অসমত ক’ভিড আক্ৰান্তৰ শৰীৰত ব্লেক ফাংগাছৰ উপস্থিতিৰ আংশকাক লৈ তৎপৰ হৈ পৰিছে ৰাজ্য চৰকাৰ। ব্লেক ফাংগাছৰ বিষয়টো অধ্যয়ন কৰি ৰাজ্য চৰকাৰক প্ৰতিবেদন দিবলৈ ইতিমধ্যে স্বাস্থ্য বিভাগে চিকিৎসা বিশেষজ্ঞক দায়িত্ব অৰ্পণ কৰিছে।
ৰাজ্যৰ স্বাস্থ্যমন্ত্ৰী কেশৱ মহন্তই আজি বিয়লি গুৱাহাটীত সংবাদ মাধ্যমৰ আগত এই কথা ঘোষণা কৰে।
তেওঁ জনোৱা মতে, বিশেষজ্ঞসকলে আজি নিশাৰ ভিতৰতে এই সন্দৰ্ভত ৰাজ্য চৰকাৰৰ ওচৰত প্ৰতিবেদন দাখিল কৰিব ।
বিশেষজ্ঞৰ প্ৰতিবেদন লাভৰ পাছতে ৰাজ্য চৰকাৰে ব্লেক ফাংগাছ সন্দৰ্ভত যথোচিত কাৰ্যব্যৱস্থাৰ নিৰ্দেশনা জাৰি কৰিব বুলি স্বাস্থ্যমন্ত্ৰীগৰাকীয়ে প্ৰকাশ কৰে।
বিষয়টোক স্বাস্থ্য বিভাগে যথেষ্ঠ গুৰুত্ব সহকাৰে লৈ নজৰ ৰাখি থকা বুলি জানিবলৈ দি মন্ত্ৰীগৰাকীয়ে ব্লেক ফাংগাছক লৈ আতংকিত নহ’বলৈ ৰাইজলৈ আহ্বান জনাইছে। মন্ত্ৰীগৰাকীয়ে ৰাইজক আশ্বস্ত কৰি কয় যে ব্লেক ফাংগাছ কোনো ধৰণৰ সংক্ৰামক ৰোগ নহয়। সেয়ে, ইয়াকলৈ আতংকিত হোৱাৰ পৰিৱৰ্তে জনসাধাৰণক ন্যূনতম সামাজিক দূৰত্ব, মাস্ক ব্যৱহাৰ আৰু সঘনাই চাবোনেৰে হাত ধোৱা বা ছেনিটাইজ কৰাৰ নিয়মসমূহ মানি চলাত সচেষ্ট হৈ ক’ভিডৰ সংক্ৰমণ প্ৰতিৰোধত আগভাগ ল’বলৈ অনুৰোধ জনায়।
ৰাজ্যখনৰ অক্সিজেন উৎপাদন সামৰ্থ্য পূৰ্বৰ ৪০ মেট্ৰিক টনৰ পৰা বৰ্তমান ৬৭.১৪ মেট্ৰিক টনলৈ বৃদ্ধি পোৱাৰ লগতে মেডিকেল ব্যৱহাৰযোগ্য তৰল অক্সিজেন মজুতকৰণৰ সামৰ্থ্যও ২৩৯ মেট্ৰিক টনলৈ বৃদ্ধি কৰা হৈছে।
তদুপৰি, অতি কম দিনৰ ভিতৰতে মেডিকেল ব্যৱহাৰযোগ্য তৰল অক্সিজেন মজুতকৰণৰ সামৰ্থ অতিৰিক্ত ৩৪.২ মেট্ৰিক টনলৈ বৃদ্ধি পাব বুলিও মন্ত্ৰী মহন্তই কেন্দ্ৰীয় স্বাস্থ্যমন্ত্ৰী গৰাকীক জানিবলৈ দিয়ে।
আনহাতে, সৰুসজাই ষ্টেডিয়ামত অহা পোন্ধৰ দিনৰ ভিতৰতে ৩০০খন আইচিইউ তথা অক্সিজেনসহ বিচনা সংলগ্ন কৰা, এখন নতুন ক’ভিড চিকিৎসালয় নিৰ্মাণৰ বাবে ইতিমধ্যে ডিআৰডিঅ’ৰ লগত বুজাবুজি চুক্তি সম্পাদন কৰি কাম আৰম্ভ কৰাৰ কথাও ডাঃ হৰ্ষবৰ্ধনক অৱগত কৰে ৰাজ্যৰ স্বাস্থ্যমন্ত্ৰী গৰাকীয়ে। স্বাস্থ্যমন্ত্ৰী মহন্তই প্ৰকাশ কৰে যে অসমত দৈনিক ১ লাখ লোকৰ ক’ভিড পৰীক্ষণৰ ব্যৱস্থা কৰাৰ সমান্তৰালকৈ প্ৰতিষেধক প্ৰদানৰ হাৰো বৃদ্ধি কৰা হৈছে। অসমলৈ বৰ্ধিত হাৰত ক’ভিড প্ৰতিষেধক প্ৰেৰণৰ বাবে ভিডিঅ’ কনফাৰেন্সত কেন্দ্ৰীয় স্বাস্থ্যমন্ত্ৰীগৰাকীক ৰাজ্যৰ স্বাস্থ্যমন্ত্ৰী মহন্তই অনুৰোধ জনায়।
