শ্ৰীলংকাৰ বিৰুদ্ধে প্ৰথমখন এদিনীয়া টাই হ’ব বুলি কোনোও ভাবিব পৰা নাছিল। মাত্ৰ ২৩০ ৰানৰ সন্মুখতে অসহায় হৈ পৰে ৰোহিত শৰ্মাৰ টীম ইণ্ডিয়া। গম্ভীৰে হয়তো ভবা নাছিল যে দেশৰ হৈ প্ৰশিক্ষক জীৱনৰ প্ৰথমখন এদিনীয়া মেচ এই পৰিস্থিতিত উপনীত হ’ব।
স্বাভাৱিকতে দ্বিতীয়খন মেচত সেই শিক্ষা লৈ ভাৰতে প্ৰত্যাৱৰ্তন কৰিব বুলি আশা কৰা হৈছিল। কিন্তু এই মেচখনত ৰোহিত-কোহলীৰ দেশৰ ক্ৰিকেট অনুৰাগীসকলে জেফ্ৰি ৱাণ্ডাৰছেৰ স্পিন বলিঙত কেৱল সেই বেটিং ব্যৰ্থতাৰ সাক্ষী হৈ ৰ’ল। শ্ৰীলংকাই ৩২ ৰানত জয়লাভ কৰে।
শ্ৰীলংকাৰ অধিনায়ক সৰিথ আছালংকাই টছত জয়লাভ কৰি প্ৰথমে বেটিং কৰাৰ সিদ্ধান্ত লয়। আগৰ মেচখনত পিছলৈ বল মন্থৰ হৈ আহিছিল। স্পীন হৈছিল। ভাৰতৰ বেটিঙৰ সময়তো সেয়াই হৈছিল। ঠিক ৱাশ্বিংটন সুন্দৰৰ দৰেই কুলদীপ যাদৱহঁতেও আৰম্ভণিতে সুযোগ পাইছিল। মেচখনৰ প্ৰথমটো বলত মহম্মদ চিৰাজে পাথুম নিছাংকাক উভতাই পঠিয়াইছিল।
লগতে পঢ়কঃ মাহেকীয়াৰ সময়ত যৌন সম্পৰ্ক কৰিব পাৰিনে? জানি লওক ইয়াৰ উপকাৰ আৰু অপকাৰ সমূহ
কিন্তু তাৰ পিছতে দৃঢ় হৈ ৰয় আৱিষ্কা ফাৰ্নাণ্ডো আৰু কুশল মেণ্ডিছ। এই যুটিটোৱে ৭৪ ৰান সংগ্ৰহ কৰে। ৱাশ্বিংটনে তাৰ পৰাই একলগে আঘাত হানে। দুয়োজনে উইকেট হেৰুৱাৰ পিছত কোনোৱেই বেছি সময় ক্ৰীজত টিকি থাকিব নোৱাৰিলে। ভাৰতীয় অধিনায়ক ৰোহিত শৰ্মাইও দুই অভাৰ বলিং কৰে। শেষত শ্ৰীলংকাৰ ইনিংছ ২৪০ ৰানত সমাপ্ত হৈ পৰে।
আজি ভাৰতৰ বেটিং পূৰ্বৰ মেচখনৰ ৰিপ্লেৰ দৰে আছিল। যেতিয়ালৈকে ৰোহিতে বেটিং কৰি আছিল, ভাৰতে কেতিয়াও ভবা নাছিল যে তেওঁলোকে মেচখনত পৰাস্ত হ’ব পাৰে। যিয়েই বল কৰিবলৈ নাহক কিয় সকলো খেলপথাৰৰ বাহিৰত পৰিছিল। ৰোহিতে ৪৪টা বলত ৬৪ ৰান সংগ্ৰহ কৰি আউট হয়। তেওঁৰ ইনিংছত ৫টা চাৰি আৰু ৪টা ছয় আছিল।
শুভমনেও তেওঁৰ সৈতে ভাল বেটিং কৰিছিল। কিন্তু দুয়ো ঘূৰি অহাৰ লগে লগে ভাৰতীয় বেটিং খহি পৰিল। পুনৰ বিৰাট কোহলীয়ে ৰান নাপালে। শিৱম ডুবে শূন্য ৰাণতে উভতি আহে। এফালে অক্ষৰ পেটেলে অলপ চেষ্টা কৰিলেও কাৰো সংগ নাপালে। শ্ৰেয়াছ আয়াৰ, কে এল ৰাহুলও সোনকালে আউট হৈ উভতি গ’ল। তাতেই খেলখনত পৰাস্ত হয় ভাৰত।
লগতে পঢ়কঃভগ্ন হ’ল অলিম্পিক বিজয়ৰ স্বপ্ন! চীনৰ লি কিয়ানৰ ওচৰত হাৰ মানিলে অসমৰ লাভলীনাই
জেফ্ৰি ৱাণ্ডাৰছে ৬টা উইকেটৰে ভাৰতীয় বেটিঙক তচনচ কৰি পেলালে। ফলত ভাৰতৰ ইনিংছ ২০৮ ৰানতে সমাপ্ত হয়। শুভমানে (৩৫) আৰম্ভণিতে ৰোহিতৰ সৈতে ভাল আৰম্ভণি কৰিছিল। পিছত অক্ষৰ পেটেলেও (৪৪) চেষ্টা কৰে। কিন্তু মেচখনত পুনৰ ঘুৰি আহিবলৈ সেয়া যথেষ্ট নাছিল। ফলত শ্ৰীলংকাই মেচখনত ৩২ ৰানত জয়লাভ কৰে।
