‘মোৰ মনত ভেদ ভাব নাই ও আল্লা, মোৰ মনত ভেদ ভাব নাই, হিন্দু কি মুছলমান একে আল্লাৰ ফৰমান’ এই জিকিৰ ফাঁকিৰ গূঢ়াৰ্থ মৰ্মে মৰ্মে উপলব্ধি কৰি তামুলপুৰ মহকুমাৰ কুমাৰীকাটা-নাগ্ৰীজুলিৰ সমাজকৰ্মী মিৰজান আলীয়ে হিন্দু-মুছলমানকে ধৰি বিভিন্ন ভাষা-ভাষী, ধৰ্মাৱলম্বী লোকলৈ সহায়ৰ হাত আগবঢ়াইছে।
উল্লেখযোগ্য যে ক’ৰ’না ভাইৰাছ সংক্ৰমণ ৰোধৰ বাবে চৰকাৰে আহ্বান জনোৱা লকডাউনৰ পৰিপ্ৰেক্ষিতত বাক্সা জিলাৰ ভাৰত-ভূটান সীমান্তৰ একাংশ লোকৰ পানীত হাঁহ নচৰা অৱস্থাৰ সৃষ্টি হৈছে। সন্মুখীন হৈছে তীব্ৰ খাদ্য সংকটৰ।
এই সময়তে আন বহুতো হৃদয়বান ব্যক্তিৰ দৰে মিৰজান আলীও থিয় দিছে আৰ্তজনৰ কাষত। লকডাউন আৰম্ভ হোৱাৰে পৰা মিৰজান আলীয়ে সম্ভাৱনা নামৰ স্বেচ্ছাসেৱী সংস্থাৰ বেনাৰত তামুলপুৰ মহকুমাৰ অন্তৰ্গত ভিন্ন স্থানত প্ৰায় ১৭০০ টা পৰিয়াললৈ খাদ্য সামগ্ৰী বিতৰণ কৰে।
মিৰজান আলীয়ে জনোৱা মতে তেওঁ কোঁচ ৰাজবংশী, কলিতা, বড়ো, ৰাভা, মুছলমান, আদিবাসী, নেপালী, বঙালী, হাজং আদিকে ধৰি বিভিন্ন জাতি-জনগোষ্ঠীৰ লোকৰ মাজত এই খাদ্য সামগ্ৰী বিতৰণ কৰে।
এনে দুৰ্যোগপূৰ্ণ মুহূৰ্তত সহায়ৰ হাত আগবঢ়োৱাৰ বাবে মিৰজান আলীক অঞ্চলবাসীয়ে ধন্যবাদ জনায়।
