অসমলৈ পৰ্য্যায়ক্ৰমে উভতি আহিব পাৰিব বহিঃ ৰাজ্যত আৱদ্ধ লোক। তাৰ বাবে মুকলি কৰা হৈছে এক হেল্পলাইন নম্বৰ। গুৱাহাটীত শনিবাৰে অনুষ্ঠিত এখন সংবাদমেলত মন্ত্ৰী হিমন্ত বিশ্ব শৰ্মাই এই কথা জনায়।
মন্ত্ৰীগৰাকীয়ে জানিবলৈ দিয়া অনুসৰি বিশেষ ৰে’লযোগে অসমৰ লোকসকলক পৰ্য্যায়ক্ৰমে ওভতাই অনা হ’ব।
ইয়াৰ বাবে এক হেল্পলাইন নম্বৰ মুকলি কৰা হৈছে বুলি জানিবলৈ দি তেওঁ কয় ‘7428159966 নম্বৰত এবাৰ মিছকল দিব লাগিব। মিছকল দিয়াৰ ৪৮ ঘন্টাৰ ভিতৰত লোকজনে এটা লিংক পাব।‘
এই লিংকৰ জৰিয়তে লোকজনে নিজৰ সৱিশেষ জনাব লাগিব বুলি মন্ত্ৰীগৰাকীয়ে জনায়।
অৱশ্যে অসম কেয়াৰৰ অধীনত পূৰ্বতে মিছকল দি নাম পঞ্জীয়ণ কৰাসকলে পুনৰ মিছডকল দিব নালাগে বুলিও তেওঁ উল্লেখ কৰে।
অসমলৈ ঘূৰি আহিবলগীয়া লোকসকলে কোন ঠাইৰ পৰা অসমৰ কোন ঠাইলৈ আহিব বিচাৰে সকলো জনাব লাগিব বুলি উল্লেখ কৰি তেওঁ লগতে কয় ‘দিল্লী, পশ্চিমবংগ আদিৰ পৰা আৱদ্ধ লোকক বাছৰে অনাৰ ব্যৱস্থা হ’ব।‘
ইয়াৰোপৰি নিজা বাহনেৰেও বহিঃৰাজ্যৰ পৰা আহিব পাৰিব অসমৰ লোক। ‘নিজা বাহনেৰে আহিব বিচৰা সকলে ই-মেইলযোগে ল’ব লাগিব অনুমতি। [email protected] লৈ কৰিব লাগিব ই-মেইল।‘ তেওঁ কয়।
নিজা বাহনেৰে অহা লোকসকলক চৰকাৰে আৰ্থিক সাহায্য দিব বুলিও তেওঁ জানিবলৈ দিয়ে।
বহিঃৰাজ্যৰ পৰা অহা লোকক শ্ৰীৰামপুৰ আৰু বক্সিৰহাটতত কৰোৱা হ’ব স্বাস্থ্য পৰীক্ষা আৰু তেওঁলোকক ১৪ দিনৰ বাবে কুৱাৰেন্টাইন হ’ব লাগিব বুলি তেওঁ কয়।
অসমৰ বাহিৰৰ পৰা লোকসকল ঘূৰি অহাৰ লগে লগে বৃহৎ পৰিমাণৰ টেষ্টিং কৰিবলগীয়া হ’ব বুলি উল্লেখ কৰি তেওঁ লগতে কয় ‘অসমৰ বাহিৰত আৱদ্ধ হৈ থকা ৬৫২০০০ লোকে ২০০০ টকাৰ বাবে ফৰ্ম ফিলাপ কৰিছে। প-পত্ৰ পূৰণ নকৰা ছাত্ৰ-ছাত্ৰী বা লোকৰ সংখ্যা প্ৰায় ২ লাখ হ’ব। পৰিয়ালসহ অতি কমেও ২০ লাখ লোক অসমৰ বাহিৰত আছে। কোনো ৰাজ্য চৰকাৰৰ বাবে সম্ভৱ নহ’ব যে ২০ লাখৰ প্ৰতিগৰাকী লোকক অসমলৈ ওভটাই আনিব পাৰিম।‘
‘বাহিৰৰ উদ্যোগসমূহ মুকলি হৈ যোৱাৰ পাছত কৰ্মৰত অসমৰ লোকসকল ওভটি নাহে। অহা ৪ মে’ৰ পৰা যিহেতু বাহিৰৰ ৰাজ্যসমূহৰ গ্ৰীণ জ’নৰ জিলাসমূহত অফিচ কাছাৰী মুকলি হ’ব গতিকে তেওঁলোক হয়তো উভটি নাহে। যদি ওভটি আহিব বিচাৰে তেন্তে অহা-যোৱা আৰু ১৪ দিন কুৱাৰেন্টাইনকে ধৰি এক বিশাল ব্যৱস্থাৰ সন্মুখীন হ’ব।‘ মন্ত্ৰীগৰাকীয়ে লগতে কয়।
আনহাতে, যিসকল অহাৰ প্ৰয়োজনীয়তা আছে তেওঁলোককহে প্ৰথম অগ্ৰাধিকাৰ দিব পাৰো বা লক্ষ্য এটা বান্ধি ল’ব পাৰি বুলি তেওঁ উল্লেখ কৰি লগতে কয় ‘যি সকলৰ অহাৰ প্ৰয়োজনীয়তা নাই বা হটস্পটৰ পৰা আহিব বিচাৰিছে বা যিসকল আহিলে অসমলৈ ভাবুকি আহিব পাৰে, সেই সকললৈ বিনম্ৰ অনুৰোধ তেওঁলোকে আৰু কিছুদিন অপেক্ষা কৰক।‘
‘কাইলৈৰ পৰা উত্তৰ-পূবৰ সকলো ৰাজ্যৰ দুৱাৰ মুকলি কৰি দিয়া হ’ব। কাইলৈৰ পৰা উত্তৰ-পূবৰ ৰাজ্যসমূহত আৱদ্ধ লোকসকল যি যেনেকৈ পাৰে আহিব পাৰে। অসমলৈ অহাৰ লগে লগে তেওঁলোকক জিলাৰ সীমান্তত স্বাস্থ্য পৰীক্ষা, প্ৰয়োজন অনুসৰি হোম কুৱাৰেন্টাইন, ফেচিলিটী কুৱাৰেন্টাইন বা হাস্পতাললৈ লৈ যোৱাৰ ব্যৱস্থা হাতত লোৱা হ’ব। অৱশ্যে চিকিম অন্তৰ্ভুক্ত নহয়।‘ মন্ত্ৰীগৰাকীয়ে এইদৰে কয়।