২০২৩-২৪ বিত্তীয় বৰ্ষত গুজৰাটৰ ছটা ‘অচিনাকি’ ৰাজনৈতিক দলে ১৭০০.৭৮ কোটি টকাৰ অনুদান লাভ কৰিছে। বিবিচি হিন্দীৰ এক প্ৰতিবেদনত এই কথা প্ৰকাশ পাইছে। এই দলসমূহ নিৰ্বাচন আয়োগত পঞ্জীয়নভুক্ত। কিন্তু তেওঁলোকে ৰাষ্ট্ৰীয় বা ৰাজ্যিক পৰ্যায়ৰ দল হিচাপে ‘স্বীকৃতি’ লাভ কৰিবলৈ নূন্যতম ভোট বা আসন পোৱা নাই।
উক্ত বিত্তীয় বৰ্ষত বিজেপিৰ বাহিৰে পাঁচটা ৰাষ্ট্ৰীয় দল – কংগ্ৰেছ, চিপিএম, আপ, বিএছপি আৰু নেচনেল পিপলছ পাৰ্টিৰ মুঠ আয় আছিল ১,৪৮০.৪৩ কোটি। গুজৰাটৰ এই ছয়টা দলে পাঁচটা ৰাষ্ট্ৰীয় দলৰ মুঠ আয়তকৈ অধিক অনুদান লাভ কৰিছিল। যদিও এই দলসমূহে নির্বাচনত প্রার্থী খুব কম দিছিল৷
প্ৰতিবেদনত কোৱা হৈছে যে এই দলসমূহৰ অধিকাংশ কাৰ্যালয় বন্ধ। বিবিচিৰ প্ৰতিবেদনত এইটোও স্পষ্ট হৈ পৰিছে যে এই দলসমূহৰ বিৰুদ্ধে কোনো ধৰণৰ আৰ্থিক অসৎ আচৰণৰ অভিযোগ উত্থাপন হোৱা নাই। অৱশ্যে এই প্ৰায় অচিনাকি দলবোৰলৈ ইমান বৃহৎ পৰিমাণৰ অনুদান তেওঁলোকে যথেষ্ট ‘অদ্ভুত’ বুলি ধাৰণা কৰে।
বিবিচি হিন্দীৰ এক অনুসন্ধানমূলক প্ৰতিবেদন অনুসৰি এই ছয়টা দলৰ ভিতৰত চাৰিটা দল আহমেদাবাদৰ। ইয়াৰ ভিতৰত ২০২৩-২৪ বিত্তীয় বৰ্ষত আম জনতা পাৰ্টিয়ে সৰ্বাধিক অনুদান লাভ কৰে। সেই বিত্তীয় বৰ্ষত তেওঁলোকে অনুদানৰ পৰা ৬২০ কোটি টকা উপাৰ্জন কৰিছিল। বিগত বিত্তীয় বৰ্ষত তেওঁলোকে লাভ কৰিছিল ২১৬ কোটি টকাৰ অনুদান। বিগত লোকসভা নিৰ্বাচনৰ সময়ত তেওঁলোকে মাত্ৰ এখন আসনতহৈ প্ৰাৰ্থী প্ৰক্ষেপ কৰিছিল।
প্রতিবেদন অনুসৰি ২০২০ চনত বিহাৰৰ পাটনাত এই দলটো গঠন কৰা হৈছিল৷ তেতিয়া অনমিকা পাছোৱানক সভানেত্ৰী হিচাপে নিযুক্তি দিয়া হৈছিল৷ বৰ্তমান তেওঁ বিহাৰ বিজেপিৰ উপ-সভানেত্ৰী। বিবিচিক জনোৱা মতে, দলটো আহমেদাবাদলৈ স্থানান্তৰিত হোৱাৰ পিছত তেওঁ দল ত্যাগ কৰিছে।
ইয়াৰ পিছতে দ্বিতীয় স্থানত আছে সত্যবাদী ৰক্ষক পাৰ্টি। ২০২৩-২৪ বিত্তীয় বৰ্ষত তেওঁলোকে লাভ কৰিছিল ৩৩০.৫৫ কোটি টকাৰ অনুদান। বিগত লোকসভা নিৰ্বাচনতো এখন আসনত প্ৰাৰ্থী প্ৰক্ষেপ কৰিছিল। প্ৰতিবেদন অনুসৰি, লোকসভা নিৰ্বাচনী প্ৰচাৰত দলটোৱে ৮.৪৮ কোটি টকা ব্যয় কৰিছিল। বিভিন্ন জনকল্যাণমূলক কাম-কাজত ব্যয় কৰিছিল ৩১৬ কোটি টকা।
তদুপৰি সেই বছৰত স্বতন্ত্ৰ অভিব্যক্তি পাৰ্টিয়ে ২১৯.৬৯ কোটি, নিউ ইণ্ডিয়া ইউনাইটেড পাৰ্টিয়ে ২০০.৬৯ কোটি, ভাৰতীয় নেশ্যনেল জনতা দলে ১৯১.৬১ কোটি আৰু গৰীব কল্যাণ পাৰ্টিয়ে ১৩৮ কোটি টকা উপাৰ্জন কৰিছিল।
বিবিচিৰ তথ্য অনুসৰি দলৰ অধিকাংশ কাৰ্যালয় বন্ধ আছিল। দলৰ বেছিভাগ নেতাই হয় অনুপলব্ধ নহয় কথা ক’ব বিচৰা নাই। প্ৰতিবেদন অনুসৰি বিগত লোকসভা নিৰ্বাচনত এই ছয়টা দলে মুঠ ১৫ জন প্ৰাৰ্থী প্ৰক্ষেপ কৰিছিল।
দেশত প্ৰায় ২৮০০ ৰাজনৈতিক দল আয়োগত পঞ্জীয়ন হৈ আছে। কিন্তু ‘স্বীকৃতিপ্ৰাপ্ত’ নহয়। ইয়াৰে ৭৩ শতাংশ দলেই নিজৰ বিত্তীয় হিচাপ প্ৰকাশ কৰা নাই। দৰাচলতে যোৱা বছৰ এছ’চিয়েশ্যন ফৰ ডেম’ক্ৰেটিক ৰিফৰ্মে (এডিআৰ) জনাইছিল যে ২০২২-২৩ বিত্তীয় বৰ্ষত এনে পঞ্জীয়নভুক্ত কিন্তু ‘স্বীকৃতিপ্ৰাপ্ত’ নোহোৱা দলৰ আয় ২২৩ শতাংশ বৃদ্ধি পাইছে।
