কেইদিনমানৰ পূৰ্বে শিৱসাগৰৰ বিজেপি নেত্ৰীৰ পুত্ৰই কন্টেইনমেন্ট জ’নত থকা ব্যক্তিক উপলুঙা মন্তব্য কৰা কাৰ্যৰ উত্তেজনা মাৰ নৌযাওঁতেই পুনৰ এগৰাকী বিজেপি নেত্ৰীৰ পুত্ৰৰ উদ্ভণ্ডালিয়ে শিৱসগৰত ব্যাপক প্ৰতিক্ৰিয়াৰ সৃষ্টি কৰিছে।
এইবাৰ বিজেপি নেত্ৰীৰ পুত্ৰৰ আক্ৰমণৰ বলি হ’ল শিৱসাগৰ জিলা উপায়ুক্তৰ কাৰ্যালয়ৰ এজন কৰ্মচাৰী।
সুৰাৰ ৰাগীত মাতাল হৈ তিনি সতীৰ্থৰ সৈতে আক্ৰমণ চলালে শিৱসাগৰ জিলা উপায়ুক্তৰ গোপনীয় সহায়ক অৰবিন্দ গগৈক।
শিৱসাগৰৰ লক্ষ্মীনগৰৰ দিখৌৰ মথাউৰিৰ সমীপত ঘটনাটো সংঘটিত হৈছে।
দেওবাৰে কাৰ্যালয়ৰ বিশেষ কাম সম্পন্ন কৰি ৰাতি শহুৰৰ গৃহলৈ গৈ থকা অৱস্থাত কেইজনমান সুৰাপৰীয়া যুৱকে ৰাজপথত শুই উদ্ভণ্ডালি কৰি থকাৰ কাৰ্যৰ বিৰোধিতা কৰাৰ বাবেই যুৱকৰ দলটোৱে উপায়ুক্তৰ কাৰ্যালয়ৰ কৰ্মচাৰীজনক আক্ৰমণ চলায়।
কৰ্মচাৰীজনে আৰক্ষীক খবৰ দিয়াত তেওঁৰ ফোনটো ভাঙি পেলায় দূৰ্বৃত্তকেইটাই।
পাছত সমীপৰ এখন দোকানত সুমুৱাই উপায়ুক্তৰ গোপনীয় সহায়কজনক খুকুৰী, দাৰে আক্ৰমণৰ চেষ্টা চলায়।
অৱশ্যে স্থানীয় ৰাইজৰ তৎপৰতাত কথমপি ৰক্ষা পৰে কৰ্মচাৰীজন।
ঘটনা সন্দৰ্ভত সোমবাৰে অৰবিন্দ গগৈয়ে শিৱসাগৰ সদৰ আৰক্ষী থানাত এজাহাৰ দাখিল কৰে আৰু শিৱসাগৰ আৰক্ষীয়ে এজাহাৰৰ ভিত্তিত ৯৩৪/২০ নম্বৰত ভাৰতীয় দণ্ডবিধি আইনৰ ৩৪১/৪২৭/২৯৪(এ)/৩২৩ আৰু ৩৪ ধাৰাৰ গোচৰ ৰুজু কৰি সোমবাৰে সন্ধিয়া তিনি যুৱকক আটক কৰে।
আটক কৰা যুৱক কেইজন হ’ল লক্ষ্মীনগৰৰ ৰিপুনজ্যোতি বৰপাত্ৰগোঁহাই, চম্পক বৰুৱা আৰু গোবিন ফুকন। ইয়াৰে চম্পক বৰুৱা হল শিৱসাগৰৰ বিজেপি নেত্ৰী তথা ১৪ নং ৱাৰ্ডৰ প্ৰাক্তন ৱাৰ্ড মেম্বাৰৰ পুত্ৰ।
ইপিনে, শাসকীয় দলৰ নেত্ৰীৰ গুৰু গোঁসাই নমনা পুত্ৰৰ নেতৃত্বত মাতাল যুৱকৰ দলে এইদৰে উপায়ুক্তৰ কাৰ্যালয়ৰ কৰ্মচাৰীক আক্ৰমণ কৰা ঘটনাই এতিয়া তীব্ৰ প্ৰতিক্ৰিয়াৰ সৃষ্টি হৈছে শিৱসাগৰত।
