কিয় দিনক দিনে দক্ষিণ চিনেমাতকৈ পিছ পৰি আহিছে বলীউড? এসময়ত দেশৰ আটাইতকৈ শক্তিশালী চলচ্চিত্ৰ উদ্যোগটোৱেই আছিল বলীউড। প্ৰতিবছৰে মুক্তি পাইছিল ইখনৰ পিছত সিখনকৈ ছুপাৰহিট চিনেমা। বক্স অফিচ সংগ্ৰহৰ শীৰ্ষত আছিল হিন্দী চিনেমা।
কিন্তু এতিয়া বলীউডৰ উদ্যোগটো দিনক দিনে পিছ পৰি অহাৰ বিপৰীতে আগবাঢ়ি গৈছে দক্ষিণ ভাৰতীয় চিনেমা। বলিউডক পিছ পেলাইছে দক্ষিণ ভাৰতীয় চিনেমাৰ বক্স অফিচে। ছুপাৰহিট হৈছে ইখনৰ পিছত সিখনকৈ দক্ষিণ ভাৰতীয় চিনেমা। বিপৰীতে, ইখনৰ পিছত সিখনকৈ ফ্লপ হৈছে বলীউডৰ চিনেমা।
বৰ্তমানৰ ইখনৰ পিছত ৫০০ৰ পৰা ১০০০ কোটি টকাৰ ব্যৱসায় কৰি আছে দক্ষিণৰ চিনেমাই। কিন্তু ইয়াৰ বিপৰীতে বলীউডৰ বক্স অফিচৰ অৱস্থা বহুত বেয়া। অতিসাম্প্ৰতিক সময়ৰ বলীউডত পাঠান আৰু জৱানৰ বাহিৰে কোনো ছুপাৰহিট চিনেমা নাই।
কিন্তু কিয় উন্নতি কৰিব পৰা নাই বলীউডৰ চিনেমাই? ইয়াৰ কাৰণ বিচাৰি যাওঁতে ওলাই আহিছে কিছুমান চাঞ্চল্যকৰ তথ্য।
বলীউড পিছ পৰি থকাৰ এটা ডাঙৰ কাৰণ হ’ল উপযুক্ত চিত্ৰনাট্যৰ অভাৱ। বলীউডে প্ৰতিমাহে চিনেমা নিৰ্মাণ কৰি আছে। কিন্তু বেছিভাগ সময়তে কাহিনীটোত কোনো জীৱন নাথাকে। বলীউডৰ ছবিৰ বহু পৰিৱৰ্তন হৈছে। সেয়ে আজিকালি চিনেমাখন মুক্তি পোৱাৰ আগতেই দৰ্শক সকলে সিদ্ধান্ত লয় যে কোনবোৰ চিনেমা চিনেমা হলত চাব, কোনখন চিনেমা অ’টিটিত চাব।
লগতে, হিন্দী চিনেমাৰ আটাইতকৈ ডাঙৰ সমস্যা হৈছে তাৰকাসকলৰ পাৰিশ্ৰমিক। ছবিখন মুক্তিৰ পূৰ্বে তাৰকাসকলে ইমানেই পাৰিশ্ৰমিক দাবী কৰে যে প্ৰযোজকসকল প্ৰায় দেউলীয়া হৈ পৰে। এখন চিনেমাৰ মুঠ বাজেটৰ প্ৰায় ৭০-৮০ শতাংশ ধন নায়কৰ পাৰিশ্ৰমিকলৈ যায়। গতিকে চিনেমাৰ আনবোৰ দিশত খৰচ কৰিবলৈ টকা নাথাকে।
উদাহৰণ স্বৰূপে অক্ষয় কুমাৰৰ চিনেমা বিগত কেইবছৰমানৰ পৰা ইখনৰ পিছত সিখনকৈ ফ্লপ হৈ আহিছে। কিন্তু ছবিবোৰৰ বাজেটৰ বেছিভাগ ধনেই তেওঁ পাৰিশ্ৰমিক হিচাপে লৈছে।
উদাহৰণ স্বৰূপে অক্ষয়ে ‘বদে মীন্যা ছোটে মীন্যা’ৰ বাবে ১৬৫ কোটি পাৰিশ্ৰমিক লৈছিল। কিন্তু সেই চিনেমাখনে ছবিগৃহত উপাৰ্জন কৰিবলৈ সক্ষম হৈছিল মাত্ৰ ১১৯.৪৯ কোটি টকা।
‘খেল খেল মেই’ চিনেমাখনৰ বাজেট আছিল ১০০ কোটি, অক্ষয় কুমাৰে ৫৬ কোটি টকা লৈছিল। এই ছবিখনে উপাৰ্জন কৰিছিল মাত্ৰ ৫৫ কোটি টকা। গতিকে এসময়ত চিনেমা ছুপাৰহিট বনোৱা তাৰকা সকলে আজি চিনেমাৰ ব্যৱসায় ডুবাই পেলাইছে।
