চৰকাৰে অসমৰ জনসাধাৰণৰ ঘৰে ঘৰে স্মাৰ্ট মিটাৰ স্থাপন কৰাক কেন্দ্ৰ কৰি বিতৰ্ক চলি থকাৰ সময়তেই বিজেপিৰ বিধায়ক সিদ্ধাৰ্থ ভট্টাচাৰ্যৰ এক বক্তব্যই তোলপাৰ লগাইছে ৰাজ্যত।
শেহতীয়াকৈ অসমত চলি আছে স্মাৰ্ট মিটাৰ বিতৰ্ক। ৰাজপথৰ পৰা আৰম্ভ কৰি বিধানসভাৰ মজিয়ালৈকে স্মাৰ্ট মিটাৰৰ বিৰুদ্ধে চলিছে তীব্ৰ প্ৰতিবাদ। কংগ্ৰেছ, আম আদমী পাৰ্টি, ৰাইজৰ দল, কৃষক মুক্তি সংগ্ৰাম সমিতি আদিকে ধৰি বহু সংগঠনে স্মাৰ্ট মিটাৰৰ বিৰোধিতা কৰি ৰাজপথত আন্দোলনৰ কাৰ্যসূচী গঢ়ি তুলিছে।
গৰিষ্ঠসংখ্যক ৰাইজৰ অভিযোগ অনুসৰি, স্মাৰ্ট মিটাৰৰ বাবেই বিদ্যুতৰ মাচুল বেছিকৈ আহিছে। বৰ্ধিত মাচুল পৰিশোধ কৰিব নোৱাৰাৰ বাবেই বিদ্যুৎ বিভাগে কৰ্তন কৰিছে দৰিদ্ৰ ৰাইজৰ বিদ্যুৎ সংযোগ।
ইয়াৰ মাজতেই বিৰোধীৰ সুৰত সুৰ মিলাই স্মাৰ্ট মিটাৰৰ বিৰোধিতা কৰিছে বিজেপি নেতা সিদ্ধাৰ্থ ভট্টাচাৰ্যই। সিদ্ধাৰ্থ ভট্টাচাৰ্যই স্মাৰ্ট মিটাৰৰ বিৰোধিতা কৰাৰ পিছতেই প্ৰতিক্ৰিয়া প্ৰকাশ কৰিছে সাংসদ অজিৎ কুমাৰ ভূঞাই।
অজিৎ কুমাৰ ভূঞাই ফেচবুকত লিখিছে, “সিদ্ধাৰ্থ ভট্টাচার্য কোনো সাধাৰণ হোজা গ্ৰাহক নহয়, তেওঁ শাসকীয় বিজেপি দলৰ এজন প্ৰাক্তন মন্ত্ৰী আৰু বৰ্তমানৰ শাসকীয় দলৰ বিধায়ক যিয়ে অসম চৰকাৰ আৰু এপিডিচিএলক নিয়ম উলংঘা কৰি স্মার্ট মিটাৰ স্থাপন কৰাৰ বাবে নিন্দা কৰিছে।”
লগতে ভূঞাই লিখিছে, “মুখ্যমন্ত্ৰী পৰিয়ালৰ সদস্যৰ বাণিজ্যিক আৰু ঔদ্যোগিক প্ৰতিষ্ঠানসমূহত স্মাৰ্ট প্ৰি-পেইড মিটাৰ লগোৱা হৈছে নে নাই সেই বিষয়ে জনাটো অসমৰ ৰাইজৰ অধিকাৰ আছে। কিন্তু সমগ্ৰ ৰাজ্যৰ যিসমূহ চৰকাৰী কাৰ্যালয় আৰু উদ্যোগত প্ৰি-পেইড স্মাৰ্ট মিটাৰ স্থাপন কৰা হৈছে সেই সংখ্যা প্ৰকাশ কৰিবলৈ চৰকাৰে কিয় ভয় খাইছে ?”
এতিয়া অজিৎ কুমাৰ ভূঞা আৰু সিদ্ধাৰ্থ ভট্টাচাৰ্যৰ মন্তব্যৰ পিছত যেন স্মাৰ্ট মিটাৰৰ বিৰুদ্ধে অধিক জনমত গঢ় লৈ উঠিছে। এই দুই নেতাৰ মন্তব্যক কেন্দ্ৰ কৰি পুনৰ তীব্ৰ হৈ পৰিছে স্মাৰ্ট মিটাৰবিৰোধী প্ৰতিক্ৰিয়া, প্ৰতিবাদ।
