পঞ্চায়ত নিৰ্বাচনৰ বাবে ৰাষ্ট্ৰীয় এন আৰ চিৰ কাম-কাজ স্তিমিত হৈ পৰাত দাবী-আপত্তি দাখিলৰ আৰু সময় বিচাৰি ৰাজ্য চৰকাৰে উচ্চতম ন্যায়ালয়ত আৱেদন জনোৱাৰ চিন্তা-চৰ্চা কৰিছে । উচ্চতম ন্যায়ালয়ে এন আৰ চিৰ চূড়ান্ত খচৰাৰ পৰা নাম বাদ পৰা ৪০ লাখ লোকৰ নাম অন্তৰ্ভুক্তিৰ দাবী-আপত্তি দাখিলৰ সময় ২৫ ছেপ্টেম্বৰৰ পৰা অহা ১৫ ডিচেম্বৰলৈকে ধাৰ্য কৰি দিছিল।
উক্ত সময় সীমা অতিক্ৰম কৰিবলৈ আৰু মাত্ৰ সাত দিনহে বাকী আছে। ইয়াৰ মাজতে যোৱা ৫ নৱেম্বৰত পঞ্চায়ত নিৰ্বাচনৰ অধিসূচনা জাৰি হোৱাৰে পৰা নিৰ্বাচনৰ ফলাফল ঘোষণা কৰালৈকে অহা ১২ ডিচেম্বৰলৈ বিষয়া-কৰ্মচাৰী তথা ৰাইজ ব্যস্ত হৈ থাকিব। সেয়েহে ৰাজ্যৰ গৃহ বিভাগে দাবী-আপত্তি দাখিলৰ বাবে অতিৰিক্ত সময় বিচাৰি উচ্চতম ন্যায়ালয়ত আৱেদন জনোৱাৰ কথা চিন্তা কৰিছে ।
এইক্ষেত্ৰত গৃহ বিভাগে মুখ্য মন্ত্ৰীৰ অনুমোদনৰ অপেক্ষা কৰা বুলি জানিব পৰা গৈছে। কিয়নো পঞ্চায়ত নিৰ্বাচনৰ প্ৰচাৰত ব্যস্ত হৈ থকা মুখ্য মন্ত্ৰী সোণোৱালৰ অনুমোদন লাভ কৰিলেই গৃহ বিভাগে প্ৰক্ৰিয়াটোত আগবাঢ়িব। অৱশ্যে, এই সন্দৰ্ভত চূড়ান্ত সিদ্ধান্ত ল’ব উচ্চতম ন্যায়ালয়ে। কিয়নো পূৰ্বতে পঞ্চায়ত নিৰ্বাচনৰ বাবে বাধা হ’ব বুলি এন আৰ চিৰ কামৰ সময় বিচাৰি ৰাজ্য চৰকাৰে দাখিল কৰা শপতনামাৰ উত্তৰত উচ্চতম ন্যায়ালয়ে কঠোৰ স্থিতি গ্ৰহণ কৰি আৱেদন অগ্ৰাহ্য কৰিছিল।
উচ্চতম ন্যায়ালয়ে প্ৰয়োজনত চুবুৰীয়া ৰাজ্যৰ কৰ্মচাৰীক নিয়োজিত কৰি পঞ্চায়ত নিৰ্বাচন পতাৰো পৰামৰ্শ দি এন আৰ চিৰ কাম কোনো কাৰণতে যাতে বাধাপ্ৰাপ্ত নহয় তাৰো নিৰ্দেশ দিছিল। সেয়েহে পঞ্চায়ত নিৰ্বাচনৰ অজুহাতত দাবী-আপত্তিৰ সময় বৃদ্ধিৰ বিষয়টো উচ্চতম ন্যায়ালয়খনে মানি ল’বনে নাই সেয়া ন্যায়লয়খনৰ ওপৰতহে নিৰ্ভৰ কৰিছে।
উল্লেখযোগ্য যে মুঠ ৩.২৯ কোটি আৱেদনকাৰীৰ ভিতৰত চূড়ান্ত খচৰাত ২.৮৯ কোটি লোকৰ নাম অন্তৰ্ভুক্ত হৈছে। ইয়াৰ বিপৰীতে ৪০ লাখ লোকৰ নাম চূড়ান্ত খচৰাত বাদ পৰিছে। আনহাতে, নাম অন্তৰ্ভুক্তিৰ বাবে এতিয়ালৈ দাবী দাখিলৰ সংখ্যা ৭ লাখ মানহে হৈছে।