স্বাধীনতা দিৱসলৈ মাজত মাত্ৰ এটা দিন বাকী থকা অৱস্থাত চাৰিওফালে নিৰাপত্তাৰক্ষীয়ে গিজগিজায় থকা অৱস্থাত আজি দিন দুপৰতে শিৱসাগৰৰ ৰাজপথত এজন শিক্ষকক চুৰিকাঘাতৰ ঘটনা সংঘটিত হয়।
উল্লেখযোগ্য যে শিৱসাগৰ চহৰৰ ভূঞা অট’ ম’বাইলৰ সন্মুখত বিদ্যালয়ৰ পৰা আহি থকা অৱস্থাত এগৰাকী শিক্ষকক এজন ৩২ বছৰীয়া যুৱকে চুৰিৰে উপৰ্যুপৰি আঘাত কৰে।
ঘটনাটোত গুৰুতৰভাৱে আহত শিক্ষকজন কৈৱৰ্ত দলনি এম ই স্কুলৰ শিক্ষক আজমল শ্বাহ আলী বুলি জানিব পৰা গৈছে।
আনহাতে যুৱকৰ আক্ৰমণত গুৰুতৰভাৱে আহত শিক্ষকজনে জনোৱা অনুসৰি শিক্ষকজনক ষ্টেচন চাৰিআলিৰ প্ৰয়াত বিমল বৰুৱাৰ পুত্ৰই আক্ৰমণ কৰে।
ব্যক্তিগত শত্ৰুতাৰ বাবেই ঘটনা সংঘটিত হোৱাৰ সম্ভাৱনা বুলি স্থানীয় ৰাইজৰ পৰা জানিব পৰা গৈছে। বৰ্তমান গুৰুতভাৱে আহত শিক্ষক আজমল শ্বাহ আলী শিৱসাগৰ অসামৰিক চিকিৎসালয়ত চিকিৎসা কৰাই উন্নত চিকিৎসাৰ বাবে ডিব্ৰুগড় মেডিকেল কলেজলৈ প্ৰেৰণ কৰা হৈছে।
