শ্ৰীমন্ত শঙ্কৰদেৱ কলাক্ষেত্ৰত সাঁচিপতীয়া পাণ্ডুলিপি আৰু পৰম্পৰাগত মুখা প্ৰস্তুতকৰণ কৰ্মশালাৰ সফল সামৰণি
মহাপুৰুষ শ্ৰীমন্ত শঙ্কৰদেৱৰ অমৰ সৃষ্টিৰাজিৰ প্ৰচাৰ আৰু প্ৰসাৰত ব্ৰতী হৈ থকা আন্তৰ্জাতিক সংগঠন ‘ছ’চাইটী ফৰ শ্ৰীমন্ত শঙ্কৰদেৱ’ৰ উদ্যোগত আৰু শ্ৰীমন্ত শংকৰদেৱ কলাক্ষেত্ৰ সমাজৰ সহযোগত ৯ জুলাইৰ পৰা ১৩ জুলাই লৈ পাঁচদিনীয়া কাৰ্য্যসূচীৰে কলাক্ষেত্ৰ প্ৰাঙ্গণত এখন “সাঁচিপতীয়া পাণ্ডুলিপি প্ৰস্তুতকৰণ আৰু শংকৰী শৈলীত অংকন’’ শীৰ্ষক এখনি কৰ্মশালা অনুষ্ঠিত হৈ যায় ।
কৰ্মশালাত সাঁচিপতীয়া পুথি, হেঙুল-হাইতাল আদি পৰম্পৰাগত ৰং আৰু মহীৰ প্ৰস্তুত প্ৰণালীৰ বিষয়ে প্ৰশিক্ষণ প্ৰদান কৰাৰ লগতে শংকৰী শৈলীত পুথি চিত্ৰ অংকনৰ ওপৰতো বিশেষ প্ৰশিক্ষণ প্ৰদান কৰা হয়।
উল্লেখযোগ্য যে, ছ’চাইটী ফৰ শ্ৰীমন্ত শংকৰদেৱৰ উদ্যোগত ২০১৩ বৰ্ষৰ পৰাই প্ৰতি বছৰে অসমৰ বিভিন্ন ঠাইত এই কৰ্মশালা অনুষ্ঠিত কৰি আহিছে সংগঠনটোৱে আৰু ইয়াৰ জৰিয়তে অসমৰ পুথি চিত্ৰ চৰ্চাৰ ক্ষেত্ৰখনত এক নতুন অধ্যায় সংযোজিত কৰাৰ প্ৰয়াস কৰি অহা হৈছে য।
পাঁচদিনীয়া কৰ্মশালাখনত প্ৰশিক্ষণ প্ৰদান কৰে অসমৰ খ্যাতিমান পুথি চিত্ৰ শিল্পী মৃদু মৌচম বৰাই।
কৰ্মশালাৰ অন্তত ১৩ জুলাইত কলাক্ষেত্ৰ প্ৰাঙ্গণত অনুষ্ঠিত হোৱা সামৰণি সভাত কলাক্ষেত্ৰ সমাজৰ সচিব সুদৰ্শন ঠাকুৰ, কলাক্ষেত্ৰ সমাজৰ উপ-সভাপতি পদ্মশ্ৰী সূৰ্য হাজৰিকা, চ’ছাইটি ফৰ শ্ৰীমন্ত শংকৰদেৱৰ সভাপতি ড° সঞ্জীৱ কুমাৰ বৰকাকতী, সমন্বয়ক প্ৰদীপ হাজৰিকাকে প্ৰমুখ্য কৰি ভালেকেইগৰাকী গন্য-মান্য ব্যক্তিয়ে ভাষণ ৰখি গুৰুজনাৰ অমৰ সৃষ্টি সৃষ্টিৰাজিৰ ওপৰত আলোকপাত কৰে।
সভা খনৰ আঁত ধৰে অধ্যাপিকা মধুচন্দা চলিহাই। উক্ত সভাতেই বন্তি প্ৰজ্বলনেৰে ১৪ জুলাইৰ পৰা ১৮ জুলাইলৈ উক্ত স্থানতে এক পৰম্পৰাগত মুখা প্ৰস্তুতকৰণ কৰ্মশালাৰো শুভাৰম্ভ কৰে অসম আৰক্ষীৰ ডি আই জি শ্যামল প্ৰসাদ শইকীয়াই।
আনহাতে, মূখা প্ৰস্তুতকৰণ কৰ্মশালাৰ সামৰণি অনুষ্ঠানত উপস্থিত থাকি ভাষণ ৰাখে ভাৰতীয় অসামৰিক সেৱাৰ অৱসৰপ্ৰাপ্ত বিষয়া স্বপ্ননীল বৰুৱা, অধ্যাপক অতুল বৰুৱা, শিল্পী মাধৱ কৃষ্ণ দাস, জেষ্ঠ সাংবাদিক পৰাগমণি আদিত্য, ফটো সাংবাদিক চামুচুল হুদা পাটগিৰীকে ধৰি বহুকেইগৰাকী গন্য-মান্য ব্যক্তিয়ে।
মুখা কৰ্মশালাত প্ৰশিক্ষণ প্ৰদান কৰে বিশিষ্ট মুখাশিল্পী দেৱকান্ত হাজৰিকা ,বিনোদ ভুঞাঁ আৰু পাপু দাসে ।