সৰ্বসাধাৰণ গ্ৰাহক ৰাইজৰ বিভিন্ন সমস্যা আৰু অভাৱ অভিযোগ নীতিগত তথা আইনী পদ্ধতিৰে সমাধান কৰাৰ লগতে জনসাধাৰণৰ মাজত সচেতন বৃদ্ধি কৰাৰ উদ্দেশ্যেৰে সোমবাৰে শিৱসাগৰত সচেতন নাগৰিকৰ এখনি সাধাৰণ সভা অনুষ্ঠিত হয়।
শিৱসাগৰ চহৰৰ ষ্টেশ্যন চাৰিআলিৰ ৰংপুৰ জ্যোতি ক্লাবত অনুষ্ঠিত হোৱা সভাখনত সভাপতিত্ব কৰে জেষ্ঠ সাংবাদিক মণিৰুল ইছলাম বড়াই।এই সভাত বিশিষ্ট শিক্ষাবিদ কাৰ্তিক চন্দ্ৰ দত্ত, সাহিত্যিক প্ৰেম গগৈৰ লগতে গ্ৰাহক অধিকাৰ সন্থাৰ ৰাজ্যিক সমিতিৰ সম্পাদক নৱজ্যোতি চাংমায়ো উপস্থিত থাকি সাধাৰণ নাগৰিক তথা গ্ৰাহকৰ সমস্যাৰ সমাধান, সুৰক্ষা আৰু সচেতনতাৰ বিষয়ে বক্তব্য প্ৰদান কৰে।
সভাত জেষ্ঠ সাংবাদিক অতনু বৰা, ভৈৰৱ মুণ্ডা, মোজাহিদ আলিৰ লগতে অৰূপ বৰুৱাই শিৱসাগৰৰ লগতে অসমৰ বিভিন্ন জিলাত পুঁজিপতি বনিয়া গোষ্ঠীৰ দ্বাৰা সাধাৰণ গ্ৰাহকসকল প্ৰৱঞ্চিত হৈ অহা বুলি নিজৰ ভাষণ প্ৰসংগত এইদৰে অভিযোগ উত্থাপন কৰা দেখা যায়।
উল্লেখযোগ্য যে এই সভাতে গ্ৰাহক অধিকাৰ সন্থাৰ শিৱসাগৰ সমিতিখন গঠন কৰা হয়। সাহিত্যিক প্ৰেম গগৈক সভাপতি, মণিৰুল ইছলাম বড়া আৰু অতনু বৰাক উপ-সভাপতি, প্ৰাঞ্জল ৰাজগুৰুক সাধাৰণ সম্পাদক, ভৈৰৱ মুণ্ড, মোজাহিদ আলিক যুটীয়া সম্পাদক, ৰাতু কুমাৰ দাস, মুস্তাকুৰ ৰহমান আৰু বিজুমণি চাংমাইক সাংগঠনিক সম্পাদক, সমীৰণ বৰদলৈক কোষাধ্যক্ষ হিচাপে লৈ ৩১ জনীয়া সদস্যৰ গ্ৰাহক অধিকাৰ সন্থাৰ শিৱসাগৰ জিলা সমিতি খন গঠন কৰা হয়।
সভাত হোৱা আলোচনা অনুসৰি নৱ নিৰ্বাচিত সমিতি খনে শিৱসাগৰ জিলাৰ গ্ৰাহক ৰাইজে সন্মুখীন হোৱা বিভিন্ন অসুবিধা আৰু প্ৰৱঞ্চনাৰ সম্পৰ্কত ভৈৰৱ মুণ্ডা ৯৯৫৪৯৭৪৩৩৬ আৰু মোজাহিদ আলি ৯৪৩৫৫১৬৫৫৪ নম্বৰত যোগাযোগ কৰিবলৈ আহ্বান জনোৱা হৈছে।
