সৰ্বত্ৰে ত্ৰাসৰ সৃষ্টি কৰিছে ক’ৰ’না ভাইৰাছে। কৰ’না সংক্ৰমন ৰোধৰ বাবে দেশত অব্যাহত আছে ল’কডাউন। ল’কডাউনৰ বাবে বন্ধ হৈ আছিল টোলগেটসমূহ।
লকডাউনৰ বাবে বন্ধ হৈ থকা টোলগেটসমূহ দেওবাৰে মাজনিশা ১২বজাৰ পৰা পুনৰ মুকলি কৰা হয়।
চৰকাৰৰ সিদ্ধান্তক কঠোৰ বিৰোধিতা কৰে কৃষক মুক্তি সংগ্রাম সমিতি আৰু ছাত্ৰ মুক্তি সংগ্রাম সমিতিয়ে ।
কৃষক মুক্তি সংগ্রাম সমিতিৰ সভাপতি ৰাজু বৰাই প্ৰতিক্ৰিয়া প্ৰকাশ কৰি কয় ‘ভাৰত চৰকাৰৰ আৰু ৰাষ্ট্ৰীয় ঘাইপথ প্ৰাধীকৰণে সমগ্ৰ দেশত টোলগেটসমূহ খুলি দি পুনৰ জনতাক মাধমাৰ সোধোৱাৰ প্ৰক্ৰিয়া আৰম্ভ কৰিছে। তাক কৃষক মুক্তি সংগ্ৰাম সমিতিয়ে পূৰ্ণ বিৰোধিতা কৰিছোঁ।’
আনহাতে অসমৰ ৰহা আৰু বিজনী টোলগেট যাতে কোনো কাৰণতে বন্ধ কৰে তাৰ বাবে অসম চৰকাৰৰ জড়িয়তে ভাৰত চৰকাৰক আৰু ৰাষ্ট্ৰীয় ঘাইপথ প্ৰাধিকৰণক দাবী জনায়।
লগতে ৰাজু বৰাই কয় যে যিসময়ত টোলগেটৰ মাজেৰে কেৱল খাদ্য-সামগ্ৰী, শাক-পাচলি আৰু চিকিৎসাৰ লগত জড়িত গাড়ীসমূহে চলি আছে। তেনে সময়ত পুনৰ টোলগেট মুকলি কৰি গুণ্ডাকৰ সংগ্ৰহৰ জৰিয়তে খাদ্য-সামগ্ৰী পুনৰ মূল্যবৃদ্ধি হ’ব।
ইফালে ছাত্ৰ মুক্তিৰ সংগ্রাম সমিতিৰ সহকাৰী সাধাৰণ সম্পাদক প্ৰাঞ্জল কলিতাই টোলগেট মুকলি কৰাৰ সিদ্ধান্তক বিৰোধিতা কৰি কয়, ‘এই সিদ্ধান্ত সম্পূৰ্ন হঠকাৰী সিদ্ধান্ত। পূৰ্বৰ পৰা নীতি-বৰ্হিভূত ভাৱে চলা ৰহা টোলগেট বিৰোধিতা কৰিছোঁ।’
আনহাতে প্ৰাঞ্জল কলিতাই কয় যে ৰাইজ বৰ্তমান সময়ত বিপয্যৰ সন্মুখীন হৈছে। তেনে সময়ত অসম চৰকাৰে কিহৰ ভিত্তিত ৰহাৰ টোলগেট পুনৰ মুকলি কৰিছে সেই সিদ্ধান্ত ওপৰত আমি সন্দেহ প্ৰকাশ কৰিছোঁ।
যি সময়ত কেৱল অত্যাৱশ্যকীয় সেৱা লগত জড়িত বাহনসমূহ চলাচল কৰি আছে তেনে বাহনৰ পৰা কৰ লৈ কেনেধৰণৰ পদক্ষেপৰ কথা বুজাব বিচাৰিছে। যিসময় বেংক প্ৰতিষ্ঠান ব্যক্তিগত বিদ্যালয় তথা বিভিন্নজন অসমবাসীৰ পক্ষত থিয় দিছে কিন্তু এইখিনি সময়ত অসম চৰকাৰে অসমবাসীৰ বিপক্ষে কিয় থিয় দিছে বুলি কয় ছাত্ৰ মুক্তিৰ সংগ্রাম সমিতিৰ সহকাৰী সাধাৰণ সম্পাদক প্ৰাঞ্জল কলিতাই।
কলিতাই তাৎপৰ্যপূৰ্ণ মন্তব্য কৰি কয় যে ‘যিসময়ত কৃষকে পেলাই দিব লগা হোৱা শাক-পাচলি, গাখীৰ চৰকাৰে ক্ৰয় কৰি নিজাকৈ বিক্ৰী ব্যবস্থাৰে অসমৰ গ্রাম্য অৰ্থনীতি সকাহ দিব লাগিছিল। সেই সময়ত চৰকাৰে কেৱল নিজৰ কথা ভাবি নিজৰ স্বাৰ্থ সিদ্ধি বাবে টোলগেট মুকলি কৰিব বিচাৰে।’
সংগঠন দুটাই চৰকাৰক টোলগেট সমূহ অতিশীঘ্ৰে বন্ধ কৰাৰ দাবী জনায়।
