চাহ জনজাতিৰ ছাত্ৰ-ছাত্ৰীসকলৰ বিদ্যাতনিক দিশৰ উত্তৰণৰ খুবেই প্ৰয়োজন। আধুনিক আৰু গুণগণ শিক্ষাৰে শিক্ষিত কৰি এই পিছপৰা জনগোষ্ঠীটোৰ ছাত্ৰ-ছাত্ৰী সকলক সকলোৰে সৈতে ফেৰ মাৰিব পৰাকৈ উপযুক্ত হিচাপে গঢ়ি তোলাৰ দ্বায়িত্ব আমি সকলোৱে ল’ব লাগিব। এই মন্তব্য অসম চৰকাৰৰ ছাত্ৰ আৰু যুৱ কল্যাণ উপদেষ্টা সমিতিৰ সচিব লক্ষ্য কোৱঁৰৰ।
আজি উত্তৰ মাৰ্ঘেৰিটা ৰঙ্গমঞ্চত সহস্ৰাধিক ছাত্ৰ-ছাত্ৰীৰ উপস্থিতিত অসম চৰকাৰৰ ছাত্ৰ আৰু যুৱ কল্যাণ উপদেষ্টা সমিতিৰ উদ্যোগত তথা অসম চাহ জনজাতি ছাত্ৰ সন্থাৰ সহযোগত অনুষ্ঠিত চাহ জনজাতি ছাত্ৰ-ছাত্ৰীসকলৰ বাবে বিশেষ শৈক্ষিক প্ৰশিক্ষণ কাৰ্যসূচীৰ শুভ উদ্বোধনী অনুষ্ঠানত অংশগ্ৰহণ কৰি মুখ্য বক্তা কোঁৱৰে গুণগত শিক্ষাই চাহ জনগোষ্ঠীটোক অসমীয়া জাতিৰ মূল সুঁতিত বিলীন কৰি লৈ যাব আৰু এই ক্ষেত্ৰত আটছাই লোৱা বিশেষ সহযোগিতাৰ ভূমিকা প্ৰশংসা কৰে।
আটছাৰ সাংগঠনিক সম্পাদক উমেশ জালৰ পৌৰোহিত্যত অনুষ্ঠিত সভাৰ আঁত ধৰে চাহ আৰু প্ৰাক্তন চাহ শ্ৰমিক উন্নয়ন সংস্থাৰ সাধাৰণ সম্পাদক অশ্বিনী কুমাৰ তাচাই।
আটছাৰ কেন্দ্ৰীয় কাৰ্যনিৰ্বাহক প্ৰাঞ্জল বাৰাইকৰ আদৰণি ভাষণেৰে আৰম্ভ হোৱা সভাখনত বিশিষ্ট অতিথি ৰূপে উপস্থিত থাকি আটছাৰ সাধাৰণ সম্পাদক পবন বেড়িয়াই ছাত্ৰ-ছাত্ৰী সকলক নিজকে সফল নাগৰিক হিচাপে গঢ়ি তুলিবলৈ অহোপুৰুষাৰ্থ কৰিবলৈ আহবান জনায়।
বন্তি প্ৰজ্বলনেৰে অনুষ্ঠানৰ শুভাৰম্ভ কৰা মহকুমাধিপতি পবিত্ৰ কুমাৰ দাসে জীৱনৰ সকলো প্ৰত্যাহ্বান নেওচি প্ৰত্যয়ৰে আগবাঢ়ি যাবলৈ ছাত্ৰ-ছাত্ৰীসকলক আহ্বান জনায়।
ডুমডুমা আদৰ্শ মহাবিদ্যালয়ৰ অধ্যক্ষ ড° অমৰজিৎ শইকীয়াই অসম চৰকাৰৰ ছাত্ৰ আৰু যুৱ কল্যাণ উপদেষ্টা সমিতিৰ সচিব লক্ষ্য কোঁৱৰে পিছপৰা জনগোষ্ঠীটোৰ ছাত্ৰ ছাত্ৰী সকলৰ বিশেষ শৈক্ষিক প্ৰশিক্ষণৰ ব্যৱস্থা লোৱাত শলাগ লয়।
তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে অসমৰ অৰ্থনৈতিক বুনিয়াদত গুৰুত্বপূৰ্ণ ভূমিকা লৈ অহা চাহ উদ্যোগত কৰ্মৰত চাহ শ্ৰমিকসকল শোষিত নিষ্পেষিত হৈ আহিছে। ৪ হাজাৰৰ পৰা ৫/৬ হাজাৰ টকা মাহেকত উপাৰ্জন কৰা চাহ শ্ৰমিকৰ জীৱন সংগ্ৰামেই কঠিন তেনে স্বত্বত অতি ব্যয়বহুল উচ্চ শিক্ষা গ্ৰহণ কিমান কঠিন সেইয়া নিৰ্মম বাস্তৱ বুলি কৈ বাগিছাৰ শ্ৰমিকৰ দৰমহা বৃদ্ধিৰ আপোচবিহীন সংগ্ৰাম সকলো দল সংগঠনকলৈ কৰাৰ পোষকতা কৰে।
মাৰ্ঘেৰিটাত অনুষ্ঠিত হব লগা ৭টা কৰ্মশালাৰ এই কেন্দ্ৰীয় উদ্বোধনী অনুষ্ঠানত মহকুমা আৰক্ষী বিষয়া পোনা গগৈ, হৰিনন্দ গড়, সাংবাদিক মানস প্ৰতিম গগৈ, ফাইজুৰ ৰহমান, সমীৰণ বৰঠাকুৰ, তপন দে, আটছা নেতা বিজয় তাঁতী, দিপক কয়া, শচীন ঘাটোৱাৰ নুৱেল পাটৰ আৰু বহু বিশিষ্ট ব্যক্তি উপস্থিত থাকে।