‘’প্ৰাক্তন কাৰিকৰী বিভাগৰ ইঞ্জিনিয়াৰসকলে কৰা সমালোচনা সমিচীন নহয়।‘‘ বৃহস্পতিবাৰে জিএমচিএইচত পানীৰ এটিএম আৰু বায়’ টয়লেটৰ উন্মোচন কৰি গুৱাহাটী উন্নয়ন বিভাগৰ মন্ত্ৰী সিদ্ধাৰ্থ ভট্টাচাৰ্য্যই প্ৰাক্তন কাৰিকৰী অভিযন্তাসকলক উদ্দেশ্যি এইদৰে কয়।
উল্লেখ্য যে প্ৰাক্তন কাৰিকৰী অভিযন্তাসকলে বুধবাৰে সংবাদ মাধ্যমত পানীৰ এটিএমৰ বিষয়টো সমালোচনা কৰি বহু মন্তৱ্য কৰিছিল আৰু তাৰ পাছতেই এনেদৰে প্ৰাক্তন কাৰিকৰী অভিযন্তাসকলৰ বিৰুদ্ধে জাঙুৰ খাই উঠে গুৱাহাটী উন্নয়ন বিভাগৰ মন্ত্ৰী সিদ্ধাৰ্থ ভট্টাচাৰ্য্যই।
আনহাতে, উদ্দেশ্যপ্ৰণোদিতভাৱে বিকৃত কৰি ৰাইজৰ আগত বাতৰি যোগান ধৰাটো সমিচীন নহয় তথা ৰাইজৰ হিতৰ বাবে নহয় বুলিও তেওঁ সংবাদ মাধ্যমৰ আগত কয়।
মন্ত্ৰীগৰাকীৰ মতে ‘’তেখেতসকল এতিয়া চিন্তিত হৈছে নেকি যে ৰাইজে বটলৰ পানী নোখোৱা হ’ব। তেওঁলোকতো এসময়ত অভিযন্তা আছিল। জনস্বাস্থ্য কাৰিকৰী বিভাগত যেতিয়া কাম কৰিছিল, তেতিয়া কিমান প্ৰকল্প তেওঁলোকে ধ্বংস কৰিছে, কিমান প্ৰকল্প তেওঁলোকে নিৰ্মাণ কৰিছে। ‘’
তাৎপয্যপূৰ্ণভাৱে মন্ত্ৰীগৰাকীয়ে প্ৰাক্তন অভিযন্তাসকলক তেওঁলোকে প্ৰকাশ কৰা কথাবোৰ প্ৰমাণ কৰি দেখুৱাবৰ বাবে প্ৰত্যাহ্বান জনায় লগতে সকীয়াই দিয়ে এইদৰে ‘যদি নোৱাৰে তেন্তে জনসাধাৰণক বিপথে পৰিচালনা কৰিব পৰা বাতৰি যাতে তেওঁলোকে প্ৰকাশ নকৰে।‘
তেওঁ লগতে কয় যে মানুহক সমালোচনা কৰিব লাগে বুলিয়ে সমালোচনা কৰাটো সঠিক নহয়। ইয়াৰোপৰি মানুহে যদি ভাল পানী পায়, তেন্তে সমালোচকসকলৰ অসুবিধা কি? এইদৰে প্ৰশ্ন কৰে মন্ত্ৰীগৰাকীয়ে।
আনহাতে, সাধাৰণ পানী বটলৰ পানী পৰিশোধন কৰাটো যি পদ্ধতি, এই এটিএমৰো একেই পদ্ধতি বুলি উল্লেখ কৰি মন্ত্ৰীগৰাকীয়ে কয় যে পাৰ্থক্য ইয়াতেই মাত্ৰ সাধাৰণ পানী বটলৰ মূল্য ২০ টকা, এইবোৰৰ ৪ টকা।
ইয়াৰোপৰি সমালোচনা মূৰ পাতি ল’ব নোখোজা মন্ত্ৰীগৰাকীয়ে অভিযন্তাসকলক উদ্দেশ্যি কয়, ‘’তেওঁলোকৰ পানী বটল নিৰ্মিত কাৰখানাৰ সৈতে বুজাপৰা আছে নেকি, সেইকাৰণে তেওঁলোকে চৰকাৰৰ এই ব্যৱস্থাটোক সমালোচনা কৰিছে।‘’
আনহাতে, গুৱাহাটী উন্নয়ন সমিতিৰ সাধাৰণ সম্পাদক বীৰেন শৰ্মাই মন্ত্ৰীগৰাকীয়ে এইদৰে কোৱাটো উচিত নহয় বুলি নৰ্থ ইষ্ট নাওৰ আগত মন্তব্য কৰে।
তেওঁ নৰ্থ ইষ্ট নাওৰ আগত কয়, ‘’মন্ত্ৰীগৰাকীৰ কথা-বাৰ্তাত স্বৈৰাচাৰী মনোভাৱ ফুটি উঠিছে। পানী এটিএমৰ সিদ্ধান্তটো জনসাধাৰণৰ বিৰুদ্ধে লোৱা সিদ্ধান্ত।‘’
তদুপৰি ব্যৱসায়িক স্বাৰ্থৰ বাবে গুৱাহাটী উন্নয়ন বিভাগে উক্ত পানী এটিএমৰ সিদ্ধান্ত লোৱা বুলি তেওঁ আমাৰ আগত মন্তব্য কৰে। তেওঁ লগতে কয়, ‘’চৰকাৰে পানী ব্যৱসায়ীকৰণ কৰিছে।‘’
তেওঁৰ মতে ‘’চৰকাৰে ভাল পানী খাব কৈছে, কিন্তু জনসাধাৰণে চৰকাৰক ধন দিব লাগে। যদি বিশুদ্ধ পানী যোগান ধৰিব ইচ্ছা আছে, বিনামূলীয়াভাৱে যোগান ধৰিব নোৱাৰে নেকি?’’
উল্লেখ্য যে, পানী এটিএমৰ সেৱাটো বন্ধ কৰিবৰ বাবে তেওঁ গুৱাহাটী উন্নয়ন বিভাগক দাবী জনোৱাৰ লগতে কয়, ‘’চলিত যি পানী যোগান আঁচনি আছে, সেই পানী যোগান আঁচনিৰ চোৱা-চিতা কৰাৰ ধনেৰে জনসাধাৰণক পানী যোগান ধৰিব লাগে।‘’
