কৰ্ণাটকৰ মুখ্যমন্ত্ৰী পদ এৰাৰ কেইঘণ্টাৰ ভিতৰতে সিদ্দাৰামাইয়াই নিজৰ ভৱিষ্যতৰ ৰাজনৈতিক স্থিতি স্পষ্ট কৰি দিলে। ৰাষ্ট্ৰীয় ৰাজনীতি অৰ্থাৎ দিল্লীলৈ যোৱাৰ কোনো উদ্দেশ্য নাই বুলি তেওঁ কয়। লগতে তেওঁক ৰাজ্যসভালৈ পঠোৱাৰ প্ৰস্তাৱ নাকচ কৰে। বৰঞ্চ কৰ্ণাটকৰ ৰাজনীতিত সক্ৰিয় হৈ থাকিব বিচৰাৰ কথা স্পষ্টকৈ উল্লেখ কৰিলে কংগ্ৰেছৰ জ্যেষ্ঠ নেতাগৰাকীয়ে।
বৃহস্পতিবাৰে মুখ্যমন্ত্ৰীৰ পদৰ পৰা পদত্যাগ কৰে সিদ্দাৰামাইয়াই। কংগ্ৰেছ নেতৃত্বই তেওঁৰ ঠাইত উপ-মুখ্যমন্ত্ৰী ডি কে শিৱকুমাৰক অনাৰ সিদ্ধান্ত লয়। পুৱা কেবিনেট সদস্যৰ সৈতে হোৱা বৈঠকত সিদ্দাৰামাইয়াই এই সিদ্ধান্তৰ কথা ঘোষণা কৰে। সেই সভাত ডি কে শিৱকুমাৰো উপস্থিত আছিল।
তাত সিদ্দাৰমাইয়াই কয় যে কংগ্ৰেছৰ শীৰ্ষ নেতৃত্বই ডি কে শিৱকুমাৰক পৰৱৰ্তী মুখ্যমন্ত্ৰী হিচাপে বিচাৰে আৰু তেওঁ সেই সিদ্ধান্ত মানি লৈছে। অৱশ্যে ৰাজ্যসভা সন্দৰ্ভত তেওঁৰ মন্তব্যক কেন্দ্ৰ কৰিয়েই আটাইতকৈ ডাঙৰ ৰাজনৈতিক বাৰ্তা আহিছে। সাংবাদিকৰ সন্মুখত সিদ্দাৰামাইয়াই স্পষ্টভাৱে কয় যে, “দলে মোক ৰাজ্যসভালৈ যাবলৈ কৈছিল। কিন্তু মই ক’লোঁ যে নাই। মোৰ ৰাষ্ট্ৰীয় ৰাজনীতিৰ প্ৰতি কোনো আগ্ৰহ নাই। মই ৰাজ্যৰ ৰাজনীতিত সক্ৰিয় হৈ থাকিম।”
ৰাজনৈতিক মহলৰ মতে এই স্থিতিয়ে কংগ্ৰেছৰ কেন্দ্ৰীয় নেতৃত্বক অলপ অস্বস্তিত পেলাব পাৰে। কাৰণ দলীয় সূত্ৰৰ পৰা খবৰ আহিছিল যে নেতৃত্বৰ পৰিৱৰ্তনৰ বিনিময়ত সিদ্দাৰামায়াক কেন্দ্ৰীয় পৰ্যায়ত গুৰুত্বপূৰ্ণ দায়িত্ব আৰু ৰাজ্যসভাৰ আসনৰ প্ৰস্তাৱ দিয়া হৈছিল। কিন্তু শেষত তেওঁ ৰাজ্যৰ ৰাজনীতিত থাকিবলৈ সিদ্ধান্ত লয়।
বিগত এবছৰ ধৰি কৰ্ণাটকৰ মুখ্যমন্ত্ৰী পদক লৈ কংগ্ৰেছৰ ভিতৰত উত্তেজনা সৃষ্টি হৈছে। যদিও ডি কে শিৱকুমাৰৰ অনুগামীসকলে বাৰে বাৰে নেতৃত্বৰ পৰিৱৰ্তনৰ দাবী উত্থাপন কৰিছিল, তথাপিও সিদ্দাৰামাইয়াই নিজৰ স্থিতিত অটল আছিল।
ৰাজনৈতিক পৰ্যবেক্ষকৰ মতে, তামিলনাডু নিৰ্বাচনক মনত ৰাখি সেই সময়ত কংগ্ৰেছ নেতৃত্বই ৰিস্ক ল’ব বিচৰা নাছিল। কিয়নো দক্ষিণ ভাৰতৰ বৃহত্তৰ ৰাজনৈতিক সমীকৰণত কৰ্ণাটকৰ সিদ্দাৰামাইয়াৰ আহিন্দা ভোটবেংকটো গুৰুত্বপূৰ্ণ বুলি বিবেচিত হৈছিল।
অৱশ্যে এতিয়া পৰিস্থিতি সলনি হৈছে। কংগ্ৰেছৰ মতে তামিলনাডু আৰু কেৰালাৰ ৰাজনৈতিক সমীকৰণ এতিয়া ইয়াৰ পক্ষত আছে। ফলত কৰ্ণাটকৰ নেতৃত্ব সলনিৰ সিদ্ধান্ত কাৰ্যকৰী কৰাৰ দিশত আগবাঢ়িছে দলটোৱে। দলীয় সূত্ৰই দাবী কৰিছে যে মঙলবাৰে দিল্লীত ৰাহুল গান্ধীৰ সৈতে প্ৰায় ৩৫ মিনিটৰ বাবে এক ব্যক্তিগত বৈঠকত সিদ্দাৰামাইয়ালৈ এক স্পষ্ট বাৰ্তা প্ৰেৰণ কৰা হৈছিল। তেওঁক কৰ্ণাটকৰ সীমাৰ বাহিৰত বৃহত্তৰ ৰাজনৈতিক ভূমিকা সম্পৰ্কে চিন্তা কৰিবলৈ কোৱা হৈছিল। একে সময়তে তেওঁক আগন্তুক ৰাজ্যসভা নিৰ্বাচনত কৰ্ণাটকৰ তিনিখন আসনৰ ভিতৰত এখন আসনত পঠিয়াবলৈও প্ৰস্তাৱ দিয়া হৈছিল।
সূত্ৰ অনুসৰি ৰাহুল গান্ধীয়ে সিদ্দাৰামাইয়াক জনাইছিল যে এতিয়াৰ পৰা ২০২৮ চনৰ কৰ্ণাটক বিধানসভা নিৰ্বাচন আৰু ২০২৯ চনৰ লোকসভা নিৰ্বাচনৰ কথা মনত ৰাখি সকলো সিদ্ধান্ত ল’ব লাগিব। কিন্তু শেষত কংগ্ৰেছৰ প্ৰবীণ নেতাগৰাকীয়ে ৰাষ্ট্ৰীয় ৰাজনীতিত প্ৰৱেশৰ পথ বাছি লোৱা নাই।
এতিয়া কৰ্ণাটকৰ নতুন ৰাজনৈতিক সমীকৰণৰ ওপৰত লক্ষ্য ৰখা হৈছে। ডি কে শিৱকুমাৰৰ নেতৃত্বত চৰকাৰখন কেনেদৰে আগবাঢ়ে আৰু ৰাজ্যৰ ৰাজনীতিত সিদ্দাৰমাইয়াই কি ভূমিকা পালন কৰিব সেই সন্দৰ্ভত ৰাজনৈতিক মহলত ব্যাপক চৰ্চা চলিছে।
