কংগ্ৰেছ অধ্যক্ষ ছোনিয়া গান্ধীয়ে পেট্ৰ’ল-ডিজেলৰ ধাৰাবাহিক মূল্যবৃদ্ধিৰ সিদ্ধান্তক অংশেবেদনশীল বুলি মন্তব্য কৰি আজি প্ৰধান মন্ত্ৰীলৈ এখন পত্ৰ প্ৰেৰণ কৰে।
পত্ৰখনৰ জৰিয়তে ছোনিয়া গান্ধীয়ে মহামাৰী ক’ৰ’নাৰ সময়ত দেশবাসী চিন্তিত হৈ থকাৰ সময়তে এনে মূল্যবৃদ্ধি আপ্ৰাংগিক বুলি মন্তব্য কৰি এই সিদ্ধান্ত প্ৰত্যাহাৰ কৰিবলৈ অনুৰোধ জনায়।
কংগ্ৰেছ অধ্যক্ষগৰাকীয়ে কয় যে, চৰকাৰে পেট্ৰ’ল-ডিজেলৰ মূল্যবৃদ্ধি কৰি ২,৬০,০০০ কোটি টকাৰ অতিৰিক্ত ৰাজহ সংগ্ৰহৰ প্ৰচেষ্টা চলাইছে।
ছোনিয়া গান্ধীয়ে লগতে কয় যে প্ৰধান মন্ত্ৰীয়ে দেশৰ জনসাধাৰণক আত্মনিৰ্ভৰ হ’বলৈ আহ্বান জনোৱাৰ সময়ত এনে মূল্যবৃদ্ধিৰ চাপ প্ৰদান কৰা উচিত নহয়।
তেওঁ কয়, ‘মহামাৰী ক’ৰ’না বিৰোধী যুঁজত ভাৰতে স্বাস্থ্য, আৰ্থিক আৰু অন্যান্য সামাজিক অসুবিধাৰ সন্মুখীন হৈছে। মোৰ এই কথাত দুখ লাগিছে যে এই সংকটৰ সময়ত চৰকাৰে পেট্ৰ’ল-ডিজেলৰ দাম বৃদ্ধি কৰি অংশেবেদনশীল নিৰ্ণয় লৈছে’।
দেশৰ এই সংকটৰ সময়ত কোটিৰো অধিক লোকে চাকৰি হেৰুৱাইছে, কৃষকে সমস্যাৰ সন্মুখীন হৈছে তথা বিভিন্ন সৰু সৰু উদ্যোগ বন্ধ হৈ পৰাৰ পিছতো চৰকাৰে এই সিদ্ধান্ত গ্ৰহণ কৰিছে যিটো উচিত নহয় বুলি মন্তব্য কৰিছে কংগ্ৰেছ অধ্যক্ষ চোনিয়া গান্ধীয়ে।
তেওঁ লগতে কয় যে যোৱা কিছু দিনৰ পৰা আন্তঃৰাষ্ট্ৰীয় বজাৰত কেচা তেলৰ মূল্য প্ৰায় ৯ শতাংশ হ্ৰাস পাইছে, কিন্তু চৰকাৰে এই সংকটৰ সময়ত জনসাধাৰণক ইয়াৰ লাভ প্ৰদান কৰাৰ বাবে একো কৰা নাই।
‘মই আপোনাক অনুৰোধ জনাও যে মূল্যবৃদ্ধিৰ সিদ্ধান্ত প্ৰত্যাহাৰ কৰক আৰু কেচা তেলৰ দাম হ্ৰাস পোৱাৰ লভ্যাংশ জনসাধাৰণক প্ৰদান কৰক’, পত্ৰত এইদৰে উল্লেখ কৰে ছোনিয়া গান্ধীয়ে।
উল্লেখ্য যে তেল কোম্পানি সমূহে মঙলবাৰে পেট্ৰ’লৰ দাম পুনৰ ৪৭ পইচা আৰু ডিজেলৰ দাম ৯৩ পইচা বৃদ্ধি কৰে।
