জৰুৰীকালীন স্বাস্থ্য সেৱাৰ কৰ্মচাৰীয়েও প্ৰতিবাদত নামিব লগীয়া হ’ল এইখন চৰকাৰৰ দিনত। তাকো খুবেই দক্ষ বুলি প্ৰতিপন্ন কৰিব খোজা স্বাস্থ্য মন্ত্ৰীজনৰ অধীনৰ বিভাগত। ৰাজ্যত জৰুৰীকালীন স্বাস্থ্য সেৱা আগ বঢ়াই অহা ১০৮ আৰু ১০২-ৰ কৰ্মচাৰীসকলে শোষণ-বঞ্চনাৰ অভিযোগ তুলি আজিৰ পৰা অনিৰ্দিষ্ট কাললৈ কৰ্মবিৰতিৰে প্ৰতিবাদ সাব্যস্ত কৰিছে।
উল্লেখযোগ্য যে মুখ্য মন্ত্ৰী আৰু স্বাস্থ্য মন্ত্ৰীৰ বিৰুদ্ধে তেওঁলোকৰ দাবীৰ প্ৰতি কোনো সঁহাৰি নিদিয়াৰ অভিযোগ আনিছে কৰ্মচাৰীসকলে।
যোৱা ২৩ আগষ্টত গুৱাহাটী প্ৰে’ছ ক্লাবত এই সন্দৰ্ভত এখন সংবাদমেল দি সৰ্বভাৰতীয় শ্ৰমিক সংগঠন নিখিল ভাৰত ট্ৰে’ড ইউনিয়ন কংগ্ৰেছ (AITUC)-এ ‘অসম চৰকাৰৰ পৰা কোনো ধৰণৰ সঁহাৰি নোপোৱা বাবে ৫ চেপ্তেম্বৰৰ পৰা অনিৰ্দিষ্টকালীন কৰ্মবিৰতি পালন কৰাৰ কথা অৱগত কৰিছিল।
শ্ৰমিক সংগঠনটোৱে ৰাজ্যিক শ্ৰম আয়োগে যোৱা ৩০ জানুৱাৰিত Industrial Employment (Standing Order) Act 1946ৰ অধীনত দিয়া নিৰ্দেশনা অমান্য কৰি কৰ্মচাৰীক হাৰাশাস্তি কৰাৰ অভিযোগ আনিছিল। GVK-EMRI-এ ‘সেৱা বিধি কাৰ্যকৰী নকৰি খেয়াল-খুচিমতে কৰ্মচাৰীসকলক হাৰাশাস্তি কৰি আহিছে বুলি সংগঠনটোৱে সংবাদমেলত অভিযোগ আনিছিল।
মন কৰিব লগীয়া যে ২০০৮ৰ পৰা ২০১৪ চনলৈ কৰ্মচাৰীসকলক প্ৰদান কৰি অহা দৰমহাৰ বাৰ্ষিক বৃদ্ধি (Annual Increment) ২০১৫-১৬ আৰু ২০১৬-১৭ বৰ্ষত নিয়োগকাৰী GVK-EMRI-এই হঠাৎ বন্ধ কৰি দিছিল। ইয়াৰ প্ৰতিবাদ কৰাত এই ধন মুকলি কৰি দিব বুলি লিখিত প্ৰতিশ্ৰুতি দিছিল। কিন্তু সেয়া এতিয়ালৈকে এই ধন মুকলি কৰি দিয়া নাই।
এই সন্দৰ্ভত মুখ্য মন্ত্ৰী আৰু স্বাস্থ্য মন্ত্ৰীক অৱগত কৰাৰ পিছতো কোনো সমিধান নাপালে কৰ্মচাৰীসকলে। জৰুৰীকালীন সেৱাত নিয়োজিত কৰ্মচাৰীক আন্দোলনৰ পথ ল’বলৈ বাধ্য কৰি চৰকাৰে জনসাধাৰণক পণবন্দী কৰাৰ দৰে হৈছে কৰ্মচাৰীসকলে।
