰি। সাক্ষীগৰাকীয়ে জোৰ দি কয় যে গাৰ্গ এজন বিশেষজ্ঞ সাঁতোৰবিদ যিয়ে তেওঁক আৰু অভিযুক্ত দুয়োকে প্ৰশিক্ষণ দিছিল, আৰু সেয়েহে পানীত ডুবি মৃত্যুবৰণ কৰিব নোৱাৰে।
জুবিনৰ যেতিয়া মুখ আৰু নাকত ফেন ওলাবলৈ ধৰিলে, তেতিয়া সিদ্ধাৰ্থই প্ৰয়োজনীয় চিকিৎসাৰ ব্যৱস্থা কৰাৰ পৰিৱৰ্তে ইয়াক এচিড ৰিফ্লাক্স বুলি উলাই কৰি আনসকলক আশ্বস্ত কৰিছিল যে চিন্তাৰ কোনো কাৰণ নাই। আৰক্ষীৰ অভিযোগ যে এই নিষ্ক্ৰিয়তাই জুবিন গাৰ্গৰ অকাল মৃত্যু মাতি আনিছিল।
গ্ৰেপ্তাৰৰ কাৰণত সিদ্ধাৰ্থই ছিংগাপুৰৰ আছাম এছোচিয়েছনৰ প্ৰবাসী ভাৰতীয় সদস্য তন্ময় ফুকনক অকলেই পানীয় যোগান ধৰিব বুলি দাবী কৰি পানীয়ৰ ব্যৱস্থা নকৰিবলৈ নিৰ্দেশ দিয়া বুলিও উল্লেখ আছে।
তদন্তকাৰীৰ মতে প্ৰমাণ নষ্ট কৰাৰ চেষ্টা কৰি সিদ্ধাৰ্থই শেখৰক য়টৰ ভিডিঅ’ কাৰো লগত শ্বেয়াৰ নকৰিবলৈ নিৰ্দেশ দিছিল বুলি অভিযোগ উঠিছে।
আৰক্ষীয়ে কয় যে তেওঁলোকৰ গোচৰটো তদন্তৰ সময়ত সংগ্ৰহ কৰা বস্তুগত প্ৰমাণৰ ওপৰত নিৰ্মিত, য’ত আছে নথিপত্ৰৰ ৰেকৰ্ড, বিত্তীয় লেনদেন, আৰু সাক্ষীৰ বক্তব্য যিয়ে সিদ্ধাৰ্থ শৰ্মাৰ অপৰাধক তুলি ধৰে।
নথিত উল্লেখ কৰা হৈছে যে জুবিন গাৰ্গৰ মৃত্যুৰ আগৰ ঘটনা সন্দৰ্ভত সিদ্ধাৰ্থ শৰ্মাই কোনো সন্তোষজনক ব্যাখ্যা আগবঢ়োৱাত ব্যৰ্থ হৈছে।
