নৰ্থইষ্ট নাওৰ পৰা তাৎক্ষণিকভাৱে কাৰ্যকৰী হোৱাকৈ বৰ্খাস্ত কৰা হৈছে দেৱজিৎ ডেকাক। দিছপুৰ আৰক্ষীয়ে গ্ৰেপ্তাৰ কৰাৰ পাছতে নৰ্থইষ্ট নাওৰ পৰা তাৎক্ষণিকভাৱে বৰ্খাস্ত কৰা হৈছে দেৱজিৎ ডেকাক।
মহানগৰীৰ যুৱক বিশ্বজিৎ হাজৰিকাৰ অপৰহণ আৰু হত্যাৰ গোচৰত গ্ৰেপ্তাৰ কৰাৰ পাছতে নৰ্থইষ্ট নাও কৰ্তপক্ষই ভিডিঅ’ এডিটৰৰূপে কৰ্মৰত দেৱজিৎ ডেকাক বৰ্খাস্ত কৰিছে। উল্লেখ্য যে যোৱা ২১ নৱেম্বৰত দেৱজিৎ ডেকাই নৰ্থইষ্ট নাওত ভিডিঅ’ এডিটৰৰূপে যোগদান কৰিছিল।
ইফালে, যোৱা অক্টোবৰৰ পৰা অপহৃত হৈ থকা বিশ্বজিৎ হাজৰিকাৰ অপহৰণ আৰু হত্যাৰ গোচৰত বিশেষ অগ্ৰগতি লাভ কৰা বুলি গুৱাহাটী মহানগৰৰ আৰক্ষীয়ে সদৰী কৰিছে।
মহানগৰ আৰক্ষী আয়ুক্ত দিগন্ত বৰাই সংবাদ মেল সম্বোধন কৰি কয় যে যোৱা ৯ অক্টোবৰত বিশ্বজিৎ হাজৰিকাৰ পিতৃ এধন হাজৰিকাই তেওঁৰ পুত্ৰক কোনো লোকে অপহৰণ কৰি ধনদাবী কৰা বুলি দিছপুৰ আৰক্ষী থানাত এক গোচৰ দাখিল কৰিছিল। প্ৰথমাৱস্থাত আৰক্ষীয়ে বিশ্বজিৎ হাজৰিকাৰ অপহৰণ কাণ্ডৰ কোনো ক্লু লাভ কৰা নাছিল।
কিন্তু, যোৱা ৯ ফেব্ৰুৱাৰীত বিশ্বজিৎ হাজৰিকাৰ পিতৃ এধন হাজৰিকাই পুত্ৰৰ নিৰুদ্দেশ গোচৰৰ তদন্ত সম্পৰ্কত মহানগৰ আৰক্ষী আয়ুক্ত দিগন্ত বৰাক সাক্ষাৎ কৰে। ইয়াৰ পাছতে মহানগৰ আৰক্ষী আয়ুক্তগৰাকীয়ে অপৰাধ শাখাৰ এটা বিশেষ তদন্তকাৰী দল গঠন কৰি গোচৰটো পুনৰীক্ষণৰ দায়িত্ব দিয়ে।
তদন্তকাৰী দলটোৱে ক্লু বিচাৰি পনুৰ তদন্ত আৰম্ভ কৰে। যোৱা ১ নৱেম্বৰত নেলী আৰক্ষীয়ে আমগুৰিৰ কিলিং নদীত উদ্ধাৰ কৰা এটা অচিনাক্ত মৃদেহটো উদ্ধাৰ কৰিছিল। তদন্তকাৰী আৰক্ষী দলটোৱে উক্ত অচিনাক্ত মৃতদেহটোৰ ওপৰত তদন্ত আৰম্ভ কৰি নিশ্চিত হয় যে উক্ত অচিনাক্ত মৃতদেহটো বিশ্বজিৎ হাজৰিকাৰেই আছিল।
ইয়াৰ পাছতে অপৰাধ শাখাৰ আৰক্ষীয়ে ঘটনাৰ সন্দৰ্ভত তদন্ত আগুৱাই নিয়ে আৰু প্ৰণৱ ৰংহাঙক (২৫) সোধপোচ কৰাৰ পাছতে সমগ্ৰ অপৰহণ আৰু হত্যাকাণ্ড পোহৰলৈ আহে।
প্ৰণৱ ৰংহাঙৰ স্বীকাৰোক্তিৰ ভিত্তিতে দিছপুৰ আৰক্ষীয়ে বিশ্বজিৎ হাজৰিকাৰ অপহৰণ আৰু হত্যাকাণ্ডত জড়িত থকাৰ অভিযোগত ঘটনাৰ মাষ্টাৰ মাইণ্ড তথা মৃত বিশ্বজিৎ হাজৰিকাৰ আশৈশৱ বন্ধু অজয় কলিতা (৩০), দেৱজিৎ ডেকা (২৬), সঞ্জয় কুমাৰ ভগত (২৬), পৰশ ছেত্ৰী (২৪) আৰু ময়ুৰ নাথক (২৪) ভাৰতীয় দণ্ডবিধি আইনৰ গোচৰ নং ২২৮৪/২০২২/ U/S ৩৬৫/৩৮৭ অধীনত গ্ৰেপ্তাৰ কৰে।
আৰক্ষীয়ে ঘটনা সন্দৰ্ভত অন্য কেইগৰাকীমান অভিযুক্তকো চিনাক্ত কৰিছে আৰু পৰৱৰ্তী সময়ত গ্ৰেপ্তাৰ কৰা হ’ব বুলিও উল্লেখ কৰিছে।
