লকডাউনৰ সময়ত উদ্ভৱ হোৱা আৰ্থ-সামাজিক সংকট তথা নিম্ন আয়ৰ পৰিয়ালবোৰৰ দুখ দূৰ্দশাৰ লগতে বিভিন্ন সমস্যাৰ দাবীত ৰাজ্যৰ দহটা ৰাজনৈতিক দলৰ উমৈহতীয়া মঞ্চ বাওঁ গণতান্ত্ৰিক মঞ্চ অসমে সমগ্ৰ ৰাজ্যৰ লগতে শিৱসাগৰ জিলা উপায়ুক্তৰ কাৰ্যালয়ৰ সন্মুখত সীমিত সংখ্যক কৰ্মীৰে তথা সামাজিক দূৰত্ব মানি দুঘন্টীয়া এক অৱস্থান ধৰ্মঘট কাৰ্যসূচী পালন কৰে।
তেওঁলোকে আয়কৰ দিব নলগা প্ৰতিটো পৰিয়ালক মাহিলি ৭৫০০ টকা প্ৰদান কৰা, বিভিন্ন স্থানত থকা অসমৰ শ্ৰমিকসকলক বিনামূলীয়া পৰিবহণ, খাদ্যসামগ্ৰী প্ৰদান কৰা, অখিল গগৈক মুক্তি দিয়া, বাঘজানত ক্ষতিগ্ৰস্থ সকলক উপযুক্ত ক্ষতিপূৰণ প্ৰদান কৰা এমজিএনৰেগা আঁচনিত ২০০ দিনৰ কাম আৰু বৰ্দ্ধিত মজুৰি দিয়া, প্ৰতিজন শ্ৰমিকক ছয় মাহৰ বাবে ১০ কেজি কৈ চাউল প্ৰদান কৰা, দিহিং পাটকাইত মুক্ত কয়লা খনন বন্ধ কৰা, ডিব্ৰুচৈখোৱাত হাইড্ৰ’ কাৰ্বনৰ জৰীপ চলোৱা বন্ধ কৰা তথা বৃহৎ নদী বান্ধৰ কাম শীঘ্ৰে বন্ধ কৰাৰ দাবী তোলে।
চি পি আই ৰাষ্ট্ৰীয় পৰিষদৰ সদস্য কনক গগৈয়ে দাবীসমূহৰ ব্যাখ্যা আগবঢ়াই কেন্দ্ৰীয় চৰকাৰৰ জনবিৰোধী নীতি সমূহক সমালোচনা কৰি প্ৰত্যাহাৰ কৰিবলৈ আহ্বান জনায়।
বিক্ষোভকাৰী সকলে জিলা উপায়ুক্তৰ জৰিয়তে প্ৰধান মন্ত্ৰী আৰু মুখ্য মন্ত্ৰীলৈ এখন সাতদফীয়া স্মাৰকপত্ৰ প্ৰেৰণ কৰে।
আজিৰ এই কাৰ্সূচীত চি পি আই এমৰ নেতা দেৱেন গোহাঁই, কৃষক নেতা যোগেশ বুঢ়াগোহাঁই, মদন বৰুৱা, শ্ৰমিক নেতা সত্যেন্দ্ৰ গগৈ, চি পি আই এমৰ জিলা নেতা অখিল বৰবৰুৱা, ডি ৱাই এফ আই জিলা সম্পাদক চিত্ৰজিৎ গোহাঁই, এ আই এছ এফৰ জিলা নেতা ডানিয়ুব বৰুৱাই অংশগ্ৰহণ কৰা লগতে ভালেকেইজন কৰ্মকৰ্তাই অংশগ্ৰহণ কৰে।
