ভাৰতে যেতিয়া ২০০৭ চনত মহেন্দ্ৰ সিং ধোনীৰ নেতৃত্বত পাকিস্তানক পৰাস্ত কৰি টি-২০ বিশ্বকাপ জয়ী হৈছিল, তেতিয়া দলৰ বিজয়ত গুৰুত্বপূৰ্ণ ভূমিকা লৈছিল সান্থাকুমাৰন শ্ৰীসন্থে।
এইগৰাকী সোঁহতীয়া বেগী বলাৰৰ চুইঙত বিশ্বৰ অভিজ্ঞ আৰু ডাঙৰ ডাঙৰ বেটছমেনসকল শলঠেকত পৰিছিল।
বিশ্বকাপৰ ছেমিফাইনেলত শক্তিশালী অষ্ট্ৰেলিয়াৰ বিস্ফোৰক অপেনিং বেটছমেন মেথিউ হেডেন আৰু এডাম গিলখ্ৰীষ্টক আউট কৰি ভাৰতৰ বিজয় সহজ কৰি তুলিছিল এইগৰাকী শ্ৰীসন্থে।
ইয়াৰ উপৰি আই পি এলতো এইগৰাকী বলাৰে কিংছ ইলেভেন পঞ্জাৱৰ হৈ খেলি ভাল প্ৰদৰ্শন কৰি থৈছে।
তেওঁৰ কেৰিয়াৰৰ মাজভাগত তথা আন্তঃৰাষ্ট্ৰীয় ক্ৰিকেটত নিজকে এগৰাকী প্ৰতিভাশালী বলাৰ হিচাপে প্ৰতিষ্ঠা কৰিবলৈ সক্ষম হোৱাৰ সময়তে আই পি এলত স্পট ফিক্সিং কৰি আজীৱন নিষেধাজ্ঞাৰ বলি হৈছিল।
এতিয়া ৭ বছৰ নিষেধাজ্ঞা কটোৱাৰ পিছত ক্ৰিকেট জগতলৈ পুনৰ উভতি আহিছে এছ শ্ৰীসন্থ।
কিন্তু এইখিনিতে সকলোৰে মনলৈ অহা প্ৰশ্নটো হৈছে, সাতবছৰৰ মূৰত শ্ৰীসন্থ আগৰ দৰে প্ৰদৰ্শন আগবঢ়াব পাৰিবনে?
ফিটনেছৰ লগতে বয়সৰ সমস্যাই তেওঁক পুনৰ ক্ৰিকেট ফিল্ডলৈ ঘূৰাই অনাত যথেষ্ট প্ৰত্যাহ্বানৰ সৃষ্টি কৰিব।
তেওঁ ক্ৰিকেট ফিল্ডৰ পৰা আঁতৰি থকা সাতবছৰ হ’ল, আৰু এই সাতবছৰত বহু সলনি হ’ল ক্ৰিকেট। ক্ৰিকেট এতিয়া দ্ৰুত গতিত আগবাঢ়িছে।
ইয়াৰ মাজতে, ক্ৰিকেটলৈ উভতিবলৈ প্ৰচেষ্টা অব্যাহত ৰাখিছে শ্ৰীসন্থে।
আই পি এলত স্পট ফিক্সিং কৰাৰ বাবে ২০১৩ চনত বি চি চি আইয়ে তেওঁৰ ওপৰত আজীৱন নিষেধাজ্ঞা আৰোপ কৰিছিল।
তেওঁ বি চি চি আইৰ শাস্তিৰ বিৰুদ্ধে আদালতত আবেদন জনাইছিল। আৰু এই যুঁজত জয়ী হৈছিল বেগী বলাৰ গৰাকী।
সাত বছৰ নিলম্বিত হৈ থকাৰ পিছত, তেওঁ এতিয়া ক্ৰিকেট ফিল্ডলৈ ঘূৰি আহিবলৈ সাজু। ২০২০ চনৰ ছেপ্তেম্বৰত তেওঁৰ শাস্তিৰ ম্যাদ উকলিছে।
শ্ৰীসন্থে কেৰালা ক্ৰিকেট এছ’চিয়েশ্যনৰ দ্বাৰা আয়োজিত প্ৰেছিডেণ্ট টি-২০ কাপত অংশ ল’ব। এই প্ৰতিযোগিতাখন ডিচেম্বৰ মাহত অনুষ্ঠিত হ’ব।
