২১ জানুৱাৰিত শিৱসাগৰ জিলাত অনুষ্ঠিত হ’বলগীয়া সোণোৱাল কছাৰী আৰু মিচিং স্বায়ত্ব শাসিত পৰিষদৰ নিৰ্বাচনৰ প্ৰয়োজনীয় সকলো প্ৰস্তুতি সম্পূৰ্ণ কৰি তুলিছে শিৱসাগৰ জিলা প্ৰশাসনে।
কাইলৈ অৰ্থাৎ ২১ জানুৱাৰিত ১৭ নং ৰজাবাৰী সমষ্টিত সোণোৱাল কছাৰী স্বায়ত্ব শাসিত পৰিষদৰ নিৰ্বাচন মুঠ ১০ টা ভোট গ্ৰহণ কেন্দ্ৰত অনুষ্ঠিত হ’ব। এই ভোট গ্ৰহণ প্ৰক্ৰিয়াত মুঠ ৪৩৬৮ গৰাকী ভোটাৰে ভোটদান সাব্যস্ত কৰিব। ইয়াৰে ২২১৪ গৰাকী পুৰুষ আৰু ২০৫৪ গৰাকী মহিলা ভোটাৰ। আনহাতে ৩৪ নম দিচাং-দিখৌ মিচিং স্বায়ত্ব শাসিত পৰিষদৰ নিৰ্বাচন ২২ টা ভোট গ্ৰহণ কেন্দ্ৰত অনুষ্ঠিত হ’ব আৰু এই ভোটদান প্ৰক্ৰিয়াত মুঠ ১৬২৩৮ গৰাকী ভোটাৰে ভোটদান কৰিব। ইয়াৰে ৮১৯০ গৰাকী পুৰুষ আৰু ৮০৪৮ গৰাকী মহিলা ভোটাৰ।
এই দুই স্বায়ত্ব শাসিত পৰিষদৰ নিৰ্বাচনৰ ভোট গ্ৰহণ প্ৰক্ৰিয়াত নিয়োজিত অৰক্ষী আৰু অসামৰিক চেক্টৰ-মাণ্ডলিক বিষয়াৰ মাজত পাৰস্পৰিক পৰিচয় আৰু সুসমন্বয় ৰক্ষাৰ বাবে জিলা উন্নয়ন আয়ুক্তৰ দায়িত্বপ্ৰাপ্ত অতিৰিক্ত উপায়ুক্ত নৱাব আল্ আজহাৰ আলিৰ সভাপতিত্বত শনিবাৰে শিৱসাগৰ জিলা উপায়ুক্তৰ কাৰ্যালয়ৰ চুকাফা সভাকক্ষত এখনি সভা অনুষ্ঠিত হয়।
সভাত নিৰ্বাচনৰ প্ৰস্তুতি সম্পৰ্কে সকলো সকলো বিষয়ৰ ওপৰত আলোচনা কৰা হয়। চেক্টৰ আৰু মাণ্ডলিক বিষয়া সকলক তেওঁলোকৰ ভোটগ্ৰহণ কেন্দ্ৰসমূহ আগতিয়াকৈ পৰিদৰ্শন কৰিবলৈ পৰামৰ্শ দিয়ে অতিৰিক্ত উপায়ুক্ত গৰাকীয়ে।
সভাত অতিৰিক্ত আৰক্ষী অধীক্ষক নবীন সিঙে নিৰাপত্তাৰ ক্ষেত্ৰত লব লগীয়া ব্যৱস্থা সম্পৰ্কে কয় যে, প্ৰতিটো ভোটগ্ৰহণ কেন্দ্ৰত এজন কনিষ্টবল, এজন গৃহৰক্ষী জোৱান আৰু তিনিজন গাওঁৰক্ষী বাহিনীৰ জোৱানৰ লগতে অৰ্ধ সামৰিক বাহিনীও মোতায়েন কৰা হব বুলি প্ৰকাশ কৰে।
সোণোৱাল কছাৰী স্বায়ত্ব পৰিষদৰ নিৰ্বাচনত ৩ গৰাকী মাণ্ডলিক বিষয়া, ১০ গৰাকী প্ৰিজাইডিং বিষয়া আৰু ৩৩ গৰাকী প’লিং বিষয়া নিয়োজিত কৰাৰ লগতে মিচিং স্বায়িত্ব শাসিত পৰিষদৰ নিৰ্বাচনত ৩ গৰাকী মাণ্ডলিক বিষয়া, ২২ গৰাকী প্ৰিজাইডিং বিষয়া আৰু ৭০ গৰাকী প’লিং বিষয়া নিয়োজিত কৰা হৈছে।
আনহাতে নিৰ্বাচনী সম্পৰ্কীয় যিকোনো বিষয় বা অভিযোগ থাকিলে আৰক্ষী বিভাগৰ নিয়ন্ত্ৰণ কক্ষৰ ০৩৭৭২ ২২২৮০১ আৰু ৯৪৩৫৫০০৫৯৭ নম্বৰত আৰু জিলা প্ৰশাসনৰ নিয়ন্ত্ৰণ কক্ষৰ ০৩৭৭২ ২২২১৭৭ নম্বৰত যোগাযোগ কৰিব পাৰিব বুলি জনায়।
