কা’ বিৰোধী এক বিশাল গণ সমাবেশে কঁপালে শিৱসাগৰ। শুকুৰবাৰৰে পৰা বিভিন্ন জাতীয় দল-সংগঠন একত্ৰিত হৈ পুনৰ আৰম্ভ কৰিলে কা’ বিৰোধী আন্দোলন।
কা’ বিৰোধিতাৰে আৰু অখিল গগৈৰ মুক্তিৰ দাবীৰে শিৱসাগৰত হোৱা বিশাল গণ সমাবেশত বাধা দিবলৈ পুৱাৰে পৰা শিৱসাগৰ আৰক্ষী সষ্টম হৈ আছিল।
সমাবেশলৈ অহা শিৱসাগৰ জিলাৰ বিভিন্ন স্থানৰ হাজাৰ হাজাৰ প্ৰতিবাদকাৰীক আধা বাটতে আবদ্ধ কৰি ৰখাৰ অভিযোগ উঠিছে শিৱসাগৰ আৰক্ষীৰ বিৰুদ্ধে।
গণতান্ত্ৰিক ভাৱে কৰা এই আন্দোলনত আৰক্ষীয়ে বাধা প্ৰদান কৰাত ক্ষুণ্ণ হৈ পৰে দল সংগঠনৰ নেতা কৰ্মীসকল। শিৱসাগৰ আৰক্ষীৰ এনে কাৰ্যক তীব্ৰ সমালোচনা কৰে ছাত্ৰ মুক্তি সংগ্ৰাম সমিতিৰ নেতা মানস কোঁৱৰে।
তেওঁ কয়, শিৱসাগৰ আৰক্ষীয়ে আমাৰ এই সভা বিফল কৰিবলৈ যিমান চেষ্টা নকৰক অসমৰ ৰাইজৰ সংগ্ৰামী সত্তাক বাধা দিব নোৱাৰে। তেওঁ কয় যে ইয়াত অধীক্ষক অমিতাভ সিনাহাৰ দাদাগিৰি নচলিব। ইয়াত অসমীয়া মানুহৰ দাদাগিৰি চলিব।
সভাত অমিতাভ সিনহাক বুঢ়া আঙুলি দেখুৱাই তেওঁ কয়, ‘’সাহস আছে যদি অমিতাভ সিনহাই আমাৰ এই প্ৰতিবাদী সভাখন বন্ধ কৰি দেখুৱাওক’’।
তেওঁ লগতে কয়, ‘’যোৱাবাৰ কা’ বিৰোধী আন্দোলনত অসমীয়া ৰাইজ স্বতঃফূতভাৱে ওলাই আহিছিল। অসমীয়া ৰাইজৰ অংশ গ্ৰহণে এই আন্দোলনক গণ বিদ্ৰোহলৈ ৰূপান্তৰিত কৰিছিল কিন্তু এচামে এই গণ বিদ্ৰোহক গণ অনশনলৈ পৰিণত কৰিলে।‘’
ইতিহাসে তেওঁলোকক কেতিয়াও ক্ষমা নকৰে বুলি মন্তব্য কৰে মানস কোঁৱৰে।
মানস কোঁৱৰে কয় যে পূৰ্বৰ কা’ বিৰোধী আন্দোলন ৰাজপথৰ পৰা খেলপথাৰ পাইছিল। কিন্তু এইবাৰ তেনে নহয়। এইবাৰ কা’ বিৰোধী আন্দোলন ঐতিহাসিক শিৱসাগৰৰ পৰা খেল পথাৰত আৰম্ভ হৈ ৰাজপথলৈ যাব। তেওঁ অখিল গগৈক অতিসীঘ্ৰে মুক্তি দিবলৈ দাবী কৰে।
অৱশ্যে আৰক্ষীৰ বাধা নেওচি কেইবাহাজাৰ প্ৰতিবাদী জনতাই অংশ গ্ৰহণ কৰে কা’ বিৰোধী প্ৰতিবাদী সমদলত। ইয়াৰ দ্বাৰাই অসমৰ জনতাই চৰকাৰক জনায় দিয়ে অসমৰ ৰাইজে কা’ নামানে।
