২০২১ বৰ্ষৰ পহিলা জানুৱাৰীৰ দিনটোতে ৰাজ্যবাসীলৈ আহিছে এক ভাল খবৰ। ক্ৰমাৎ ধ্বংসৰ গৰাহলৈ গতি কৰা কলিয়াবৰৰ শিলঘাটস্থিত অসম সমবায় মৰাপাট কলে পালে এক নতুন জীৱন।
সম্পূৰ্ণ দুমাহৰ বিৰতিৰ অন্তত পহিলা জানুৱাৰীৰ পুৱাতে উৎপাদনক্ষম হৈ উঠিছে শিলঘাটস্থিত অসম সমবায় মৰাপাট কলে।
কলৰ শ্ৰমিক, বিষয়া-কৰ্মাচাৰী, মৰাপাট ব্যৱসায়ী, অংশীদাৰ তথা কলিয়াবৰীয়া ৰাইজৰ মুখত হাঁহি বিৰিঙাই আজি পুনৰ চকা ঘূৰিল মৰাপাট কলৰ।
২০২১ বৰ্ষৰ পহিলা জানুৱাৰীৰ পৰা পুনৰ উৎপাদন কাৰ্য্য আৰম্ভ কৰা হ’ব বুলি যোৱা ১৮ ডিচেম্বৰত আনুষ্ঠানিক ঘোষণা হোৱাৰ পাছত সকলো জল্পনা-কল্পনা দূৰ কৰি আজি কলিয়াবৰৰ শিলঘাটস্থিত অসম সমবায় মৰাপাট কলৰ উৎপাদন কাৰ্য্য পুনৰ আৰম্ভ হ’ল।
আজি উৎপাদন কাৰ্য্যৰ শুভাৰম্ভণি কৰে ৰাজ্যৰ জল সম্পদ মন্ত্ৰী তথা অসম সমবায় মৰাপাট কলৰ পৰিচালক মণ্ডলীৰ সভাপতি কেশৱ মহন্তই।
২০২০ বৰ্ষৰ ২ নৱেম্বৰ তাৰিখে এক অপ্ৰীতিকৰ পৰিস্থিতিৰ ফলত বন্ধ হৈ পৰিছিল কলটোৰ উৎপাদন কাৰ্য্য।
উল্লেখযোগ্য যে, উৎপাদন বৃদ্ধিৰ বাবে উদ্যোগটোত ১৬ খন শাল, এটা স্পিনিং মেচিন, এটা কপ মেচিন আৰু বিদ্যুৎ শক্তি ব্যাহত নহ’বৰ বাবে এটা উচ্চ ক্ষমতাসম্পন্ন জেনেৰেটৰ নতুনকৈ সংস্থাপন কৰা হৈছিল যদিও দুৰ্ভাগ্যজনকভাৱে ২ নৱেম্বৰৰ পৰা উৎপাদন বন্ধ হৈ পৰিছিল।
অৱশেষত আজি ২০২১ বৰ্ষৰ পহিলা জানুৱাৰীৰ পৰা পুনৰ উৎপাদন কাৰ্য্য আৰম্ভ হোৱাত অসম সমবায় মৰাপাট কলৰ শ্ৰমিক, বিষয়া-কৰ্মাচাৰী, মৰাপাট ব্যৱসায়ী, অংশীদাৰ তথা কলিয়াবৰীয়া ৰাইজৰ মুখত হাঁহি বিৰিঙিল ।
শেহতীয়া কিছুদিনৰ পৰা উদ্যোগটোৱে যথেষ্ঠ ধাৰৰ বোজা ল’বলগীয়া হৈছে। কেচামালৰ বাবে এই কলটোৱে ৯ কোটি টকা ধাৰ পৰিশোধ কৰিবলগীয়া হৈছে। এই বাকী আনাদায়ৰ বাবে বন্ধ হৈ গৈছিল কেচামালৰ যোগান। অৱশেষত অসম চৰকাৰৰ ১০ কোটি টকাৰ অনুদানেৰে মৰাপাট কলটো পুনৰুজ্জীৱিত কৰি তোলা হয়।
ভাৰতৰ সমবায় খণ্ডৰ একমাত্ৰ মৰাপাট কল শিলঘাটৰ অসম সমবায় মৰাপাট কল বন্ধ হৈ পৰাত ইয়াৰ লগত জড়িত প্ৰতিজন লোকক চিন্তিত কৰি তুলিছিল।
জাগীৰোড আৰু কাচাৰৰ কাগজ কলৰ দৰে একেই অৱস্থা হ’ব নেকি তাক লৈ বহুলোকে শংকা প্ৰকাশ কৰিছিল।
এতিয়া কলটোৰ কামকাজ পুনৰ আৰম্ভ হোৱাত শংকা দূৰ হৈছে সেইসকল লোকৰ। বছৰৰ প্ৰথমটো দিনতেই সেয়া অসমৰ বাবে এক ভাল খবৰ বুলি বিবেচিত হৈছে।
