বলিউডৰ জনপ্ৰিয় অভিনেতা ৰাজপাল যাদৱৰ বাবে বৰ্তমান সময়ছোৱা অতি সংকটপূৰ্ণ হৈ পৰিছে। প্ৰায় ৯ কোটি টকাৰ ঋণ আৰু চেক বাউন্সৰ এক পুৰণি গোচৰত আইনী মেৰপাকত পৰি অৱশেষত অভিনেতাগৰাকীয়ে দিল্লীৰ তিহাৰ কাৰাগাৰত আত্মসমৰ্পণ কৰিবলগীয়া হৈছে। ২০১০ চনত নিজৰ পৰিচালিত ছবি আটা পাটা লাপাটাৰ বাবে দিল্লীৰ এটা প্ৰতিষ্ঠানৰ পৰা লোৱা ৫ কোটি টকাৰ ঋণৰ পৰাই এই সমস্যাৰ সূত্ৰপাত হৈছিল। ছবিখন বক্স অফিচত ফ্লপ হোৱাৰ বাবে তেওঁ ঋণ পৰিশোধ কৰিব পৰা নাছিল আৰু পৰৱৰ্তী সময়ত সুদসহ এই ধনৰ পৰিমাণ বৃদ্ধি পাই প্ৰায় ৯ কোটি টকা হয়। আদালতে তেওঁক ধন পৰিশোধৰ বাবে বহুবাৰ সময় দিছিল যদিও সেই চৰ্তসমূহ পালন কৰিব নোৱাৰাৰ বাবে অৱশেষত তেওঁক ছমাহৰ কাৰাদণ্ড বিহা হয়।
কাৰাগাৰলৈ যোৱাৰ ঠিক আগমুহূৰ্তত ৰাজপাল যাদৱে সংবাদ মাধ্যমৰ আগত অত্যন্ত আৱেগিক হৈ পৰা দেখা গৈছিল। তেওঁ স্বীকাৰ কৰিছিল যে তেওঁ এতিয়া ঘোৰ আৰ্থিক সমস্যাৰ মাজেৰে দিন অতিবাহিত কৰিছে আৰু তেওঁৰ হাতত দিবলৈ কোনো টকা নাই। আটাইতকৈ দুখজনক কথাটো হ’ল যে এই কঠিন সময়ত তেওঁৰ কাষত থিয় হ’বলৈ কোনো বন্ধু বা শুভাকাংক্ষী আগুৱাই অহা নাছিল। তেওঁ অতি দুখেৰে কৈছিল যে চিনেমা জগতত তেওঁ এতিয়া সম্পূৰ্ণ অকলশৰীয়া আৰু এই যুঁজ তেওঁ অকলেই যুঁজিব লাগিব। আনকি তেওঁৰ অতি ঘনিষ্ঠ বন্ধুসকলেও এই সংকটৰ সময়ত তেওঁক সহায় কৰা নাই বুলি তেওঁ আক্ষেপ প্ৰকাশ কৰিছিল।
ৰাজপাল যাদৱৰ এই আৱেগিক মন্তব্য ছ’চিয়েল মিডিয়াত ভাইৰেল হোৱাৰ পাছতে অভিনেতা ছনু সূদে সহায়ৰ হাত আগবঢ়াই সকলোৰে দৃষ্টি আকৰ্ষণ কৰিছে। ছনুৱে তেওঁৰ টুইটাৰ আৰু ইনষ্টাগ্ৰামযোগে ঘোষণা কৰিছে যে ৰাজপাল যাদৱ তেওঁৰ আগন্তুক ছবিৰ এটা গুৰুত্বপূৰ্ণ অংশ হ’ব। সোণুৱে স্পষ্টকৈ জনাইছে যে এয়া কোনো দান বা চেৰিটি নহয়, বৰঞ্চ এজন মেধাৱী অভিনেতাৰ প্ৰতি জনোৱা সন্মানহে। তেওঁ ৰাজপালক এখন ছবিত অভিনয়ৰ প্ৰস্তাৱ দিয়াৰ লগতে অগ্ৰিম ধন হিচাপে এটা মোটা অংকৰ চেক দিয়াৰ কথাও উল্লেখ কৰে, যাতে তেওঁৰ আৰ্থিক বোজা কিছু পৰিমাণে লাঘৱ হয়।
ছনু সূদে চলচ্চিত্ৰ জগতৰ বাকী শিল্পী আৰু প্ৰযোজকসকলকো এই সংকটৰ সময়ত ৰাজপাল যাদৱৰ কাষত থিয় হ’বলৈ আহ্বান জনাইছে। তেওঁ কৈছে যে কেতিয়াবা সময় অতি নিষ্ঠুৰ হ’ব পাৰে, কিন্তু তাৰ বাবে এজন প্ৰতিভাশালী অভিনেতাক হেৰুৱাই পেলোৱা অনুচিত। উদ্যোগটোৰ সকলোৱে মিলি সহায় কৰিলে এজন শিল্পীয়ে পুনৰ নিজৰ ভৰিৰ ওপৰত থিয় হ’ব পাৰিব বুলি ছনুৱে বিশ্বাস প্ৰকাশ কৰে।
