এইবাৰ মঙলদৈত ঘটিছে এক অমানৱীয় কাণ্ড। মঙলদৈত কুকুৰৰ মুখত দেখা গ’ল এটি নৱজাতকৰ মৃতদেহ। এটা কুকুৰে নৱজাতকৰ মৃতদেহ মুখত লৈ দৌৰি থকা অৱস্থাত প্ৰত্যক্ষ কৰে স্থানীয় ৰাইজে।
মঙলদৈৰ ছপাইশালা অঞ্চলত সংঘটিত হৈছে এই হৃদয় বিদাৰক ঘটনা। কুকুৰটোৰ মুখৰ পৰা নৱজাতকটোৰ মৃতদেহ উদ্ধাৰ কৰিবলৈ স্থানীয় ৰাইজে কুকুৰটো খেদোতে কুকুৰে মুখেৰে কামুৰি মঙলদৈৰ বেগা নদীৰ পাৰলৈ লৈ যায় মৃত নৱজাতকটিক।
অৱশেষত বেগা নৈৰ পাৰত কুকুৰৰ মুখৰ পৰা নৱজাতক টিক উদ্ধাৰ কৰে স্থানীয় ৰাইজে। ইয়াৰ পিছতেই ঘটনাস্থলীত উপস্থিত হয় আৰক্ষী। সম্প্ৰতি আৰক্ষীয়ে তদন্ত অব্যাহত ৰাখি নৱজাতকটিৰ মৰণোত্তৰ পৰীক্ষাৰ ব্যৱস্থা কৰিছে।
উল্লেখ্য যে কুকুৰৰ মুখৰ পৰা উদ্ধাৰ কৰা নৱজাতকটিৰ পিতৃ-মাতৃ কোন আৰু কুকুৰটোৱে নৱজাতকটিক ক’ৰ পৰা আনিলে সেই সম্পৰ্কে এতিয়ালৈকে একো শুং সূত্ৰ লাভ কৰা নাই স্থানীয় ৰাইজ আৰু আৰক্ষীয়ে।
স্থানীয় ৰাইজে সন্দেহ কৰা মতে কোনো লোকে নিজৰ কু-কৰ্ম লুকুৱাবৰ বাবে পেলাই থৈ গৈছে নৱজাতকটিৰ মৃতদেহ।
