কলকাতাৰ এন আৰ এছ চিকিৎসা মহাবিদ্যালয় হাস্পাতালত কৰ্তব্যৰত প্ৰশিক্ষণ গ্ৰহণ কৰি থকা চিকিৎসক ডা০ পৰিবহ মুখোপাধ্যায়ক বৰ্বৰভাৱে আক্ৰমণৰ ঘটনাক কেন্দ্ৰ কৰি সমগ্ৰ পশ্চিমবংগৰ লগতে দেশৰ অন্যান্য প্ৰান্তত চিকিৎসকসকলৰ দ্বাৰা তীব্ৰ প্ৰতিবাদ সাব্যস্ত কৰাৰ সমান্তৰালভাৱে অসমতো চিকিৎসকৰ ওপৰত কৰা আক্ৰমণৰ ঘটনাৰ বিৰোধিতাৰে প্ৰতিবাদ সাব্যস্ত কৰা হয়।
শুকুৰবাৰে শিলচৰত শিলচৰ চিকিৎসা মহাবিদ্যালয় হস্পাতালৰ স্নাতকোত্তৰ ট্ৰেইনি য়ুনিয়ন, কনিষ্ঠ চিকিৎসক সন্থা আৰু চিকিৎসালয়খনত কৰ্তব্যৰত চিকিৎসক, অধ্যাপকসকলে ক’লকাতাৰ ঘটনাৰ প্ৰতিবাদত ৰাতিপুৱা ১০ বজাৰ পৰা ১২ বজালৈ চিকিৎসা মহাবিদ্যালয়খনৰ বহিঃ বিভাগ বন্ধ ৰাখি বিক্ষোভ প্ৰদৰ্শন কৰে।
প্ৰতিবাদত অংশগ্ৰহণ কৰা এগৰাকী মহিলা চিকিৎসকে সংবাদ মাধ্যমৰ জৰিয়তে চৰকাৰ-প্ৰশাসনক চিকিৎসালয়সমূহতত কৰ্মৰত চিকিৎসকসকলৰ নিৰাপত্তা সুনিশ্চিত কৰাৰ বাবে দাবী জনোৱাৰ লগতে চিকিৎসালয়সমূহক সুৰক্ষিত স্থানলৈ ৰূপান্তৰ কৰাৰ আহ্বান জনায় যাতে তেওঁলোকে নিশ্চিত মনে জনসাধাৰণক সেৱা আগবঢ়াব পাৰে।
শিলচৰ চিকিৎসা মহাবিদ্যালয়ৰ লগতে আজি গুৱাহাটী চিকিৎসা মহাবিদ্যালয়তো চিকিৎসকসকলে অৱস্থান ধৰ্মঘট কাৰ্য্যসূচী ৰূপায়ণ কৰে। মেডিকেল কলেজখনৰ কনিষ্ঠ চিকিৎসকসকলেও বিয়লি ৪:৩০ বজাৰ পৰা দুঘন্টীয়া অৱস্থান ধৰ্মঘটৰ কাৰ্য্যসূচী ৰূপায়ণ কৰে।
চিকিৎসা মহাবিদ্যালখনৰ চৌহদত গ্ৰহণ কৰা অৱস্থান ধৰ্মঘট কাৰ্য্যসূচীৰ জৰিয়তে প্ৰতিবাদী চিকিৎসকসকলে ‘চিকিৎসকক সুৰক্ষা প্ৰদানৰ’ দাবী তোলাৰ লগতে চিকিৎসকক আক্ৰমণকাৰীৰ কঠোৰ শাস্তি দাবী কৰে।
তদুপৰি চিকিৎসা মহাবিদ্যালয়খনৰ কনিষ্ঠ চিকিৎসক, ছাত্ৰ-ছাত্ৰীসকলেও ২ ঘণ্টাৰ বাবে কৰ্মবিৰতিও পালন কৰে।
অৱস্থান ধৰ্মঘটৰ কাৰ্য্যসূচীত অংশগ্ৰহণ কৰি দিগন্ত বৰগোঁহাই নামৰ এগৰাকী কনিষ্ঠ চিকিৎসকে কয় ‘পশ্চিমবংগত ২০০ জন লোকৰ এটা দলে কনিষ্ঠ চিকিৎসকজনক আক্ৰমণ কৰিছিল আৰু বৰ্তমান তেওঁৰ অৱস্থা অতিকৈ সংকটজনক। অসমকে ধৰি দেশৰ বিভিন্ন প্ৰান্তৰ হাস্পতালসমূহত এনেধৰণৰ ঘটনাসমূহ ঘটি থকা দেখিবলৈ পাই আহিছো। এনে ঘটনাসমূহ ঘটি থকাৰ পাছতো কোনো চিকিৎসালয়তে আজিৰ দিনত সুস্থভাৱে কাম কৰাৰ সুযোগ পোৱা নাই। যাৰ ফলত যুৱ চিকিৎসকসকলৰ মাজত হতাশাৰ সৃষ্টি হৈছে।‘
তেওঁ লগতে কয় ‘আজি আমি এক মানৱ শৃংখল গঠন কৰিব বিচাৰিছো। এই বাৰ্তাই জনসাধাৰণৰ মাজলৈ যাব লাগে যে কনিষ্ঠ চিকিৎসকসকলে কমকৈ দৰমহা পোৱাৰ পাছতো নিৰবিচ্ছিন্নভাৱে সেৱা আগবঢ়াইছো। যাতে আমি সুৰক্ষাৰ মাজত থাকি চিকিৎসা সেৱা প্ৰদান কৰিব পাৰো।‘
চিকিৎসকসকলৰ সুৰক্ষাৰ ক্ষেত্ৰত গুৰুত্ব প্ৰদান কৰাৰ দাবীৰে অতি সোনকালে গুৱাহাটী চিকিৎসা মহাবিদ্যালয়ৰ ছাত্ৰ-ছাত্ৰী আৰু কনিষ্ঠ চিকিৎসকৰ স্বাক্ষৰ সম্বলিত এক স্মাৰক পত্ৰ প্ৰধান মন্ত্ৰীলৈ প্ৰেৰণ কৰিব বুলি সংবাদ মাধ্যমক প্ৰতিবাদকাৰীসকলে জানিবলৈ দিয়ে।
ক’লকাতাৰ চিকিৎসকক আক্ৰমণৰ ঘটনাৰ প্ৰতিবাদত বৃহস্পতিবাৰে নতুন দিল্লীৰ এইমছৰ চিকিৎসক সকলে মুৰত হেলমেট পৰিধান কৰি প্ৰতিবাদ সাব্যস্ত কৰে।
আনহাতে, এন আৰ এছ চিকিৎসা মহাবিদ্যালয় হস্পাতালত আক্ৰমণৰ সন্মুখিন হোৱা চিকিৎসক পৰিবহ মুখোপাধ্যায়ৰ স্বাস্থ্য বৰ্তমান ক্ৰমে স্বাভাৱিক অৱস্থালৈ আহিবলৈ আৰম্ভ কৰিছে। শিলেৰে মুৰত আক্ৰমণ কৰাৰ ফলত তেওঁ লাওখোলাত গুৰুতৰভাৱে আঘাত পাইছিল।
কলকাতাৰ চিকিৎসকক আক্ৰমণৰ ঘটনাৰ প্ৰতিবাদত বৃহস্পতিবাৰে নতুন দিল্লীৰ এইমছৰ চিকিৎসকসকলে মুৰত হেলমেট পৰিধান কৰি প্ৰতিবাদ সাব্যস্ত কৰে।
আনহাতে, এন আৰ এছ চিকিৎসা মহাবিদ্যালয় হস্পাতালত আক্ৰমণৰ সন্মুখিন হোৱা চিকিৎসক পৰিবহ মুখোপাধ্যায়ৰ স্বাস্থ্য ক্ৰমে স্বাভাৱিক অৱস্থালৈ আহিবলৈ আৰম্ভ কৰিছে। শিলেৰে মুৰত আক্ৰমণ কৰাৰ ফলত তেওঁ লাওখোলাত গুৰুতৰভাৱে আঘাত পাইছিল।
