সমগ্ৰ ৰাজ্যৰ লগতে আজি শিৱসাগৰৰ বিভন্ন স্থানত সুধাকণ্ঠ ড০ ভূপেন হাজৰিকাৰ সপ্তম মৃত্যু বাৰ্ষিকী উদযাপন কৰা হয়। শিৱসাগৰ জিলা উপায়ুক্ত কাৰ্য্যালয়ৰ চ্যুকাফা ভৱনত জিলা প্ৰশাসনৰ উদ্যোগত অনুষ্ঠিত সভাত উপায়ুক্ত পল্লৱ গোপাল ঝাৰ লগতে উপায়ুক্ত কাৰ্য্যালয়ৰ কৰ্মচাৰী সকলে সুধাকণ্ঠলৈ সশ্ৰদ্ধ প্ৰণিপাত জনায়।
ইয়াৰোপৰি দিখৌপৰীয়া সন্মিলীত যুৱ সংঘৰ উদ্যোগত নগৰৰ দ’লমুখ চাৰিআলিৰ জয়দয়াল খেমকা মাতৃ সেৱা সদনৰ প্ৰাঙ্গণত থকা ভূপেন দাৰ প্ৰতিমূৰ্ত্তিত বন্তি প্ৰজ্বলনেৰে শ্ৰদ্ধাঞ্জলী নিবেদন কৰা হয়। বন্তি প্ৰজ্বলন অনুষ্ঠানত উপস্থিত থাকে শিৱসাগৰ জিলা আৰক্ষী অধীক্ষক সুবোধ সোনোৱাল, অতিৰিক্ত উপায়ুক্ত নৱাব আলহাজ আলি, পৌৰনেত্ৰী মৃদুস্মিতা সিংহা, শিৱসাগৰ কলেজৰ ৰাজনীতি বিভাগৰ মূৰব্বী অধ্যাপক সব্যসাচী মহন্ত, আটাছুৰ মূখ্য উপদেষ্টা অশ্বিনী কুমাৰ চেতিয়াকে ধৰি বহু ব্যক্তি উপস্থিত থাকে।
আনহাতে খোজৰ উদ্যোগত অনুষ্ঠিত হোৱা শিৱসাগৰ গ্ৰন্থ উৎসৱতো ভূপেন হাজৰিকালৈ শ্ৰদ্ধাঞ্জলি জনোৱাৰ লগতে গ্ৰন্থ উৎসৱটোত শিৱসাগৰ আঞ্চলিক ছাত্ৰ সন্থাৰ উদ্যোগত সদৌ অসম ভিত্তিত ভূপেন্দ্ৰ সঙ্গীত প্ৰতিযোগীতা আয়োজন কৰা হৈছে।
