৩০টা ৰাষ্ট্ৰীয় সংস্থাৰ সহযোগিতাৰে গঠিত দক্ষিণ আফ্ৰিকাৰ বন্যপ্ৰাণী পশু সুৰক্ষা মঞ্চই দেশখনৰ বন, মীন আৰু পৰিৱেশ মন্ত্ৰালয়ক গ্ৰীণছ জুলজিকেল ৰেচকিউ এণ্ড ৰিহেবিলিটেচন চেণ্টাৰ বা বনতাৰালৈ বৃহৎ সংখ্যক বন্যপ্ৰাণী ৰপ্তানিৰ তদন্ত কৰিবলৈ আহ্বান জনাইছে।
উল্লেখ্য যে, গুজৰাটৰ জামনগৰৰ ব্যক্তিগত চিৰিয়াখানা বনতাৰাৰ মালিক ৰিলায়েন্সৰ অধ্যক্ষ মুকেশ আম্বানীৰ কনিষ্ঠ পুত্ৰ অনন্ত আম্বানী।
২০২৫ চনৰ ৬ মাৰ্চ তাৰিখে দক্ষিণ আফ্ৰিকাৰ পৰিৱেশ মন্ত্ৰী ডিয়ন জৰ্জলৈ লিখা এখন পত্ৰত ৱাপিএফএছএই এই পশু স্থানান্তৰৰ বৈধতা আৰু নৈতিক প্ৰভাৱৰ সন্দৰ্ভত গুৰুতৰ উদ্বেগ প্ৰকাশ কৰিছে, বিশেষকৈ নাহৰফুটুকী, চিতা, বাঘ আৰু সিংহৰ ৰপ্তানিৰ ওপৰত আলোকপাত কৰিছে।
মন্ত্ৰী জৰ্জলৈ প্ৰেৰণ কৰা আৰু বন, মীন আৰু পৰিৱেশ বিভাগৰ সঞ্চালক প্ৰধান আৰু দক্ষিণ আফ্ৰিকাৰ চিআইটিইএছ পৰিচালনা কৰ্তৃপক্ষকে ধৰি গুৰুত্বপূৰ্ণ বিষয়াসকললৈ প্ৰেৰন কৰা পত্ৰখনত বন্য প্ৰাণী আৰু উদ্ভিদৰ বিপন্ন প্ৰজাতিৰ আন্তঃৰাষ্ট্ৰীয় বাণিজ্য চুক্তি (চিআইটিইএছ)ৰ উলংঘাৰ সম্ভাৱনীয়তাৰ কথা উল্লেখ কৰা হৈছে।
ৱাপিএফএছএৰ পৰিচালক মেগান কাৰে পত্ৰখনত উল্লেখ কৰিছে যে, “আমি জানো যে ভাৰতৰ গ্ৰীণছ জুলজিকেল ৰেচকিউ এণ্ড ৰিহেবিলিটেচন চেণ্টাৰলৈ আমদানি কৰা বৃহৎ পৰিমাণৰ বিভিন্ন জীৱিত প্ৰজাতিৰ বন্যপ্ৰাণী সন্দৰ্ভত চিআইটিইএছৰ ভিতৰত অবৈধ কাৰ্যকলাপক উদ্বেগ উত্থাপন কৰা হৈছে।”
তেওঁ কয়, ‘‘২০২৩ চনৰ নৱেম্বৰ মাহত চিআইটিইএছৰ স্থায়ী সমিতিৰ ৭৭ সংখ্যক বৈঠকৰ আৰম্ভণিতে ভাৰতৰ বিৰুদ্ধে নীতি উলংঘাৰ গোচৰ উত্থাপন কৰা হৈছিল।”
ইপিনে ৱাপিএফএছএৰ উদ্বেগক আৰু অধিক ইন্ধন যোগাইছে চিআইটিইএছৰ পৰিশিষ্ট একত তালিকাভুক্ত জটিলভাৱে বিপন্ন প্ৰজাতিৰ প্ৰজাতিকে ধৰি ভাৰতলৈ জীৱিত প্ৰাণী আমদানিৰ সন্দৰ্ভত চিআইটিইএছ সচিবালয়ে লাভ কৰা তথ্যই।
পত্ৰখনত ২০২৩ চনত জিজেডজেডআৰচিৰ প্ৰতিনিধিয়ে চিআইটিইএছ সচিবালয়লৈ কৰা ভ্ৰমণৰ ওপৰতো আলোকপাত কৰা হৈছে, য’ত তেওঁলোকে বুজাই দিছে যে কেন্দ্ৰটোৱে ভাৰতৰ বাহিৰৰ কঠিন পৰিস্থিতিৰ পৰা জীৱ-জন্তু উদ্ধাৰ কৰিছে। কিন্তু বন্যপ্ৰাণীৰ ৰপ্তানিৰ বৈধতা আৰু চিটিইএছৰ নথি-পত্ৰ লাভৰ বাবে ব্যৱহাৰ কৰা পদ্ধতিৰ বিষয়ে উদ্বেগ্নতা প্ৰকাশ কৰিছে।
সংস্থাটোৱে অভিযোগ কৰিছে যে, দক্ষিণ আফ্ৰিকাত বন্দীভাৱে প্ৰজনন কৰা প্ৰজাতিৰ যথেষ্ট সংখ্যকক ব্যৱসায়িক উদ্দেশ্যত ৰপ্তানি কৰা হ’ব পাৰে, যাৰ ফলত এই ৰপ্তানিৰ প্ৰকৃত চৰিত্ৰৰ ওপৰত অধিক প্ৰশ্ন উত্থাপন হৈছে।
ৱাপিএফএছএই বিষয়টোৰ ওপৰত সম্পূৰ্ণ আৰু তাৎক্ষণিক তদন্ত কৰিবলৈ মন্ত্ৰী জৰ্জক আহ্বান জনাইছে।
বৰ্তমান গোটটোৱে মন্ত্ৰীগৰাকীৰ সঁহাৰিৰ বাবে অপেক্ষা কৰি আছে।
