এই বছৰতে ইতিমধ্যে যোৱা জানুৱাৰি আৰু চলিত মাহত দুবাৰকৈ চন্দ্ৰগ্ৰহণৰ সাক্ষী হোৱাৰ পাছত এইবাৰ বছৰৰ প্ৰথমটো সূৰ্যগ্ৰহণৰ সাক্ষী হ’ব ভাৰতবাসী।
অহা ২১ জুনত হ’বলগীয়া এই বিৰল বলয়গ্ৰাস সূৰ্যগ্ৰহণৰ সময়ছোৱাত আকাশতেই সৃষ্টি হ’ব ৰিং অফ ফায়াৰ (ring of fire)।
অৱশ্যে, ভাৰতৰ সকলো ঠাইতে এই সূৰ্যগ্ৰহণ দেখা পোৱা নাযাব।
২১ জুনৰ বলয় সূৰ্যগ্ৰহণৰ দৃশ্য উত্তৰ ভাৰতৰ বিভিন্ন ঠাইৰ পৰা প্ৰত্যক্ষ কৰিব পৰা যাব।
ভাৰতীয় সময় অনুসৰি ৰাতিপুৱা ৯বাজি ১৫মিনিটত সূৰ্যগ্ৰহণ আৰম্ভ হ’ব আৰু পুৱা ১০ বাজি ১৭মিনিট ৪৫ ছেকেণ্ডলৈ প্ৰায় এঘন্টা সময় ভাৰতৰ বিভিন্ন স্থানৰ পৰা এই সূৰ্যগ্ৰহণ প্ৰত্যক্ষ কৰিব পৰা যাব।
দুপৰীয়া ১২ বাজি ১০ মিনিটলৈ এই গ্ৰহণ চলিব আৰু বিয়লি ২ বাজি ২মিনিটত ইয়াৰ সমাপ্তি ঘটিব।
বছৰৰ এই প্ৰথমটো সূৰ্যগ্ৰহণ ভাৰতৰ উপৰি চীন, পাকিস্তান, ইথিওপিয়া, কংগো তথা আফ্ৰিকাৰ পৰাও দেখা পোৱা যাব। য়ুৰোপ তথা অষ্ট্ৰেলিয়াৰ কিছুমান প্ৰান্তৰ পৰাও এই সূৰ্যগ্ৰহণ দেখা যাব।
ইপিনে, নাছাৰ বিজ্ঞানীসকলে এই সূৰ্যগ্ৰহণ খালী চকুৰে চাবলৈ মানা কৰিছে। তেওঁলোকে ছানগ্লাছৰ সলনি টেলিস্কোপৰ জৰিয়তে সাৱধানতাৰে প্ৰত্যক্ষ কৰাৰ বাবে পৰামৰ্শ দিছে।
বিজ্ঞানীসকলে এই সূৰ্যগ্ৰহণ চোৱাৰ ক্ষেত্ৰত বিশেষ সাৱধানতা অৱলম্বন কৰাৰ কথা দোহাৰিছে।
২১ জুনত হ’বলগীয়া এই সূৰ্যগ্ৰহণ বলয়গ্ৰাস সূৰ্যগ্ৰহণ হ’ব য’ত চন্দ্ৰই সূৰ্যক ঢাকি ধৰিব। কিন্তু চন্দ্ৰৰ আয়তন সৰু হোৱাৰ বাবে সূৰ্যই চন্দ্ৰৰ কাষেৰে ৰশ্মি বিকিৰম কৰিব আৰু ইয়াৰ ফলত আকাশত আঙুঠিৰ দৰে আকৃতি দেখা যাব যাক কোৱা হয় ৰিং অফ ফায়াৰ।
খালী চকুৰে ইয়াক প্ৰত্যক্ষ কৰিলে চকু নষ্ট হোৱাৰ লগতে অন্ধত্ব প্ৰাপ্তিৰো সম্ভাৱনা আছে। সেয়েহে, সম্পূৰ্ণ কাৰিকৰী সাৱধানতা অৱলম্বন কৰিহে ইয়াক প্ৰত্যক্ষ কৰাটো সমীচীন হ’ব।
স্বাভাৱিকতে এই বিৰলপ্ৰায় সূৰ্যগ্ৰহণ প্ৰত্যক্ষ কৰাৰ বাবে বিশ্বৰ মহাকাশ বিজ্ঞানীসকল যথেষ্ট উৎসুক হৈ পৰিছে।