দীৰ্ঘদিন ধৰি কাৰাৰুদ্ধ হৈ থকা কাৰ্বি ছাত্ৰ সন্থাৰ সভাপতি ছিমিউন ৰংফাৰে অৱশেষত লাভ কৰিলে জামিন। কাৰাগাৰৰ পৰা ওলাই আহিয়ে ছাত্ৰ নেতাগৰাকীয়ে বিজেপি দলটোক ফেচিষ্ট তথা একনায়কত্ববাদ আখ্যা দি সংবাদ মাধ্যমৰ আগত সৰৱ হৈ পৰা দেখা যায়।
উল্লেখ্য যে যোৱা ২১ ডিচেম্বৰত গুৱাহাটী উচ্চ ন্যায়ালয়ে ছাত্ৰ নেতাগৰাকীক জামিন প্ৰদান কৰিছিল যদিও চৰকাৰী বন্ধ থকাৰ পৰিপ্ৰেক্ষিতত আজিহে ছাত্ৰ নেতাজনে ডিফু কাৰাগৰৰপৰা মুকলি আকাশৰ তললৈ আহিবলৈ সক্ষম হয়৷
ইফালে ছাত্ৰ নেতাজনক আজি ডিফু কাৰাগাৰৰ পৰা সংগঠনৰ কাৰ্যালয়লৈ সংগঠনটোৰ বিভিন্ন নেতা, সদস্যই বিপুল আদৰিণি জনায়।
সভাপতি ছিমিউন ৰংফাৰে মুকলি আকাশৰ তললৈ আহিয়ে কয়, ‘মোক নিৰবছিন্নভাৱে সহায় কৰি থকা কাৰ্বি ছাত্ৰ সন্থা আৰু অন্যান্য দল-সংগঠনক ধন্যবাদ জ্ঞাপন কৰিছো। যিসকল লোকে মোৰ বাবে সমৰ্থন আগবঢ়াইছিল তেওঁলোককো মই আন্তৰিক ধন্যবাদ জনাইছো’।
উল্লেখ্য যে কাৰ্বি ছাত্ৰ সন্থাৰ সভাপতি ছিমিউন ৰংফাৰে পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ বিৰুদ্ধে অসাংবিধানিক শব্দ প্ৰয়োগৰ অভিযোগ তুলি ৰংহাঙৰ ভাতৃ ৰবিৰাম ৰংহাঙে ডিফু থানাত য়ু/এছ ১৮৯, ১৫৯, ১৫৩,৫০৬, ৫০০, ৫০৪,৫০৫ ধাৰা সন্নিৱিষ্ট কৰি গোচৰ ৰুজু কৰিছিল। আৰু এই গোচৰৰ ভিত্তিতে ১৫ ডিচেম্বৰত আৰক্ষীয়ে ছাত্ৰ নেতাজনক গ্ৰেপ্তাৰ কৰি ডিফু থানালৈ প্ৰেৰণ কৰিছিল।
