২০২২ চনত বিশ্বৰ ৰাজনৈতিক পট সলনি কৰি দিব পৰাকৈ আন্তঃৰাষ্ট্ৰীয় পৰ্যায়ৰ কেইবাটাও গুৰুত্বপূৰ্ণ ঘটনা ঘটি যায়। বিশ্ব ৰাজনীতিত বৰ্ষটোত চৰ্চিত হৈ পৰা কেইটামান বিশেষ ঘটনা চাওঁ আহক:
১/ পুনৰ আৰম্ভ হয় ৰুছ ইউক্ৰেইনৰ যুদ্ধ। ইউক্ৰেইন বিচাৰি পুটিনে সামৰিক অভিযান চলাই ইউক্ৰেইনত। হাজাৰ হাজাৰ সেনা, সাংবাদিক আৰু সাধাৰণ নাগৰিকৰ প্ৰাণ হানি হয় পুটিনৰ নিৰ্দয় আক্ৰমণত।
২০২২ চনৰ ২৪ ফেব্ৰুৱাৰীত ৰাছিয়াই “বিশেষ সামৰিক অভিযান” আৰম্ভ কৰে ইউক্ৰেইনৰ বিৰুদ্ধে। তেতিয়াৰ পৰা সম্পূৰ্ণ ২০২২ চনটোত প্ৰতিদিনেই ইউক্ৰেইনত ফুটি থাকিল ৰাছিয়াৰ গুলী-বাৰুদ। ৰাছিয়াৰ নিৰ্লজ্জ আগ্ৰাসনৰ ফলত এতিয়ান সমগ্ৰ বিশ্বত সৃষ্টি হৈছে বিভিন্ন অৰ্থনৈতিক সংকটৰ। ৰুছ ইউক্ৰেইনৰ যুদ্ধৰ বাবে এতিয়া অন্য দেশ সমূহে অৰ্থনৈতিক সংগ্ৰাম কৰিব লগীয়া হৈছে।
২) ২০২২ চনত নিজ গৃ্হভূমি এৰি পলাইছে লাখ লাখ নাগৰিকে। বিভিন্ন দেশত হৈ থকা যুদ্ধ আদিৰ বাবে মৰণৰ ভয়ত অন্য দেশলৈ গমন কৰিছে কেইবাখনো দেশৰ নাগৰিকে। বৰ্তমান বিশ্বৰ প্ৰায় ৩.২ কোটি লোক শৰণাৰ্থী, অৰ্থাৎ তেওঁলোকে নিৰ্যাতন, সংঘাত বা হিংসাৰ বাবে নিজৰ জন্মভূমি এৰি পলায়ন কৰিছে। ছিৰিয়া, আফগানিস্তান, দক্ষিণ চুডান, য়েমেন, ইউক্ৰেইন, ইত্যাদি দেশৰ আভ্যন্তৰীণ পৰিস্থিতি আৰু যুদ্ধৰ বাবে অন্য দেশলৈ ঢাপলি মেলিছে নাগৰিক সকলে।
৩) বৰ্ষটোত এক জটিল ৰাজনৈতিক পৰিস্থিতিৰ সমুখীন হয় বিট্ৰেইন। ২০২২ চনত অস্থিৰ ৰাজনৈতিক পৰিস্থিতিয়ে বিৰাজ কৰে ব্ৰিটেইনত। কোভিড পৰিস্থিতি, ৰুছ-ইউক্ৰেইনৰ যুদ্ধ, চৰকাৰৰ দক্ষতাহীনতা ইত্যাদি কাৰণত প্ৰবল মুদ্ৰাস্ফীতিৰ সৃষ্টি হয় দেশখনত। সৃষ্টি হয় নিৱনুৱা সমস্যাৰ। ঔদ্যোগিক ক্ষেত্ৰলৈও আহে তীব্ৰ সংকটৰ। যাৰ বাবে মাত্ৰ এবছৰত তিনি জনকৈ প্ৰধানমন্ত্ৰী সলনি হয় ব্ৰিটেইনত। ২০১৯ চনৰ পৰা প্ৰধানমন্ত্ৰী হৈ থকা বৰিচ জনচনে ২০২২ চনৰ জুলাই মাহত প্ৰধানমন্ত্ৰীৰ পদৰ পৰা অব্যাহতি লবলৈ বাধ্য হৈ পৰে। জনচনৰ বিৰুদ্ধে উত্থাপন হয় অলেখ কেলেংকাৰীৰ অভিযোগ। চৰকাৰ সদস্য সকলৰ লগতে জনতাইয়ো গঢ়ি তোলে তীব্ৰ প্ৰতিবাদ। ইয়াৰ পিছতেই ব্ৰিটেইনৰ প্ৰধানমন্ত্ৰীৰূপে ৬ ছেপ্তেম্বৰৰ দিনা শপত গ্ৰহণ কৰে – লিজ ট্ৰাছে। কিন্তু ৰাজনৈতিক তথা ব্ৰিটেইনৰ অৰ্থনৈতিক অস্থিৰতাক স্থিতি প্ৰদান কৰিব নোৱাৰি মাত্ৰ ৫০ দিনৰ পিছতেই অৰ্থাৎ ২৫ অক্টোবৰৰ দিনা লিজা ট্ৰাছেও পদত্যাগ কৰিবলগা হয়। ২৫ অক্টোবৰৰ দিনা ব্ৰিটেইনৰ নতুন প্ৰধানমন্ত্ৰী হিচাপে নিৰ্বাচিত হয় ভাৰতীয় মূলৰ ঋষি সুনাক। এনেদৰেই একেটা বৰ্ষতে নোহোৱা নোপোজা ঘটনাৰ দৰে তিনিজনকৈ প্ৰধানমন্ত্ৰী সলনি কৰিবলগা হ’ল এটা সময়ত আধা বিশ্বত নিজৰ শাসন চলোৱা ব্ৰিটেইনে।
৪) ২০২২ চনত ৰাজনৈতিক, অৰ্থনৈতিক আৰু জলবায়ু সংকটে পাকিস্তানক জুৰুলা কৰে। হিমবাহ গলি পাকিস্তানত বছৰটোত সৃষ্টি হয় অনাহূত বান পৰিস্থিতিৰ। বানে ধ্বংস কৰে পাকিস্তানৰ ১০ লাখকৈ ঘৰ। চীন, ৰাছিয়া আাৰু আমেৰিকাৰ ওচৰত অগণন ঋণত বুৰ যায় পাকিস্তান চৰকাৰ। ভয়ানক মুদ্ৰাস্ফীতিৰ সৃষ্টি হয় পাকিস্তানত। যাৰ বাবে এতিয়া সংকটৰ গৰাহলৈ আগবাঢ়িছে পাকিস্তানৰ জনগণ। ইয়াৰ লগতে প্ৰধানমন্ত্ৰী ইমৰান খানৰ অবিবেচক সিদ্ধান্ত, বিৰোধীৰ ঐকান্তিক প্ৰচেষ্টা, আভ্যন্তৰীণ ষড়যন্ত্ৰ, অৰ্থনৈতিক মন্দাৱস্থা আদি কাৰণত যোৱা এপ্ৰিল মাহত পাকিস্তানৰ নেশ্যনেল এছেম্বলীত অনাস্থাৰ ভোটত হাৰ মানে ইমৰান খানে। ইমৰান খানক প্ৰধানমন্ত্ৰীৰ পদৰ পৰা আঁতৰাবলৈ পাকিস্তানৰ ৰাজনীতিত এক নাটকীয় পৰিৱেশৰ সৃষ্টি হয়। অৱশেষত ইমৰানৰ উফৰাই পাকিস্তানৰ মচনদ দখল কৰে মুছলীম লীগৰ নেতা শ্বেহবাজ শ্বৰীফে। ইয়াৰ পিছতো ইমৰান খানক হত্যাৰ ষড়যন্ত্ৰ চলি থাকে। যোৱা নবেম্বৰ মাহত এখন ৰাজহুৱা সভাত ইমৰান খানলৈ লক্ষ্য কৰি দুৰ্বিত্তই গুলী কৰে। ভৰিত গুলী লাগি আঘাতপ্ৰাপ্ত হয় ইমৰান খান।
৫) ইৰাণৰ প্ৰতিবাদ। এইটো ২০২২ বৰ্ষৰ এটা ঐতিহাসিক ঘটনা। ইৰাৰণত হিজাব বিৰোধী আন্দোলন চলি আছে। হিজাবৰ বিৰুদ্ধে ইৰানত চলিছে এই শতিকাৰ আটাইতকৈ ডাঙৰ নাৰীবাদী আন্দোলন। নাৰীৰ অধিকাৰ, স্বতন্ত্ৰতা আদি বিষয়ক লৈ ইৰাণৰ ৰক্ষণশীল চৰকাৰ তথা সমাজ ব্যৱস্থাৰ বিৰুদ্ধে গৰজি উঠিছে ইৰানৰ মহিলাসকল। উল্লেখযোগ্য যে ইৰাণৰ সংবিধান মতে ইৰাণীয়ান মহিলা সকলে হিজাব পৰিধান কৰাটো বাধ্যতামূলক। হইজাবৰ বিৰুদ্ধে ইৰাণত বহু বছৰ ধৰি প্ৰতিবাদ চলি আছে যদিও এইবাৰ মাহাছা আমিনি নামৰ যুৱতী গৰাকীক শাসকীয় পক্ষই হত্যা কৰাৰ পিছতেই তীব্ৰ হৈ উঠিল এই আন্দোলন। প্ৰাপ্ত তথ্য মতে এতিয়ালৈকে প্ৰায় পাঁচ শতাধিক প্ৰতিবাদকাৰীক হত্যা কৰিছে নিৰাপত্তাৰক্ষীয়ে।
৬) ক’ভিডে ২০২২ তো লগ নেৰিলে বিশ্বক। ২০২২ চনতো কভিডৰ না না ভেৰিয়েন্টে জোঁকাৰি আছে প্ৰায়বোৰ দেশকে। ২০২২ বৰ্ষৰ শেষৰ ফালে চীনত কভিডৰ বাবে অবৰ্নণীয় পৰিস্থিতিৰ সৃষ্টি হৈছে বুলি জানিব পৰা গৈছে। ২০২২ চনৰ শেষৰ ফালে প্ৰতি সপ্তাহত ২০০০ৰো অধিক আমেৰিকান লোক ক’ভিডত আক্ৰান্ত হৈ মৃত্যুমুখত পৰিছিল। ভাৰততো অব্যাহত আছে কোভিড সংক্ৰমণ।