আৰ জি কৰ গোচৰক লৈ দেশজুৰি প্ৰতিবাদ চলি থকাৰ মাজতে বিশেষ তদন্তকাৰী দলে কৰ্ণাটকৰ জে ডি এছৰ প্ৰাক্তন সাংসদ প্ৰজ্বল ৰেভান্না আৰু তেওঁৰ পিতৃ তথা প্ৰাক্তন বিধায়ক এইচ ডি ৰেভান্নাৰ বিৰুদ্ধে অভিযোগনামা দাখিল কৰিছে।
এই দীঘলীয়া অভিযোগনামাত প্ৰজ্জ্বলৰ বিৰুদ্ধে সৰ্বোচ্চ অভিযোগ হৈছে ৪৭ বছৰীয়া এগৰাকী প্ৰাক্তন গৃহকৰ্মীক ধৰ্ষণ কৰা।
লগতে সেই গৃহকৰ্মী গৰাকীৰ কন্যাকো যৌন নিৰ্যাতন চলাইছিল প্ৰজ্জ্বল ৰেভান্নাই।
কেৱল এয়াই নহয়, যৌন কাৰ্যকলাপৰ ভিডিঅ’ ৰেকৰ্ডিং কৰি পিছত প্ৰমাণ নষ্ট কৰাৰ উদ্দেশ্যেৰে সেই ভিডিঅ’ ডিলিট কৰিছিল ৰেভান্নাই।
জিডিএছৰ প্ৰাক্তন বিধায়ক তথা প্ৰাক্তন ৰাজ্যিক মুখ্যমন্ত্ৰী এইচডি কুমাৰস্বামীৰ ভাতৃ তথা প্ৰজ্জ্বলৰ পিতৃ এইচডি ৰেভান্নাৰ বিৰুদ্ধেও এছআইটিয়ে অভিযোগনামা দাখিল কৰিছে। লগতে কেইবাবাৰো গৃহকৰ্মীক যৌন নিৰ্যাতনৰ অভিযোগ উত্থাপন হৈছে।
উল্লেখ্য যে উক্ত যৌন নিৰ্যাতনৰ গোচৰত দাখিল কৰা এইখন প্ৰথমখন চাৰ্জশ্বীট।
যোৱা এপ্ৰিল মাহত লোকসভা নিৰ্বাচনৰ প্ৰাকমুহূৰ্তত এই যৌন কেলেংকাৰীয়ে সমগ্ৰ দেশত এক হুলস্থূলীয়া পৰিস্থিতিৰ সৃষ্টি কৰিছিল। সমগ্ৰ দেশতেই ইয়াৰ প্ৰতিবাদ হৈছিল।
আদালতে প্ৰজ্জ্বলৰ বিৰুদ্ধে ধৰ্ষণ, যৌন নিৰ্যাতন, অসংখ্য মহিলাক নিৰ্যাতন আৰু শাৰীৰিক আক্ৰমণৰ অভিযোগ উত্থাপন কৰিছে। অৱশ্যে তেওঁৰ বিৰুদ্ধে মাত্ৰ চাৰিখন এজাহাৰহে দাখিল কৰা হয়।
এই ঘটনা পোহৰলৈ অহাৰ পাছত ২৬ এপ্ৰিলত জাৰ্মানীলৈ পলায়ন কৰে প্ৰজ্জ্বলে।
৩১ মে’ত ভাৰতলৈ উভতি অহাৰ লগে লগে আৰক্ষীয়ে বিমানবন্দৰৰ পৰা গ্ৰেপ্তাৰ কৰে। বৰ্তমান প্ৰজ্জ্বল বেংগালুৰুৰ এখন কাৰাগাৰত বন্দী হৈ আছে।
আদালতত দাখিল বিশেষ তদন্ত কমিটিয়ে ২১৪৪ পৃষ্ঠাৰ চাৰ্জশ্বীট দাখিল কৰিছে। য’ত প্ৰায় ১৫০ জন লোকৰ সাক্ষ্য লিপিবদ্ধ কৰা হৈছে। এছ আই টিৰ চাৰ্জশ্বীটত প্ৰজ্জ্বলে চাৰিগৰাকী মহিলাক ধৰ্ষণ কৰা বুলি উল্লেখ আছে। লগতে ৭০ গৰাকী মহিলাৰ সৈতে যৌন কাৰ্যকলাপ ভিডিঅ’ ৰেকৰ্ডিং কৰিছে। তেওঁ প্ৰায় ২০০০টা এনে ভিডিঅ’ ক্লিপ নিৰ্মাণ কৰিছিল।
