অসমৰ উচ্চ শিক্ষাৰ এক অন্যতম প্ৰাণকেন্দ্ৰ শিৱসাগৰ কলেজ। এচিয়াৰ ভিতৰত সৰ্ববৃহৎ পুখুৰী জয়সাগৰ পুখুৰী পাৰত অৱস্থিত এই শিৱসাগৰ মহাবিদ্যালয়।
২ নৱেম্বৰ ২০২১ তাৰিখে এই মহাবিদ্যালয়ে ৭৫ বছৰত ভৰি দিয়ে। সেই উপলক্ষে অনুষ্ঠিত হয় শিৱসাগৰ মহাবিদ্যালয়ৰ মহাৰজত জয়ন্তী।
আজি এই মহাৰজত জয়ন্তী অনুষ্ঠানত উপস্থিত থাকে অসমৰ মুখ্যমন্ত্ৰী ড০ হিমন্ত বিশ্ব শৰ্মা। অৱশ্যে এই মহাৰজত জয়ন্তী ২ নৱেম্বৰ ২০২১ তাৰিখে অনুষ্ঠিত হোৱাৰ কথা আছিল যদিও বিশেষ কাৰণত এই অনুষ্ঠান ৬ নৱেম্বৰ অৰ্থাৎ আজি অনুষ্ঠিত হয়।
অনুষ্ঠানত এই মহাবিদ্যালয়খনৰ প্ৰতিষ্ঠাপক ফুলনিৰ কবি পদ্মধৰ চলিহা আৰু তেওঁৰ পুত্ৰ পৰাগধৰ চলিহাৰ প্ৰতিমূৰ্তি উন্মোচন কৰা হয়। এই প্ৰতিমূৰ্তি উন্মোচন কৰে মুখ্যমন্ত্ৰী ড০ হিমন্ত বিশ্ব শৰ্মাই।
মুখ্যমন্ত্ৰীয়ে লগতে প্ৰাক্তন অধ্যাপক শৰৎ মহন্ত সোঁৱৰণি মুকলি মঞ্চৰ আধাৰশিলাও স্থাপন কৰে।
মহাৰজত জয়ন্তীৰ লগত সংগতি ৰাখি অনুষ্ঠিত মুকলি সভাত মুখ্যমন্ত্ৰীয়ে শিৱসাগৰ কলেজৰ আন্তঃগাঁথনি উন্নয়ণৰ বাবে পাঁচ কোটি টকা আগবঢ়োৱাৰ কথা ঘোষণা কৰে।
ফুলনি কবি পদ্মধৰ চলিহা আৰু সেউজ কোঁৱৰ পৰাগ চলিহাৰ লগতে বহু বিদ্যানুৰাগী লোকৰ সবল নেতৃত্বত ১৯৪৭ চনৰ ২ নৱেম্বৰত প্ৰতিষ্ঠা হয় শিৱসাগৰ মহাবিদ্যালয়। প্ৰথম অৱস্থাত শিৱসাগৰ চহৰৰ কালিপ্ৰসাদ মেম’ৰিয়েল হলত পাঠদান আৰম্ভ হৈছিল।
১৯৫০ চনৰ নৱেম্বৰ মাহত তেতিয়াৰ বিত্ত মন্ত্ৰী মতিৰাম বৰাই বুৰঞ্জী প্ৰসিদ্ধ জয়সাগৰ পুখুৰী পাৰৰ অটব্য অৰণ্যৰ মাজত শিৱসাগৰ মহাবিদ্যালয়ৰ আধাৰশিলা স্থাপন কৰে আৰু ১৯৫২ চনৰ ছেপ্তেম্বৰ মাহত অসমৰ ভূতপূৰ্ব ৰাজ্যপাল মহামান্য জয়ৰাম দাস দৌলতৰামে শিৱসাগৰ কলেজ চৌহদৰ দুৱাৰ মুকলি কৰে।
তেতিয়াৰ পৰাই অসমৰ উচ্চ শিক্ষাৰ ক্ষেত্ৰত শিৱসাগৰ কলেজে গুৰুত্বপূৰ্ণ ভুমিকা পালন কৰি আহিছে।
শিৱসাগৰ মহাবিদ্যালয়ৰ মহাৰজত জয়ন্তী বৰ্ষজোৰা কাৰ্যসূচীৰে আৰম্ভ হয় আৰু মহাৰজত জয়ন্তীৰ সামৰণি অনুষ্ঠান ২ নৱেম্বৰ ২০২২ ত অন্ত পৰিব।