কৃষক মুক্তি সংগ্ৰাম সমিতিয়ে কেন্দ্ৰই নাগৰিকত্ব আইন সংশোধনৰ বাবে লোৱা ব্যৱস্থাৰ বিৰুদ্ধে বুধবাৰে দুই পথ ঘোষণা কৰিছে: মহাসংগ্ৰাম আৰু ভাৰতৰ উচ্চতম ন্যায়ালয়।
সংগঠনটোৰ নেতা অখিল গগৈয়ে কেন্দ্ৰৰ পদক্ষেপৰ বিৰুদ্ধে “অসমৰ সকলো দল-সংগঠন”ৰ ঐক্যবদ্ধ আন্দোলনৰ আহ্বান জনাইছে। আৰু সংগঠনটোৱে বৃহস্পতিবাৰে অসম বিধান সভাৰ বাহিৰত বিশাল প্ৰতিবাদ সাব্যস্ত কৰিব।
এই প্ৰতিবাদক “মহাসংগ্ৰাম”ৰূপে আখ্যা দি সকলো শ্ৰেণীৰ লোকক আন্দোলনত ভাগ লোৱাৰ বাবে আহ্বান জনায়।
“কেব সম্পূৰ্ণৰূপে বাতিল নোহোৱা পৰ্য্যন্ত সন্মিলিত, ঐক্যবদ্ধভাৱে সংগ্ৰাম চলাই যাব লাগিব। সদৌ অসম ছাত্ৰ সন্থাকে ধৰি বিভিন্ন জাতীয় দল-সংগঠনক কাইলৈ প্ৰতিবাদলৈ আমন্ত্ৰণ জনোৱা হৈছে,” গগৈয়ে কয়।
“কেব গৃহীত হ’লে KMSS উচ্চতম ন্যায়ালয়ৰ দ্বাৰস্থ হ’ব।”
গগৈয়ে কয় তেওঁলোকে বিধেয়কৰ বিৰুদ্ধে গাঁৱলৈ যাত্ৰা আৰম্ভ কৰিব।
“অহা ১১ ডিচেম্বৰ পৰা ৰাজ্যৰ গাঁৱে-ভূঞে কেব বাতিলৰ দাবীৰে কাৰ্য্যসূচী গ্ৰহণ কৰিব। বিজেপি হাতাও, গণতন্ত্ৰ বচাও শ্ল’গান লৈ গাঁৱৰ জনসাধাৰণৰ ওচৰলৈ যাম,” তেওঁ কয়।
অসমৰ “চহিদ দিৱস” দিনটোতে বিধেয়কখন গৃহীত কৰিব বুলি উল্লেখ কৰি গগৈয়ে কয় যে অসমীয়াৰ স্বাভিমানৰ দিনটোতে জাতিটোক চৰকাৰে নিঃশেষ কৰাৰ চেষ্টা চলাইছে।
গগৈৰমতে কেবৰ ফলত অহা ২০-৩০ বছৰত অসমৰ প্ৰতিটো সমষ্টিত ডেৰৰ পৰা তিনিলাখ পৰ্য্যন্ত ভোটৰ বিভাজন ঘটিব।
“কেব গৃহীত হ’লে সমগ্ৰ ভাৰততে মৌলবাদী শাসন চলিব। মৌলবাদী শক্তি বিজেপি-আৰ এছ এছক উচন কৰিব লাগিব,” গগৈয়ে কয়।
দেশৰ চাৰিটা বিৰোধী ৰাজনৈতিক দলক কেব বিৰোধৰ বাবে কৃষক মুক্তিয়ে আহ্বান জনাইছে বুলিও তেওঁ উল্লেখ কৰে।
নাগৰিকত্ব বিধেয়কত মোদী কেবিনেটে বুধবাৰে অনুমোদন জনাইছে। খবৰমতে, অহা ৯ আৰু ১০ ডিচেম্বৰত বিধেয়কখন ক্ৰমে লোক সভা আৰু ৰাজ্য সভাত উত্থাপন কৰিব।
লগতে পঢ়ক– কেব উত্থাপনৰ সময়ত সদনত থকাৰ নিৰ্দেশ সকলো বিজেপি সাংসদক, ক্ষুব্ধ মোদী
লগতে পঢ়ক– গৃহ মন্ত্ৰী শ্বাহৰ নিমন্ত্ৰণ প্ৰত্যাখ্যান, কেব বিৰোধিতাত অটল কংগ্ৰেছ
